Salmos.
122.
David Jerusalén wakatatus wesa shiig aneak kantamamu Tuke Pujuu jee pegkegma nuwi wemi tujutuinakui, wika shiig anebiajai. 
Jerusalégkah, yamai juwi waitinum kaunaji. 
Jerusalén yaaktamamua nuwi ashí tikich yaakat aidaushkam ijutkau ainawai. 
Ashí Israel aents Tuke Pujuun aentsji aidauk Jerusalén tuwainawai, Apajuín emematuinak, wagki nuwi Apajuí ememattajum tibau asag, nuna umiinak. 
Nuwi awai chicham inagnatai, tuja Davitan pujusa inamtaijishkam. 
Nuadui: “Jerusalégkah, aminak utugchatak atsugtamti; tuja amina anempaina dushakam agkan pujustinme. 
Yaakat peeja apakbauwa nuna initken aents batsata dushakam agkan, tuja jega apu pujusa inamtaijiya dushakam waitkaschamu ati”, titajum. 
Tuja mina yatsug aidaun kumpag aidaujai chichagkun: “Atumnash utugchatak atsugtamtinme”, tajai. 
Untsu Jerusalégkah, aminig pujut pegkeg ati tusa wakegajai, wagki Tuke Pujuu amina Apajuígmi jee pegkegma nunú au asamtai.