Isaías.
5.
Mina kumpaju daajin pachisan, nii uva ajakmamujiya nuna pachisan, kantamtain wi kantamatjai. Mina kumpagdau nugka pegkeg shiig tsapaunum uva ajakbau ajuyi. 
Nuna nugkan pukuja, kaya aidaun utsantuk, uva ajake shiig pegkeg aidaun ajakui. Dutika peegkeg apaka, nunú aja ejapeen kumpinan jiika, vino najanatnunashkam umikui. Dutika umika uva yumimitun tsamakti tusa eke tsamachu asamtai, dakak pujau. Tujash nunú uva aidauk chujuinun tsamakui. 
Jerusalégnumia aidauwah, Judá aents aidauwah, nunú nunika dusha ¿yanawaita utugchatash, midaukait, atsa uva ajakbauwa nudaukait? 
¿Uva chujuin ai tusan wi dutikmainush awak? Wika yumimitun nejekti tusan wakekabiajai, tujash ¿wagkag chujuinnash nejekiawa? 
Tuja midau uva ajakbauwa nunash, wisha itugkatag tajaki nuna yamai ujaktajime. Wika aunak ashí ijinatnume tusan kuitamtsuk idaisattajai, tuja utsaantuawag, najakag kupig ijinatnume tusan peejamua nunashkam tegajattajai. 
Dutikan pachitsuk idaisattajai. Tuja tuke nejen ati tusa, kanawe pegkegchau aidau tsupija utsanka pegkeg ematia nunash dutikachagtatui. Tuja dupanash takagsachagtatui, dutikamu asa dupa jagki aidaujai tsapaka akijuatnai. Tuja nuna uchupig pegkeg ematnunash yuminak yutumtijashtatjai. 
Tuke Pujuu ashí senchigtin uvan wakejus ajakua duka Israel aents Judá wegantujai aina nunuwai. Tuke Pujuuk mina chichamjun umigtuktinme tusa wakekauwai, tujash ditak magkagtin wajasu ainawai. Tuke Pujuuk shiig pegkeg dekaskenum takau atinme tusa wakekauwai, tujash ditak ima pegkegchaunak takaidaun Tuke Pujuu wainui.