Jeremías.
2.
Tuke Pujuu mina chichagtak: 
“Jerusalén wetá, nunikam ashí aents aidau senchi untsumka chichagkum aatus Tuke Pujuu tawai tita: “ ‘Ame tsakat asam ima minak umigtin ayum nuna aneakjai. Tuja yama nuwatkamu aishin aneemaina imatikam anentiume, nuniau asam uwejush ajakmamash tsapamainchaunum juki emaish pataetugsam miniyume. 
Israel aents aidauk midau agtin etegkamu ayi, ditak ajak ajakmamu yama nagkamchak shiig pegkejan nejegama iman aajabi. Tuja ditan waitkainakuig, wi nunak suwimkan su ayajai. Nunak dekas dutikamujun’, tajai”, tiuwai. 
¡Israel aents aidauwah, Apajuí chichame antuktajum! 
Tuke Pujuu chichagtamak: “Atumi apachjum aajaku aina dusha ¿waji utugchatan waitjukajaya minash tupanjujush ainawa? Dakumka najanamu pegkegchaun emematu yujau asag, ditashkam nuninuk wajasajui. 
Nunidau asag, dita apachji aidau Egipto nugkanum batsatun jiija yajuakan, uwejush yumi atsau, muja yumpunjau aidau, ishamain aents aidaush pujumainchau, makichkish nagkaemamainchau ishamain wegajunum wi kuitamsan emauwaitag nunak aneetsuk pachitkachajui. 
Wi atumnak juju nugka pegkeja juwi ajakmawag yuwatnume tusan ikaunmawaitjime. Tujash atum kaunajum mina nugkag pegkeg ayá nunú emesjauwaitjume. Nuadui mina nugkag pegkeg ayá duka tsumain awajsaugme. 
Sacerdote aidaush mina pachittsag inimsachu ainawai; tuja mina chichamjun jintinkagtin aidaush makichkish waitkachaju ainawai, apu aidaush pegkegchaun takamjuttsau ainawai, tuja mina profetag aidaushkam Baalan etsegtuinak, mina chichamjunak etsegkachu ainawai. Nunidau asag dakumka najanamu aidaun wainak emematujaku ainawai. 
Nuadui atumnak, atumi uchijum aidaun, tijajum aidaujaí suwimkan jukitnume tusan umigkattajime. Nunak wi Tuke Pujuun dekas umiktinjun tajai. 
“Etsa akaetaiya nuni nayantsa ajuntaijin yaakat ayá nuwi wetajum, nuniakjum Quedar nugkanum aents awematajum. Dutikajum inimsatajum 
tikich aents dakumka najanamun emematin aina dusha, atum wajukeajum ankampash nuna idayinak, tikichin nemaju yujau aina. Nunú aents aidauk wainka apajuímtai dakumka najanamun pegkegchaun emematin ainayatkush, yapa yapajiakuag wechau ainawai. Tujash mina aentsug aina duka dakumka najanamu aidaun yujajak, dekas wi Tuke Pujuu senchigtinaitag nunak idaitusaje. 
Nugka múunta duka nuna antuk puyatuk ishamak senchi kujawai. Witjai Tuke Pujuunuk. Nunak dekas tajai” tiuwai. 
“Mina aentsug aidauk jimajan tudaun takamsaje: Yumi pukuni pujutan sukagtina duka witjai, nuniaig mina kajimatjukiag idaitusaje. Nuninak yumi aimtain chigkaejaun tikichin umikaje.” 
“Israel aents aidauk wainka inaku waitkataig ainatsui, Israel aents aidauk inaku waitkatai atinuk akiinachajui. Tujash ¿wagka imatika waitkamash ainawa? 
¿Wagka imatikash leónjai betek jetenakush senchish untsumainawa? Dita nugkega duka yaaktaji aidau apegkam pegkegchau wajas bashiak awai. Nuwi pujauk makichkish atsawai. 
Menfisnumia suntag aidau, Tafnesnumia aidaujai buukmin tsaigtamjaje. 
Nunak wi Tuke Pujuu atumi Apajuíjum asan, kuitamka itamaitkujum mina kajimatjukiu asajum dutikam asaugme. 
Tuja yamaish atumesh ¿waji wakegakjumea egiptunmaya suntag aidau asirianmaya aidaujai atujatkatajum tusa ditajai chicham umikmi tusagmesh tajume? 
Atumek intimkiu, pegkegchau takamin ainajum duwi dekas nunin ainagme tama ajume. Nuadui mina umigtichagtaish, waji utugchatak miniawa nunú wainkajum dekaskeapi titajum. Witjai apu Tuke Pujuu ashí senchigtinnuk, nunak dekas tajai. 
Yaunchuk nagkamsajum wijai shiwagmagajum, mina umigtut dakitakjum: ‘Apajuí umigtak dakitaji’, tiuwaitjume. Tau asajum, mina umigtutsuk dakumka najanamu aidau nain aidaunum emematkujum, numi kampuja aidau wakentin nuwa akika dutiktaijai betek wajasjum, pegkegchau takama yujayugme. 
