Miqueas.
2.
Aents pegkegchau aina nunak wait anentuinajai, wagki ditak depetmak batsatu asag, ememainak wajina pegkegchaun takastag tuinawa nunak kaja kajanmaske uminawai. Nuadui nantaamuik nunak betek dutikainawai. 
Tuja nugkan wakegainakug tikichi nugken atantuinawai, tuja jega aidaun wakegainakushkam, tikichdaun atainiag juwinawai. Dutikainak jennunak niina nuwe, uchiji aidaujai tsanujag jiiki ajapawag waitkainawai. 
Nuadui Tuke Pujuu chichaak: “Wishakam atum suwimak jukitnunak chichaman umikjai. Suwimak katsunmainchaun amastatjime, nuna uwemtumainuk makichkish atsuttawai. Suwimak ishamain katsunmainchau asamtai, emema yuja nunak nunikchagtatui. 
Nunú tsawantin aents aidau dushiktamiagtinai, nuninak juna aatus kantamjutpainak: ‘¡Ashí depetkam wainak juwakaje! ¡Yaunchkek Apajuí aentsji ayanume, tujash nunak idaisaje! ¡Iina suntaji aidau depetkagmatai, dita nugke aidauk ii akandaija yajuakji!’ tiagtinai. 
¡Israel aents aidautijum antuktajum! Atumek mina aentsug ayugme, tujash wika nugkanak ataktuk amaschagtatjai”, tujamui. 
“¡Atum waita etsejin aidautigmek Apajuí profetaji chicham pegkegchaun ujatkai!” tusajum dakitagme. Atumek utugchat ajutjamu dekakjumesh, dekaskeapi tatsugme. Nuadui profeta etsegbau antutak dakitagme. Nuniakjum: “Apajuík jutijaig shiwagchauwai, Apajuík jutiinak kajegtamkash idaitamtsuk atsane pujuttawai, nuigtush Apajuík aajag dutikchauwai, Apajuík ashí aents aidau pegkejan takaidaunak shiig kuitamnai”, tajume. 
Atumek mina aentsug aidaujai shiwagmaejume. Tuja maaniamunum shiyaku aidau uwemjajiapi tusag shiig aneas waketug minidaushkam, jáanch akik aidaun yajuak minidau atanjume. 
Dutikakjum dita jee aneetaiji aidaushkam atum atankujum nuwa aidau jiiki ajapeagme. Dita uchiji aidaun wi susauwaitag dushakam tuke jujuki emegkatjume. 
Nuadui atumek ¡juwi batsamtsuk, jiinja shiyaktajum! Juwig dita wakegamun takainak batsamsatnume tichamui, tuja atum pegkegchau awajsau asagmin, juka ashí tsainkattawai. 
Makichik aents nigki nagkami waitjak: “Vino senchi kajiau umamuk pegkejai, tuja tikich uwaja nampetai aina dushakam pegkejai”, tawa nunú atumek dekas profeta pegkejai tajume. 
Israel aents aidau ujumchik iwaku batsatunak yajuakan, uwig makichik wenuknumak ijumaina numamtuk ijumjattajai. Dutika ai shiig aneenak, kuashtachuitak, kuashat pampaumaina imatiagtinai. 
Apajuí eemak jinta jintama wetinai, nunitai dita pataekagtinai, yaakta waitijiya nuni jiinjagtinai. Nunikagmatai dita apuji Tuke Pujuu eemak wetinai.