Wakʉ Itekare: Emenna' Pe Ekonekan Nɨto' ISENPOIKASA' 1

Isenpoikasa' Rʉ'pʉ

Isaan Ena'

Ekamanin

Isenpoikasa' Rʉ'pʉ Isaan Ena' e'menuka'pʉ Kʉri'san amʉ' kota'ma a'tai, apʉne pʉra Sises Kʉrai apurɨ to' uya wenai Itepuru pe. Imenukanin e'ku'to' ipɨ' kuru esi'pʉ tʉnmenuka'pʉ ennin nan repato' pe tʉuya to' e'ku'to' ike ke, mɨrɨ awonsi'kɨ to' epori'mapɨ'to' ike ke, mɨrɨ awonsi'kɨ ɨsɨ moronkato' to' uya yau, tʉkota'mato' kon yau to' e'to' pe te'nonkai' pʉra.

Eke pe kuru kareta yau tu'ke kuru isenpoikasa' ton mɨrɨ awonsi'kɨ en uta'kwakasa' nene'pʉ ton usekama ento' ipɨkɨron main yau, mɨrɨ a'taino kon Kʉri'san amʉ' nʉto'ka'nʉkʉnʉ pe, e'tane tʉron kon nʉto'ka'nʉkʉnʉ pe pʉra rɨ nin si iye'nonkasa'. Eren esi tese' ke'ne kasa, serɨ kareta yawo'nan itese' ton utakonomapɨtʉ ti'tui' pʉra tu'kan winɨ rɨ en uta'kwakasa' nene'san winɨ rɨ. Ɨsi'tai rɨ eseru wannɨ e'tane serɨ kareta yawon enpoikato' yai, itesa' ese' esi tensen pe kuru rɨ: Kʉrai, Itepuru poro, Papa uya tanporo teyaton non ma'tanʉ'to' oton ipʉra rɨ, Se'tan pokon pe rɨ, mɨrɨpan uya tʉmaimu awɨron kon tʉmunkɨ ton e'mato' oton emenna' Epʉn ke mɨrɨ awonsi'kɨ emenna' non ke to' entai tena to' enuka'nʉ'sa' tʉuya a'tai.

Iyawon Ekamanin

Ekamanin (1:1-8)

En uta'kwaka, uta'koka, enno'pɨ'sa' kareta 7 pan so'si ena' (1:9—3:22)

Kareta amon 7 kaisaron a'si'to' esa' (4:1—8:1)

7 kaisaron wai, tʉronpi' itese' (8:2—11:19)

Urupere mɨrɨ awonsi'kɨ asa'ron kon ene amʉ' (12:1—13:18)

Ɨsi'taino en uta'kwakasa' nene'pʉ (14:1—15:8)

7 kaisaron pʉsau Papa sakorooi euku yen ton (16:1-21)

Paperan uma'ta, Ene wɨnɨ, ennakanin pu'kena', Makoi (17:1—20:10)

Iu'matʉ a'taino eseru aimenkato' (20:11-15)

Emenna' Epʉn, emenna' non, emenna' Surusiran (21:1—22:5)

Iu'ma'sa' (22:6-21)

Ekamanin

1 Serɨ kareta esi Sises Kʉrai nenpoika'pʉ, Papa nʉtʉrʉ'pʉ itena', tʉpoitorʉ ton auro'kato' pe iya serɨ pe'ne kuru te'ku'sen pɨ'. Kʉrai uya serɨ ton enpoika'pʉ tʉpoitorʉ Isaan ena', tinserʉʉi tenno'se ipiya'. 2 Tanporo Isaan uya tʉnene'pʉ menukasa', serɨ si inmenuka'pʉ Papa maimu mɨrɨ awonsi'kɨ i'napairon Sises Kʉrai nenpoika'pʉ. 3 Pori' pe kuru kʉrɨ rɨ imenu ennin pe na'ne' esi mɨrɨ, mɨrɨ awonsi'kɨ kamoro nɨrɨ serɨ te'ku'ton ekamanin main etanin nan mɨrɨ awonsi'kɨ anʉnnin nan serɨ kareta yau iye'menukasa' na'ne', apʉne pʉra a'ko pe iye'ku'to' weyu esi pɨ'.

Miyarɨ Tato' 7 Kaisaron So'si Pɨ'

4 Isaan winɨpaino, 7 kaisaron so'si amʉ' Eisa po te'san enakan. Wakʉ nonkasa' mɨrɨ awonsi'kɨ tʉusewankamai' pʉra e'nɨto' nesii ɨpiyau'nokon, moro te'sen, moro iye'sa' rʉ'pʉ mɨrɨ awonsi'kɨ tʉuye'ton winɨpaino, mɨrɨ awonsi'kɨ 7 kaisaron kon iya'kwarʉ amʉ'* iyapon rau te'san winɨpaino, 5 mɨrɨ awonsi'kɨ Sises Kʉrai winɨpaino, i'napai rɨ kuru ekamanin, wapiya kuru iyentusa' rʉ'pʉ e'mʉ'sa'kasa' rʉ'pʉ eri'nɨto' yapai, mɨrɨpan esi non pon kon kin amʉ' epuru pe.

Tɨwɨ ui'nʉnkanin kon, mɨrɨ awonsi'kɨ umo'kanin kon umakooi kon yapai tʉmʉnʉ ke, 6 mɨrɨpan uya use'man nɨto' tʉrawasomanin nan pe uku'sa' kon Papa itese' pɨ' te'to' mɨrɨ awonsi'kɨ tʉkʉipʉnʉ, apiyo' pe e'nɨto' pe—tɨwɨ Sises Kʉrai ku'to' eke pe mɨrɨ awonsi'kɨ meruntɨ pe iye'to' nesii, itiwano' pe inke rɨ! Amen.

