Isaías.
63.
¿Yaita aush edomnumia yaakat múun Boshrá tutaya nuwiya jáanch kapantui egkekbau tumainun shiig pegkejan nugkuaju ishamain mina dusha? Nunak wi depetmaktinun iwainajai, wika senchigtin asan uwemtikagtumainaitjai. 
¿Wagka uva naja najam jáanch kapantu wegama imanush jáanchjumesh wajasuita? 
Junak imanikjai wiki uvan najakun, makichkish yainkachaje. Senchi kajekmajai, nunikan mina shiwag aidaun suwimkan susamjai. Dutikakun senchi kajeku asan, tepegka ijinmaina imatikamjai, dutikai nuna numpe aidau tsakiantak jáanchjui ukatjukmae. 
Nunak dutikamjai mina aentsug aidaun ayamjakun, mina shiwag aidau ijinatin tsawan jegau asamtai. 
Mina yainmainush atsuash tukaman makichkish wainkachmaijai, nunikan anentai jegachmaijai. Nunikan senchi kajekbaujui mina senchigjai depetmakmaijai. 
Shiig senchi kajekbaujui aents nugka muunnumia aidaunak tepegka ijinmaina numamtuk ijinabiajai. Dutika ai numpa saeki akaikibi. 
Isaías chichaak: “Apajuí anenken pachisan chichaakun, nii jutiin ayamjutpak kuashat dutikauwa nuna anentaimtusan kantamatasan wakegajai. Apajuík Israel aents aidaun wait anentau asa niina anenkega nuna ditan iwaintak kuashat yaigkui.” 
Apajuí chichaak: “Ditak mina aentsug asag, mina uchig, mina nawantug aina duwi intimjutmainchau ainawai. Nuadui dita pegkegchaujig kuashat aig, wait anentug uwemtikjauwai. 
Israel aents aidaun waitkagtaik, niig tikichin akupkag ayamjukchauwai, dekas nii Apajuí taa ayamjukui. Apajuík niina anenken, niina senchijin aatus, Israel aents aidaunak wait anentak tuké ayamjuk uwemtiknai. 
Imatika yayamash Israel aents aidauk intimjuinak, Apajuí pegkegman ikajejaku ainawai. Nuadui ditan pempeentuki shiwaajui itugmaina numamtuk ditajai maaniauwai. 
Imanik waituinak yaunchuk Moisés dita apachji aajaku aidaun jiija yajuak uwemtikjauwa nuna anentaimtus chichainak: ‘Moisés Israel aents aidaun apuji aajakua nunú piipich asamtai, namak Nilonum ajugkam jakeaun jiikiuwa dusha Apajuísh ¿tuwi pujawa? Tuja Moisésai Niina Wakani pegkegman apusauwa dusha Apajuísh ¿tuwi pujawa? 
Apajuí niina senchijijai Moisésan uyunajakua dusha, tuja niina aentsji aidau ishamainun ukumtikak, atakea duish kajimatkishtinun niina senchijin iwainak nayantsan ukuyauwa dusha ¿tuwi pujawa? 
Caballo mujanum weakush atakuinag iyauchua numamtuk, nayants buku wajasbaunum initak shimakush, atakuinjashtinme tusa umikua dusha Apajuísh yamaish ¿tuwi pujawa? 
Apajuí niina aentsji aidaun baka aidau nainnum yujau wakeen nugka pakanum utsanawag ayamama numamtuk ayamtikna dusha Apajuísh ¿tuwi pujawa?’ tiagtinai”, tiuwai. Tuja inagnamua nuna Isaías chichaak: “Apajuín Wakani ditan uyuntsauwai. Aatus niina imanjin ashí iwainak ekemsauwai”, tiuwai. 
Israel aents aidau Apajuín aujainak: “Chah, Apajuíjuh, ame pujutaijum nayaim pegkegma nuwi pujusam antukta. Amek jikamsa anejatchau dekapeaji, tuja ame senchigtinaitam dusha iwainkagtatsme. ¿Amesh jutiish wajuk diijatme? Atsa amina wait anenkagtutaigmek ¿amuekaek? 
¡Ametme jutiin apajimek, Abraham niina uchijichu anenjamkuish, tuja Israel pachipachkuish, ametme iina apajimek! ¡Ametme iina tuke uwemtikagtinmek! 
Aminí kanaktinme tusamek tukagtipa, tuja intimkiu atinme tusamesh tukagtipa. Amina inakem ainag nunú, amina aentsjum maki makichik wegantu aina nujai aneakmek, ataktu wait anenkagtugta. 
Amina aentsjum ame etegkamu aina duka dita nugkeenig ujumak tsawanchik batsatui. Ame emematku ijuntaiya nunak iina shiwaaji aidau pegkegchau awajainawai. 
Ii aidautik amina chichamem umitsuk, nuigtush aminuchu amaina numamtuk batsatji. Wait aneasam amina anenkem ataktu iwainkagtukta”, tiajui.