Wi atumnak uva numiji dekas shiig pegkeg etejamu juki ajamaina iman amainun waji ajataitkuish ajauwaitjime. Tujash ¿wagka imanikjumesh pegkegchaush wajasugme? ¡Imaniku asagmin wainkatag takunush waintsujime! 
Lejiajai nijamakjumesh, tuja jabón pegkeg aidaujai atum wakegamu nijamakjumesh, atumi pegkegchaujum makichkish esakaumaitsugme. Witjai Tuke Pujuunuk, nunak dekas tajai. 
Ibau pegkegchau ainayatkugmesh ¿wajukeakjumea iik pegkegchauk takatsji, tuja dakumka najanamu aina dushakam emamatuinatsji tajume? Nijah, nugka Ben-hinom aajakua nuwi wakeen pujusjumesh wajukin ayugme nunú adeagtajum, nunikjum dekaskeapi titajum. Atumek camello numpajak emetnag pujuschamin wajama nujai betek ainagme. 
Atumek burro numpajak aishmag entsamjutkati tusa egak, dase dasentai mejea, mejea, mejea wajak tupikaki ikam akumkuig, makichkish emetmaitsu nujai betek wajagme. Imaniau asamtai, aishmag egakug yupichuch igkuinai. 
¡Israel aents aidauwah, sapatjinchau tupika yujasjum dawem ichiajaigpa, kitakai jinawaigpa! tusa tamash, atum chichaakjum: Atsa, duka makichkish nunikchattawai, iik tikich aents aidau dakumkamun emematin aina nunú emematmi tusa wakegau asa, ditajai shimaji tusajum shimutjume. 
Atumek kasa kasamkatatus wekagu wainkam datsaamama numamtuk, atumi apujum aidaujai, sacerdote aidaujai, profeta aidaujai ashí datsagtatjume. 
Atumek numi chichagkujum: ‘Ametme iina apajimek’, tajume. Tuja kaya chichagkujum: ‘Ametme iina dukujig’, tajume. Tujash atumek minak diigtsuk tuntupmatjagme. Nuniayatkujum ishamainnum jegakjumek: ‘¡Ayamkagtukta!’ tusajum segatjume. 
Tuja atum aidautijum atumek dakumka najanamu apajuíma yujaujum dusha ¿wajukawaje? Atumi apajuímtai aidauk yaakat kuashta iman ainawai. Nunú aidau kaunawag atum ishamain igkuagminish ayamjutpaktinme. 
¡Atumek minak tuke intimjutin ainagme! Nunin asajum minak wainkagmek pegkegchauk chichagtumaitsugme. Witjai Tuke Pujuunuk, nunak dekas tajai. 
Atumi uchijum aidauk suwimak suwakuish wainka dutikmainai, wagki imanik suwimka juinakush makichkish unuimainatsui. Atumek león kajeaujai betek mina profetag aidau ijinawaitjume. 
Tuja atum yamai uchi aidautigmeshkam Tuke Pujuu chichame antuktajum. Wika uwejush nimpain asamtai, waittayama dutikankesh waitkachuitjime, tuja waa suwenum pujusa waittayama dutikankesh waitkachuitjime. Dutika waitkashtayaitkugmesh ¿wagka iik agkan batsatji, nuniau asa ataktuk aminak emematchattagme tusagmesh tujutjume? 
Nuwa aishinatnuk jáanch aishinku nugkutainak patakumtai aidaujaig makichkish kajimatbaitsui. Tujash mina aentsug aidauk yaunchuk minak kajimatjukiaje. 
¡Amek pakijintai aina nuanuig shiig yachaitme! Iman asamin nuwa akika dutiktai aina duka aminiyan unuimainawai. 
Amina jáanchjum aidauk aents pegkegchaun takachu aina nuna numpen, ujudauch aidau numpejai maatug numpak wajasui. Makichkish takamsachu aig, tsagkugtsuk tuke aneasam mainaitme. 
Nuninaitkum datsantainkas chichaakum: ‘Wika Apajuí kajegtukti tusanuk pegkegchaunak takamtsujai’, tame. Ayu kame takamtsujai tusa imatu asamin, nuna dekajuatasan apu chichama inagdau aina nuwi ematjame. 
¿Wagka tujash atuniktinjum egaakmesh imanikmesh waugtame? Auk Asiria nugkanmaya aidau idaitamsa antsag Egipto nugkanmayashkam idaitamsattawai. 
Mina kumpag ainawai tame nunak wi dakitjan idaisajai. Nuadui amek egiptunmaya aidaujai atunikan maaniatjai tukamam depetamkagmatai, datsaaja wake besekam wakitkittame. ¡Amina kumpajum ainakush makichkish yaimpakchagtatui! tujamui Tuke Pujuu”, tiuwai Jeremías.