7 Entɨ'! Kapuru' yau iyepʉ!

Tanporon kon uya rɨ ento' oton,

apurupɨ'nin nʉ'san pokon pe rɨ.

Tanporon kon non po te'san ka'pon amʉ' ukaranto' oton tʉuta'kwarʉkai' iwenai.

Mɨrɨ kasa iye'to' oton! Amen.

8 “Urɨ kʉrɨ rɨ Arʉ'pa mɨrɨ awonsi'kɨ Omeka,” ta Itepuru Papa Meruntɨ pe kuru te'sen ye' uya, “moro te'sen, moro iye'sa' rʉ'pʉ mɨrɨ awonsi'kɨ tʉuye'ton,” uya ta.

Ka'pon, Papa Winon Waraino

9 Isaan urɨ, ɨrui kon, Sises a'kɨrɨ esi koro'tau ɨtonpa kon pe esi serɨ ɨsɨ a'kʉre'tɨ pɨ', esa' wannɨ pe iye'to' yawon kon pe te'san neporonʉ, opa'wʉ Pa'tʉmos itese' po inonkasa' pe esi'pʉ Papa maimu mɨrɨ awonsi'kɨ i'napairon Sises nenpoika'pʉ ekama uya pɨ'. 10 Itepuru weyu a'tai, Ita'kwarʉ yau esi'pʉ, mɨrɨ yau eke main tʉronpi' maimu waraino eta'pʉ uya uya'poi winɨ. 11 “Menyai'ne' imenuka' kareta pɨ', mɨrɨ awonsi'kɨ menno'pɨtʉi' 7 kaisaron so'si ya'ne E'pe'sas pona, Simerʉna pona, Porʉkaman pona, Taya'tira pona, Sarʉtes pona, Piraterʉ'piya pona, mɨrɨ awonsi'kɨ Irawote'siya pona,” tawon.

12 Era'tɨ'pʉ ɨnʉ' uya uyauro'ka tukai' ense'na. Era'tɨsa' a'tai, 7 kaisaron korʉ pun konekasa' raan'pu apon ton ene'pʉ uya. 13 Mɨrɨ ton koro'tau ka'pon, Papa winon waraino ene'pʉ uya, ipon esi'pʉ i'ta pʉ'kʉ pona mɨrɨ awonsi'kɨ korʉ pun konekasa' pe iyawoino esi'pʉ.† 14 I'pai i'po' esi'pʉ aimu'ne karimeru i'po' kasa mɨrɨ pe pʉra sino tato' kasa, mɨrɨ awonsi'kɨ itenu amʉ' e'werouwerouma'pʉ apo' kasa. 15 I'ta amʉ' esi'pʉ karukuri epo'tɨ urentasa' kasa, mɨrɨ awonsi'kɨ tuna ena kasa imaimu useta'pʉ. 16 7 kaisaron kon sirikɨ amʉ' a'sisa' iya esi'pʉ temiyatʉ enwo'netʉ winɨ, mɨrɨ awonsi'kɨ iyɨkena', ɨsi'ratoi pokon iyɨ supara epa'ka'pʉ inta yapai. Itemʉ' esi'pʉ a'kwa pe kuru rɨ wʉi enu esi a'ne' pe a'taino kasa.

17 Ensa' uya a'tai, i'ta piyau uta'mo'ka'pʉ eke' kasa. Mɨrɨpan uya temiyatʉ enwo'netʉ ke uya'pɨtʉ'pʉ, “Kenari'nʉmʉi. Urɨ kʉrɨ rɨ Wapiyaro', mɨrɨ awonsi'kɨ Iu'matʉ. 18 Nurɨne e'ai'; iyeri'sa' rʉ'pʉ urɨ e'tane, nurɨne e'ai' inkero', inkero' pe rɨ! Ekota'man pata'se' mɨrɨ awonsi'kɨ eri'nɨto' kii esa' pe e'ai'.

19 “Imenukakɨ, ɨnene'pʉ, serɨ pe na'ne' mɨrɨ awonsi'kɨ serɨ tʉpo te'ku'ton. 20 Serɨ si ama'aino ekamanin, 7 kaisaron kon sirikɨ amʉ' uyemiyatʉ enwo'netʉ yau na'ne' nan mɨrɨ awonsi'kɨ 7 kaisaron korʉ pun konekasa' raan'pu apon ton: Kamoro 7 kaisaron kon sirikɨ amʉ' esi 7 kaisaron so'si inserʉʉi amʉ'‡ mɨrɨ awonsi'kɨ 7 kaisaron raan'pu apon ton esi 7 kaisaron so'si amʉ' ekamanin pe.

*1:4 7 kaisaron kon iya'kwarʉ amʉ'; mɨrɨ pe pʉra, 7 pe iku'nin a'kwarʉ.

1:4 E'sotas 3:14; Isenpoikasa' 4:5

1:5 Aisaya 55:4; Eren 89:27

1:6 E'sotas 19:6; Isenpoikasa' 5:10

1:7 Taniyerʉ 7:13; Sakaraya 12:10; Ma'siu 24:30; Ma' 13:26; Ʉru' 21:27; Isaan 19:34, 37; 1 Tesaroni'ka 4:17

1:8 E'sotas 3:14; Isenpoikasa' 22:13

†1:13 Taniyerʉ 7:13; 10:5.

1:15 Taniyerʉ 7:9; 10:6

1:15 Isi'kiyerʉ 1:24; 43:2; 2 Estʉras 6:17

1:17 Aisaya 44:6; 48:12; 2 Estʉras 10:30; Isenpoikasa' 2:8; 22:13

‡1:20 so'si inserʉʉi amʉ', mɨrɨ pe pʉra so'si nennokonʉ ton