1 Na tukanhu toh nmbuhathu mrokfotn kfo ptha hasohato niko be ndtn yihof href wany hasorahko, nhai nikmoh toh nmbuham yak htaruhattm. Be wanys wanyrahko. To nhai mrokfom. Na hwe twehany kanjo wany hanymo kafrohet mrokfom yo kafrohet nefm, ndroh mrokfomn kfo ptharuhanko. 2 Na tawisafwanr wom Kristen yimarhu tndh mrokfot. Bingot wom Kristen yimar, Bro Nkifrar tuhafunanimotrr yimor tu hefenrhu tu wuroh kmi mfhatn. Nd tndh mrokfot bi 14 gunyjimm yohnemom. Nd yimar tuhafunanimohat na nhai tu tawisaf marnyakaha, ka yuht thatipetr tuhafu-nanimorr o be yafotharpat fnahni yimot. Bro Nkifrarpar tawisafwor.* (12.2) Nd yimar Porr dkfo memo Kristen yimar yura hefenrhu tu wuroh kmi mfhat yimor, ndr tu Porer. 3-4 Tu Bro Nkifrarn tuhafunanimotrr yimor hefenko. Nd yimar hefenr yihato wanymor wom kafrohet mrokfom, yo wom kafrohet nefm. Na nhai tawisaf marnyakaha ka yuht thatipetr tuhafunanimorr o be yafotharpat yimot. Bro Nkifrarpar tawisafwort rorhu yi nmbuhat. Nd ror wanymo mrokfom yo htimo nefm, nhai yimam kfo ptha hikkfot yo nhai nd mrokfom yimam kfo ptha nriyaf mif mifkfot. 5 Kanga nd yimarhu yufat ayuta grha yindhorante, to nhai. Na nhai tukanhu yufat tfit yuta grha yindhorkfot. Na ndhtet yimena, be nanrpayann finji narmoyanm tamoh nefm o finji hingrnarmoyanm tamoh hingrnefm. Bro Nkifrar tohnhomotra tamoh tamoh nefm namoyanm o hingrnefm hingrnamoyanm. Ndtpno na Bro Nkifrar kfo grha yindhorwanr.

6 Nanhu tamoh tamoh mrokfom be kfo mif mifwanm. Ndnettn na kanga nanhu yufat ayuta grhayant, to nhai mrokfom, to na mrokfom kfo pthaneft nhai mmo kanjo mrokfom be tubatu-yaknikahanm. Nhai. Nanhu mrokfom dukak hanyhato kfo pthiwanm. Yo mrokfom kfo mif mifruhanm. To na, na nhai wofnkaha na Bro Nkifrar tuhafunanimo yuhathu mrokfomn yimam wanyhato be nd mrokfotn rim rhuta mrhutahato nann yimam bro yufat htaneft. Nhai. Na nikompno tohhato namo nefm yo pthamo mrokfom dukakkfot. Nd tkittn htirahn, na tamohtet yimaya.

7 Bro Nkifrar hefenrhu dborioh dborioh shrkar fak nuhasmora yo dborioh dborioh mrokfom kfo nuhas-mora. To Bro Nkifrar nhai wofnkahr na kfo grha yindhor manyeft, “Nanrpayann Bro Nkifrar fak nuhasmor hefenrhu kafrohet shrkar yo kafrohet mrokfom. Nanrpaya yufeta.” Ndnetrn wom bro krho nmbuhat hemora. Nd krho nmbuhat huhrat washato hiyarmonwa kanjo inji yironamoa. Bro Nkifrar nd krho nmbuhat hemohat Satanr htihato memor, “Hifa nd krho nmbuha yuhatn rim tohniruha.” To be Satanr nd yuhat buha yarim tohnehato nd krho nmbuhat tfit rorn yakhato tfit rorn nd krho nmbuhaye hta karhumorr nd kfo grha yima yuhur. 8 Husfirpa kfo bruttnat kfo bruttnamoyanr Bror nd krho nmbuhathu yak thuneft. 9 Kfo bruttnamotanr nhai yak thurmort nanhu krho nmbuhat. Be kfo memora, “Nd krho nmbuhat nhai yak thurhotant. To mirahn ka nhai yuhuwafkohann. Nhai. Na yuhuwafwann. Na nhai yukatoh marsisarhotann ni ndar krho nmbuhat titewohat. Na titahiruhann.” Bror inji kfomotra na tamoh krhopam titaneft na be yindhorhato titewanm. Nanhu Kraisr tor, rorn bmtefr hnewurr. 10 Ndnettn na Kraisrhu hingrneft hingrnahany hingrna hanyhato mhingrna narhohtewan o wonk wonk kurhefenm kekwoman o yimam sinyahato rir borirwoma, nhai mrokfom. Nanhu Kraisr tor, rorn bmtefr hnewurr.

