Oseas.
6.
Nuna antukag Israel aents aidau chichainak: “Kaunatajum ataktu wakitki Tuke Pujuu umigkagmi, nii kajegtamak suwimkan amasu akush, nigki wait anenjamag tsagkugtamjattawai. 
Jakaujai betek batsatag nunak jimag tsawan asa, nuniachkush kampatum tsawan asa, inantamkimtai niijai ijutkau atatji. 
¡Tuke Pujuu umigtanum kakanmamsagmi! Imaniajinig etsa kashi kashinig jiina numamtuk, tuja numi yagkujutnum yumi yutak nugka uchupiama imanis iina yaimpaktatus tajutjamattawai”, tuidau. 
Tusa tiagtai Apajuí ditan ayaak: “Israel aents aidauwah, Judá wegantu aidauwah, ¿itugkainjimki atumnash? Atum mina aneagme tujutjum duka yujagkim kashi kakegak, tuja jegashik kashi kakekau, tsawak kashikmas megkagama numamtuk atumi anenkeg megkaewai. 
Nuadui, wi mina profetag aidaun akatja ishiaka ai, yujasag dita mina chichamjun etsejuinamu chaajip iyaak tsaimaina imatijamawaje, wi shiig takamua duka jii keeka tsaaptin emaama imanai. 
Atum mina anentag sujajum nunak wika dakitajai, tuja mina emematjakjum kuntin maajum nuna neje ashí apeajum nunashkam dakitajai. Wika ayatak mina anentinme, nuninak: ¡Ametme iina Apajuíjimek! tujuttinme tusan wakegajai. 
Tujash mina aentsug aidautigmek, Adágjai betek antakchau intimkiu ainagme, nuadui chicham umiktinun wi amasuitag nunú umikchaugme. 
Yaakat Galaadnumak ayatak pegkegchau aidauk magkagtin aidaujai batsatui. 
Sacerdote aidauk jinta Siquemnum wetaya nuwi kasajai betek uuma yujawai, aents nuni wedaun mainak wajijin atankiagtatus. 
Tuja Israel aents aidauk nuna nagkaesau pegkegchau Apajuín umigchau intimkiu aidaun wainkajai. 
Tuja Judá wegantu aidautigmeshkam pegkegmauchik ainatsjume, nuadui atumshakam suwimak jukittagme. “Nunú ashí nagkaemagmatai, mina aentsug aidaunak dita nugken waketjati titinaitjai.”