Oseas.
14.
Oseas Israel aents aidaun chichajak: “Israel aents aidauwah, atumi pegkegchaujum wagagtamkimtai, kakaumainchau wajasjum batsatjum nunú idaikujum ataktu atumi Apajuíjum, Tuke Pujuuwai minitajum. Nuniakum juju aatsajum Apajuí segatajum: ‘Apajuíjuh, amek pegkejaitme, nuadui wait aneasam iina tudaujish tsagkugkagtugta, dutikawamin ii ame emematku kantabauwa nunú amina shiig awajtamkati. 
Asirianmaya aidauk carrogtin ainakush, iinak ayamjutpamainchau ainawai, nunin asamtai ataktu awagkik ii dakumka najanamu aidauk emematchattaji. Bitaikshakam ima aminiyanak anenkanak wainainawai’ titajum”, tiuwai. 
Tuke Pujuu Israel aents aidaun chichajak: “Wi kajekbaugnak mijaakjai, nuniku asan dita pegkegchau ainaigkish, mina anenkajun iwaintukagtatjai, dutika ai nuigtuk intimkichagtatui. 
Israel aents aidaunmak wika jegashkijai betek atatjai. Tuja dita aidauk Lirio yagkujuwama iman, Líbanonmaya setug shiig kagkapenag wajama iman agtatui. 
Tuja kanaweshkam olivo kanawejai betek kadaukdauju pegkejuch, Líbanonmaya setug pegkegchin kugkuwama iman agtatui. 
Israel aents aidauk ataktu wi kuitamkam batsamsagtinai; dutikamu asa trigojai betek tsakajagtinai, nuninak uva yagkujuwama imaniagtinai, kugkuntishkam muja Líbanonmaya vinon kugkuntijai betek atinai. 
Tuja Efraín nugkanmaya aidau chichainak: ‘Dakumka najanamu aina duka iik makichkish puyatjatsji’, tiagtinai. Witjai mina aentsug aidau segatuinakui antujunuk, witjai mina aentsug aidaun kuitamunuk. Wika pino pegkeg samekbau tuke kukachua imanaitjai, minai pegkeg waji aidaunak jukiagtinai”, tawai. 
Aents yacha shiig anentaimkau akug, juna chichaman antukti: Tuke Pujuu dutikamu aina duka shiig pegkejai, nuadui dita aidaun diisag tikich aidaush pegkeg takata nunak takamain ainawai. Tuja aents pegkegchau aina duka pegkegchaunak takainawai, nuadui Apajuí ditanak suwimkan suwawai.