Proverbios.
23.
Wiakuch atajai tusam anentaimkum waittsaipa, duka puyatjutsuk idaisata. 
Ame shiig anentaimsa diyakmek, wiakuch wetak wainkaya nunú dekaattame, wagki duka águila uchiji aidau nanapjuk nanaak shimak megkagama numamtuk megkaewai. 
Uchuchih, wi tajam nunú shiig antukam unuimagta, nuniakum shiig anentaimsam pegkeg takata duke takasta. 
Aents nampeku aidaujai ijunjamek wekaesaipa, tuja ushu aina nujaishkam kumpajinawaipa. 
Wagki nampen aidauk, ushu aidauk, ujuuna wenawai, tuja daki aidauk jáanch pegkegchau ampinkau mamuku aidaun apajag nugkuinawai. 
Apa amina akimpawa nuna chichame antugkata; tuja amina duku múuntuch wajasmataish dakitjaipa. 
Dekaskea nunú, yachameta nunú, jintinjamamu aina nunú, unuimata nunú aatsam sumakta. ¡Dutikamek duka sujukaipa! 
Uchi pegkeg, yacha, shiig anentaimkauwa nuna apajig shiig aneak ememas anentaimui. 
¡Yajauwajah, uchi yacha shiig anentaimkau aidaunmak! Nuadui uchita atumek atumi apa dukujai shiig anemtiksatajum. 
Uchuchih, wi tajam nunú shiig antukta, nuniakum wi jintintuawaitjam nunú kajimatkipa; 
wagki nuwa akika dutiktai aina duka waa múun suwe ishamainama imanai; tuja nuwa aishintin tikichjai tsanijinna dushakam waa tsejegkush, init akagama numamtinai. 
Nuadui kasajai betek kuashat aishmag aidaun achiawai, dutika aents nuna yujajin aina nujai betek emawai. 
¿Yaita waitiaush? ¿Ya waitiakush ejetua? ¿Yaita utugchatan apujus anentaimak waitu wekagush? ¿Yaita nigki suwimkan sumamas waitiaush? ¿Yaita bushapajun niim wekagush? 
Nunak vino uwaja, nampetan makichkish idaitsuk, tikich umutai aidaunashkam umú yujau aina nunú nunak núninawai. 
¡Datsauchih, uwaja nampetai aidau kajiak niime pegkeg wega duka makichkish anentaimtusmek diisaipa! ¡Nunú diyakmek wakejukam uwagtatme! 
Tuja niimeg pegkejaitak, dapi esajatbau tsaagke najamama imanai. 
Iman asamtai nunú umakmek, pegkegchau wainchatai aidau waintatme, tuja pegkegchau anentaimkum ima pegkegchauk chichattame. 
Nuniakum lanchanum egkemjanus yakí jiitkaunum ekemsan nayantsanum wegagtai dekaptatme. 
Nuniakum: “Awatujagmae, tujash dekapjachmajai; asutuinakuish dekapjachmajai; tujash nunak puyatjatsjai, juna sakapagnuk nantakin vino egakan, nuni kuashat uwagtatjai”, titatme.