Isaías.
1.
Judá wegantu aidaunash waji utugchatak ajitnush ayi nuna pachis Amosa uchijin Isaíasan Apajuí ujakui. Nunak Judá wegantu aidaun apuji aidau Uzías, Jotam, Acaz, Ezequías aatus aajaku aina nunú tsawantin ujakui. 
Dutikam nuna Isaías etsejak: Nayaim, nugka aidautigmesh Tuke Pujuu tawa nunú antuktajum. Apajuí chichaak: “Wi Israel aents aidaunak mina uchig asagmatai, kuitamkan tsakapakan idaisauwaitjai. Dutikamaitak mina umigtutsuk wijai shiwagmagawaje. 
Tuja bakak, yaita niina kuitamnush nunak shiig wainui; tuja burro aidaushkam aents niyai entsamak wekaena nunak shiig dekainawai, untsu mina aentsug Israel aents aina duka wi kuitamsam batsatiatak mina shiwagmatuinawai. 
“¡Aents ayatak pegkegchaunak takau aidauk, pegkegchau takat aina nuna utuatmamkag batsamin ainawai! ¡Tuja pegkegchaun takajaku aina nuna uchiji wegantu aidaushkam, pegkegchaunak dekainayatak, nuninun yujaju asag Tuke Pujuu, pegkejam, Israel aents aidaun Apajuíjiya nuna kajimatkiag idaisaje! 
Atumek dekas intimkiu atag tusajum wakegagme, nunin asagmin shiig kuashat suwimkan amasjime. Imatikamu asajum atumi iyashinig pegkeg ayautkauk atsawai. Tuja atumi buuken pujagbauk esamtsui, tuke imanisag ayawai. ¡Nuadui atumek kakakchau wajasugme! 
Dawemin nagkamas buukmijai ashí atumi iyashig makichkish pegkeg ayautkauk atsawai; tuja anú ibau atumi iyashin ayá nuna ampia pempenjamag kuitamak etsaentamainuk makichkish atsawai. Tuja najaimagminish aceiteyai yakagtamjagkesh, imijtugmakchaje. 
Atumi nugkenak yaaktajum aidaujai shiwag aidau tsaikagmatai, agkan shiig pujumainchau wajase. Tuja yaakat aidau apeamu keenawai. Tuja atum ajakmamu aidaunmayan shiwag aidau juukag atumesh wainjuminig amuinawai. Yaunchuk yaakat Sodoma tsaikam atsau agkan juwakua numamtuk wajase”, tujamui Apajuí. 
Untsu ima Jerusalégkak tsaikchamu juwake, nuniku asa melón ajakbaunum nuna ejapeen makichik aak aakmaka pachitsuk idaisamu aama numamtuk wajas awai. Nuniak nuigtushkam makichik yaakat shiwag tenteam aama numamtin wajas awai. 
Tuja Tuke Pujuu ashí senchigtina nunú jutii ainag nuwiyan ujumak uwemtikchakuig, iik sodomanmaya aents, gomorranmaya aents aidaujai ijinauwa numamtukes wajakagtai. 
Israel aents aidaun apuji aidautigmek, sodomanmaya tuja gomorranmaya aents aidaun apuji pegkegchau aajaku aina nunin wajasugme. Nuadui Tuke Pujuun chichamega nunú shiig antuka jukitajum. 
Tuke Pujuu chichaak: “¡Atum Apajuí anentag suwaji tusajum, kuntin aidau maajum mina emematjaku kuntin patai apetainum patagjum, nuna neje ashí apeajum nunak wika dakitajai! ¡Ataktuk sujusaigpa! Tuja toro aidaun wiyaji, uwig aishmag aidaun, chivo tsakat aidaun numpen wainkunchakam tsumajai. 
Wika mina emematjitasajum minakjum, kuntin aidau ikaunmatajum tusanuk makichkish atumnak segatsjime. Atumek mina dushiktakjum, mina jegag pegkegma nunú pegkegchau ematasajum kaunjume. ¡Juju jega mina emamatjaku ijuntaya juwig batsamtsuk, jiinja shiyaktajum! 
Ataktu awagkigmek anentag mina sujamu pegkegchau aina juninuk itagtuawaigpa. Nunú apeamua nunak wika tsumain diyajai. Tuja nantu yama takamunum Apajuí emematku jiistamtai, nuigtu tsawan ayamtain jiistamtai ati tusa umikbauwa nunú jiistamami tusajum aents aidau ipajum ijumjume, tujash wika aents pegkegchaun takau aidau jiistamaina nunak shiig dakitajai. 
