Salmos.
110.
David kantamamu Tuke Pujuu mina apujun chichajak: “Mina untsujui ekemsata, nunikamin wi amina shiwaajum aidaunak depetkan aminí ikaunmakmatai, ame inagminum”, tiuwai. 
Jerusalégnum pujusa inamjati tusa Tuke Pujuu amina umigtamkae. Tuja amina shiwaajum aidaunak nii depeteawai. 
Ame apu wajasamin, amina aentsjum aidau shiig aneas kaunawag, ame tabau umikmi tusa tujabiagtin ainawai. Tuja amek kashikmas jegashjuk tsawauwama numamtuk, kashi kashinig yamajam senchi jutatme. 
Tuke Pujuu nii umiktinjin yapajinashtinun chichaak: “Ametme sacerdote Melquisedec aajakua nujai betek tuke sacerdote atinmek”, tiuwai. 
Apajuík amejaig pujawai amina yaimpaktatus. Makichik tsawantai nii kajeka apu aidaunak ijinattawai. 
Aents aidaun suwimkan susa ijinatnai, dutikam ashí nugkanmak aents jinauk tuwasua weaku atinai. ¡Nugka múun aidaun apuji aidaunash ashí ijinatnai! 
Depetmak jintá minis yumi entsanmayan uwagtinai; nunik ataktu ichichmamjatnai.