Salmos.
116.
Wika Tuke Pujuunak aneajai, wagki wi segamun antugtuku asamtai. 
Wagki wi segamun antugtuku asamtai, wi iwaku pujaknuk, niina tuke segatnaitjai. 
Jata achigkamtaimpap jakattaja tusan ishamkabiajai, nuniakun wake besemag pujubiajai. 
Nuniakun Tuke Pujuun segabiajai uwemtijugta tusan. 
Tuke Pujuuk pegkejam, wait anenkagtinai, iina Apajuíjiya duka kakagchauch anejatin wajasui. 
Tuke Pujuuk aents kakakchau aidaunash kuitamui. Wi kakaumainchau wajasan pujaishkam, nii minak uwemtijugmayi. 
¡Yamaik shiig aneasan pujumainaitjai, Tuke Pujuu pegkeg etiu asamtai! 
Wagki Apajuí jamainun uwemtijug wi wake besemag buutku pujamugnash yaintuk uwemtijuja nuadui. 
Tuja iwaku juju nugka juwi pujag nuaduik, Tuke Pujuunak tuke umigkatnaitjai. 
Wika senchi waitiaknushkam, Apajuínak dekaskeapi tibaijai. 
Tuja wi waugtukan chichaakun: “Ashí aents aidauk waitjin ainawai”, tibaijai. 
¿Tuke Pujuu mina pegkegnum yainkamunmash, wisha wajuk akimainaitja? 
Tuja nii mina uwemtijugbaunum vinon anentag Tuke Pujuun suwakun, niina daajin pachisan ememattajai. 
Wi umiktajai tusan Tuke Pujuun tiuwaitag nunak, yamai ashí niina aentsji aidau wainainamunum umiktatjai. 
Tuke Pujuuk niina umijin aina nunú jakamtaig, wake besemag dekapeawai. 
¡Tuke Pujuuwah, wika amina inakmetjai! ¡Wika nuwa amina inakmea nuna uchijiyaitjai! ¡Ame minak achikbaujai betek ashí jakan pujai uwemtijugmayume! 
Tuke Pujuuwah, ame uwemtijugbaunum see takun uwija maan apeakun ememattatjame, dutikakun daagmin pachisan segattajame. 
Wi umiktajai tusan Tuke Pujuun tiuwaitag nunak, yamai ashí niina aentsji aidau wainainamunum umiktatjai. 
Yaakat Jerusalégkan ejapeen, Tuke Pujuu jee pegkegma nuna waitijin jegantatak agkaju ayatak shugkuk ajigmauwa nuwi nunak dutikattajai. ¡Yajauwajah! Apajuí daaji ememattai ati.