Jeremías.
15.
Tuke Pujuu chichagtak: “Juju aents aina nunú wait anenjata tusa Moisés, Samueljai segatainakuish, wika juju aents aina nunak wait anenmaitsujai. Jiinag shiyaktinme tujamui tusam ujakta, dutikam jiinag shiyaktinme. 
Tuja tuwi shiyaktatji tusa inimpainakuig ame ayaakum: “ ‘Nii jatai jakati tibauk nunisag jakati; tuja nii maaniamunum jakatnuk nunisag maaniamunum jakati; untsu nujantai jakatnuk dushakam nunisag nujantai jakati; tuja achija yajuakam yujas waittsatnuk nunisag waittsatnume’. 
“Wi ditanak ipak usumta imajin suwimkan ishitkattajai. Tuja duka juju ainawai: Maaniamunum jinawagtinai, nunikmatai yawá aidau esainiag japisa yujagtatui, chuwag amukagtinai, dutikawagmatai kuntin kajen aidau, shiig amutan amukagtinai. 
Nunak Ezequíasa uchiji Manasésa pegkegchaujin dutikattajai. Wika nunú Judá apuji wajas pujusa Jerusalégnum wajina dutikauwaita nunak kajimattsujai. Nuna antukag nugka múun aidaun apuji aidau senchi ishamkagtatui. Nunak dekas nuniktinun tajai. 
“¿Jerusalégkah, aminash yaki wait anenjamjainta? ¿Yaki amina anempakush buutti? ¿Yaki aminash jamamtuchu pujusti tusash puyatjutpakti? 
Atumek mina idaitusjum pegkegchau takagtusugme. Nuniakjuminish wait anentau asan tsawanta ewae ewaekawan yawegjai, nuniku asan yamaik ijinattajime. 
Jerusalégkah, aminí aents batsata nunak chijichin dase umpui utsauwama numamtuk yaakta ukumtikin utsagtatjai. Mina aentsug aidauk mina umigtukchaju asag uchigtuchu juwakaje. Wi ditanak mina umigtukchaju asagmatai ijinawagjai. 
Dutika ai nayantsa kamatkaji kuashta nuna nagkagas nuwa aidauk shiig kuashat wajemeakagtinai. ¡Etsash etsantaig nuwa aidaunak dita uchiji datsa aidaujai ijinattajai! Makichkish nuniktatuapi tachamunum pachiachbau ishamainun ajunjagtatjai. 
Nuwa kuashat uchigtin aidauk wampainag iyajag nunisag jagtinai. Nunikag datsan dushikiam agtinai, Tuja etsa pegkeg etsantug au suwe wajastinai. Makichik aentskesh iwaku pujaunak tikich aents aidau maatnume tusan idaisattajai. Nunak dekas nuniktinun tajai”, tiuwai Tuke Pujuu. 
“¡Chah, dukuwa wika senchi anentaimkun waitiajai! ¡Wika akiinmainchaunas akiinawamiagtai! Wika makichik aentsnakesh pegkegchauk awagmachuitjai, tujash minak ashí pegkegchaun chichagtuinawai, dutijuinak shiwagmatuinakui ditajai maaniajai. 
Wi ame inatjamun umikchau ataik, tuja dita pachisnush amijai chichaschau ataik, dita tujutuina duka betek uminkati. ¡Tujash mina shiwag aidau waituinakui, nuna yaigti tusan wi amina segajam duka amek dekame! 
Tuke Pujuu aents aidaun chichajak: Suntag asirianmaya, babilonianmaya aina nuna depetmainuk atsawai. 
Israel aents aidautigmek ashí tunamakugme, nuniku asagmin atumi tagkujum aidau, wajijum aidau, tuja atumi nugkemin ayá nunashkam atumi shiwajumin ashí susattajai. 
Wika shiig senchi kajekjai, nuniku asan, jiijai betek apeattajime. Atumi shiwaajum aidau achipag tikich nugka atumi wainchataijin yajupakag, dita inainak waitkastinme tusan idaisattajime”, tiuwai Tuke Pujuu. 
Jeremías Tuke Pujuun aujak: “Tuke Pujuuwah, amek ashí dekame, wika amina takaju asan maatag tama ajai, minash kajimatjutsuk yainkata. ¡Tuke Pujuuwah, mina mantuatag tuina duka ayatak dii pujugtsuk eke mina mantuinatsaig, suwimak susam ijinata! 
Tuke Pujuu ashí senchigtinuh, ame mina aujtuyum nunak wika puyatjusan antuyajai. ¡Wika aminuitag duwi amina chichamjumin antakun shiig aneyajai! 
Wika aents pegkegchau takatnak yujajin aina nujai ijunja wekaetanak idaisajai. Aminu etiuwaitam duwi nagkamsan wika wiki pujajai, tuja pegkegchau takat ame kajejam nunak wishakam kajejajai. 
¿Wagka tujash imaniknush waitush pujaja? ¿Wagka wi imanikan waitiag dusha megkaemainchauwaita? Niimpap yainkattawa timajai, tujash idaitusume, amek yumi pukuni jiinu kuyua buku wegama numamtin wajasume”, tiabiajai. 
Tusa ti ai Tuke Pujuu aijak: “Nunú anin wainka tuu wekaetsuk, awake anentaimjam minai minakminig, mina chichamjun etsegtujin ati tusan yaigtatjame. Dutika ai ame mina profetag atatme. Amek ditaig waketmaitsume, auk dita aminí minimain ainawai. 
Juju aents aina nuna emtinig wi aminak yaakat broncejai peejamua iman awajsattajame. Amina shiwaajum aidau jetepainakush depetamkachagtatui, wi aminak ayamjukan uwemtijattagme. Witjai Tuke Pujuunuk, nunak dekas dutikatin asan tajai. 
Aents pegkegchau aidau mantamatag tuinakuish, wi ayamjukan uwemtikjattagme; tuja magkagtin aidau mantamatag tuinakuish, wi uwemtikjattagme”, tiuwai.