Proverbios.
20.
Vino nampeamua nunú aentsun pegkegchau chichamtin emawai; uwaja nampetai aina duka utugchatan inimui; nuna uwag nampeauk shiig anentaimag chichatsui. 
Apu kajena duka león kajeak shinuwama imanai; tuja nuna apun ikajeauk nigki bakumawai. 
Aents pegkegchau takatan tupanjauk jiyanitnak dakitawai; untsu anentainkachua duka jiyanitan wekaetawai. 
Aents dakia duka aja takamain esat tepeau aig, takatsuk pujau asa, yumi tepeamtai nii yumainjig atsugtinai. 
Aentsu anentaimtajig nayantsa kunajinia wainmaitsu numamtinai. Untsu aents yacha duka nuna takumpap tawa tusa shiig dekawai. 
Kuashat aents aidau, amina kumpauchijum atajai tuinawai; ¿tujash dekas aents imanush igkumainashit? 
¡Aents pegkegchau takatan tupanjau aidaun uchiji aidauk, dita apaji pegkejan takajaku aina nujai betek pegkejan takainak, Apajuí yayamu asag shiig aneasagtinai!