Salmos.
95.
Kaunatajum, Tuke Pujuu, iina kuitamjamak uwemtijamna nunú shiig aneasa kantamjuawagmi. 
Nii pujamunum wayawaja nii emematku kantamtai kantamjuawagmi. 
Wagki Tuke Pujuuwai dekas múun senchigtin, ashí tikich apajuímtai aina nunashkam Apujiyai. 
Nugkak initken nagkamas ashí Apajuí emetuam awai, tuja muja tsakaju aidaushkam niinu ainawai. 
Tuja nayantsashkam nii najanamu asa ima niinuke. ¡Nugkanashkam nigki najanauwai! 
Minitajum, Tuke Pujuu, iina najapauwa nunú tikishmatja emematiagmi. 
Niyai iina Apajuíjig, tuja iik niina aentsji ainaji, nuadui uwija kuitamin niina uwigjin kuitamama numamtuk iinash kuitamjamui. Apajuí yamai atumin tujama nunú antuktajum. 
“Yaunchuk Meribánum, tuja uwejush Masánmashkam Apajuí chichamen intimjukiu aina numamtuk wajakaigpajum. 
Atumin muunjum aajaku aina duka kuashat wainchatai aidaun wi iwainamun wainainayatak, dekaskechua nunin diisu ainawai. 
Nuadui nunú aents aidaun dakitjan cuarenta mijan pujubiajai, nuniakun: ‘Juju aents aidauk shiig wainak yujawai; núnidau asag mina chichamjunak umigtuinatsui’. 
Nuadui kajekan, chicham yapajiashtinun chichaakun: ‘Dita shiig batsamsatnun nugka pegkejan wi ditan anagkuawaitag nuwig ditak jegashtin atinme’ tiabiajai”, tiuwai Apajuí.