Nantu yama takamunum jiistamjum nunak wika dakitajai; ¡Nunú jiistamjum nunak dakitmain diyajai, nuniakun katsuntu pujumainchau dekapeajai! 
Tuja atum mina aujtustasajum uwejum takuajum nunak wika makichkish diyatsjime; tuja antugtanakesh antugtsujime. Tuja atumek kuashat aents mainaitjum duwi, uwejum takuajum duka ayatak numpak ainawai. 
¡Nijamaktajum! ¡Pegkegchaujum aidau diitan dakitajai! ¡Pegkegchau takatak idaisatajum! 
¡Pegkeja nunú takat unuimagtajum, kakanmamsatajum pegkeg takatnum, nuniakjum aents waitkam batsata nunú yaigtajum, dutikakjum uchi bitaik aidaush, tuja waje aidaushkam ayamjuktajum!” 
Tuke Pujuu chichagtamak: “Yamai juju pachisa atumjai chichasmi. Tuja atumi tudaujum numpa kapantua imanaitkuish, wi nunak esakatjan yujagkim pujua iman awajtustatjime; tuja jáanch numpa kapantui egkekbauwa imanaitkuish, wi nunak esakatjan lana pujuama iman awajtustatjime. 
Atum mina umigtakjumek, atumi nugkem pegkeja nuwi ajakmajum yuwattagme. 
Untsu atum ayatak intimkugmek, duka maaniamunum ijina utsam atatjume”, tujamui Tuke Pujuu tusa, Isaías tiuwai. 
¡Jerusalégnumia aents aidauk yaunchkek shiig anentaimkau, waitjuchu, pegkeg aajabi, tujash yamaik nuwa wainka akika dutiktaijai betek, magkagtin wajasu ainawai! 
Atumek plata pegkejama iman ayugme, tujash yamaik utsagbaujai betek wajasugme. Yaunchkek vino pegkeja iman ayugme, tujash yamaik chujuin wajasugme. 
Atumi apuji aidauk aents intimkiu, pegkegchau aina nuna kumpaji ainawai. Kuichik akiam, tuja waji aidau suwam nuna juwinak, aents takamsachunak jujuwai takamsauk tuinawai. Tuja bitaik aidaunash, waje aidaunash waitkainawai, dutikainau asag makichkish yainatsui. 
Nuadui apu Tuke Pujuu ashí senchigtina nunú chichaak: “¡Ditak mina shiwag ainawai, nuadui wi ditanak suwimkan susagtatjai! 
Dutikakun dita tudaujinak waji pegkegchau aidau apetia numamtuk apean utsankattajai, dutikan dita pegkegchau takamtaiji aina nunak esakatjattajai. 
Dutikan yaunchuk apu chichama epegkin aidau, chichagkagtin aidau shiig takau, waitjuchu aajabia nujai betek emaktatjai. Dutika ai: ‘Jerusalégnumia aents aidauk, pegkejan takau aidau’, nuigtu: ‘Ima Apajuínak umijin aidau’, tujamtin ainawai. 
Wika wait anenkagtin asan, nuigtush uwemtikagtin asan, Jerusalégnumia aents aidau mina umigtuinakuig, wainka waitkam yujakuish, wi ditanak ayamjuktinaitjai. 
Untsu aents pegkegchaun takau aina duka ashí jinawagtinai, wagki mina umigtutan dakituidau asag. 
Tuja atum aidautijum anú yagkug aidau, tuja numi encina aidau ayá nunú shiig wakejusjum kuitamjum nuwi wainka apajuímtai aidau emematjum nunú diisjum datsagtinaitjume. 
Atum aidautigmek, numi encina duke kakekamtai, wentsamtug wajama numamtin, tuja yagkug yumi ukattsuk idaisamujai betek atinaitjume. 
Tuja atum ainajum anuiya senchigtina duka chijichi kagaju apeam megkagama numamtuk megkaejatnai. Niina tudauji aina nunuwai jii kegaujai beteka duka. Nuniau asa nunú chijichinak apea ajapeawai. Nuadui niina tudaujijai esatnai, tuja nuna ikagnamainuk makichkish atsutnai.”