Oseas.
11.
“Israel aents aidaunak tsakatuch ainaig nagkamsan aneen ayajai, wi ditanak mina uchig asagmatai, Egipto nugkanum batsatun jiijuitjai. 
Dutikamaitak mina umigtutan dakituinak nuni senchi tupanjuyanume, nuninak wainka apajuímtai aidaun emematuinak kuntinun maa apeenak, kugkuin inciensonashkam apeeyanume. 
Nunin ainaig wi ditan aneau asan uchijai betek jukin egkesan emayajai, dutikakun wekaetanash jintintuawabiajai, yutainash ayujiajai, utugchatnumash yaigkabiajai. Imatiksa kuitamaitak, Apajuíyap kuitamjamua tichau ainawai. 
Nunidau asag mina umigtutnak dakitjau ainawai. Nuadui egiptunmaya aents aidau inainak waitkajaku aina nunak, yamaik asirianmaya ditanak inainak waitkasagtatui. 
Dita yaaktaji aidaunak tsaigkagtinai, dutikainak aents aidaunashkam ijinawagtinai, nuna dutikainak dita anentaimjamujinak ashí idaimitkasagtinai. 
Mina aentsug aidauk, wainka apajuímtai aidaun emematuinak mina umigtutnak dakituinawai. Nunidau asag mina idaitusag batsata nunisag batsamsatatus wakegainawai. Senchi untsumainawai, tujash makichkish ditan yayauk atsawai. 
“¡Israel aents aidauwah, wika atumi aneakun shiig senchi waitiajai, nuadui wika kajimatkinuk idaimaitsujime! ¡Wika Admánmaya aents aidaun, Seboímnumia aents aidaujai dita pegkegchaujin ijinauwaitag imatikanuk tikima ijinmaitsujime! 
Wika atumnak kajekbautkek suwimkanak amaschagtatjai, Tuja Efraín wegantu aidaunak ataktuk ijinashtinaitjai, wagki wika aentschauwaitjai, wika Apajuíyaitjai. Witjai Tuke Pujuu pegkegmanuk, wika atumjai ijutkau pujajai, wika atumin ijinatasanuk tachmajai.”