11 Nd nanhu dborioh nefroh kfo yindhor mrokfom tfit tukann kfo pthiwanm, ndm rom nikomn kfo ptharfokomm. Tamohmpno nhai nikomn kfo yindhorkahkomm na niwa dborioh nefm? Nd yimam niko kfo yamuka, “nmoh aposerm,” nd yimaroh hingrnefroh kfo yindhorneftn niko be mrhunitko. Rom hingrnewa hingrneft nhai na hingrnewa hingr-neft kanjo inji hingrnakahmt rroh hingrneft. Nhai mrokfom. Na htitkoma yima furapam kanjo. Rot htitkoma yima furapam kanjo, 12 to htimokomt na nikompno tohhato hingrnamo hingrneft? Finji tohhato hingrnamoya? Tot fak nuhasmoyanko tu aposerroh hingrnayuk hingrna yuhat. Nd wuruha aruha niayuk krhopam na tohhato titamohat ndm htimokomm, yo htimokomm na wonk wonk mirakerm na hingrnamom, yo wonk wonk nefm na hingrnahato tuhant yindars miyoh riha rmonhato Bro Nkifrarhu bbukeft htimohat. 13 Na nikompno tohmohat, na wom siosmpno tohhato nahnamoa nefm kanjo inji nikompno namoya. Wom rpa nefrpat nikompno namot, nhai wom siosmpno narmoyant. Yeshri, maruha, hmbresha nd ndroh he nmbuhatn na nhai nikomn kfo tndaukfot htarmoya. Ndrpat nndo namoya. To na inji namohate ka ufasoh beb nmbuhat namoya? Nikone yima yuhu duhateko na nayuk nefroh yak nhtaneft? Yima yuhume yaum famomko? To na fasoh neft na thombat wayafhotwakomt na nayuk beb nmbuhat.

14 Tfit bi yibon hanita nikompno namba tri taim nianeft. To ndar yaus na nia thombat nhaf nhai kfo mirhota nikomn krhopam hiruha nanhu tamoh tamohroh yak hanyeft. Nhai. Na nhai wofnkaha nikmoh tamohroh yak hutfaneft. Kanga niko yimakomn na ayak ahatoha. To mrokfot nhai kfo mekaht yonmn yeshri tamoht yak htfashato yifammam mthu wuna hasorahmm. Nhai. Yifammamn yeshrt yak htfashato yonm mhtahukmm. 15 Na nia thombat na be yindhorruha nanhu tamoh tamohroh nikmoh yak hanyeft. Na nhai wom tamohm dukarhota, niko dukahato nanhu yiham, nanhu hingrnefm, nanhu dukefm, nanhu yikia tpt nikompno htaruhant. To wahtiko, ka nanrpaya ndhtet yima yuhur nikompno hta-ruhanr, to niko nhai tawo mfro nan-pno nikmoh yima yuhum htaruhat-komm.

16 Tfit nikmoh wommn kfo kangma, “Porr nompno tafon yuhat niahato tamohm tndauneft ror nhai ndhtet neft. Rorhut to be yima mkfo yongm boyongm yo mkfo nheh bonhehhato wuskam tamohm kekwor.” 17 Niko inji kfiwatkma na duka mumiwa. Ka nd maruharoh yak nhafohyuk mrokfothu mkfo hanyuk yimam na kfo tkrurafmom, ka nikmoh yi mfrnhehhato nanhu wuskaroh yakneftn yimamn kfo tkrurafmoyan o nhai? 18 Taitusr nann kfo kasinyafmoyanr nikompno yinyeft, yo tor wom Kristen bratar rpat niamof. Ka Taitusrn wom yak brurfam yak nfhotinehato hna-morm? Nd no wiyauyauwa dukefr ka nhai tuno rpa yima yuhur rhuhato Bro Nkifrarparhu bbukeftpno wiyau-yaukahnono nhai? Niko waduka hik marnyakahkomn mrokfom wakfo pthakomm.

19 Nom ndar gontwat wandfiwohat, nom nhai duka mekahnom, “Inji inji akfokahtnom Korinm hti mirahm, ‘Ndm tu aposer mifem.’ ” Nhai. Nom nikompno wandfiwohat, niko Jisasr hikwa hik yuhathu kfo bmtayuk mrokfomn gontwat htewunomm. Nom Kraisrpno bi rim tohniyet yimanomn nom Bro Nkifrarhu nyingampno kfo mifwonomko. 20 Na wom dukefr duka yanho hanitar, kanga kfo duha yirah-nomm, tfit miruha nikmoha aneya, tfit niko nayuk nefm mhti hhrekruhanm. Mhti hhrekhato tfit miruha kfo tebos mrokfom o kfo hta mrokfom ahiyanko nhai yindhorruhatko. Na wofnkaha na rhu hanyhato niko mrokfom gijohmt kanjo nateh natehneft o womroh hifa nefmpno o womroh dborioh wuskam-pno kfo nur yuhuwehneft o tamoh mrokfom be watanhehakneft o niko tuko Kristenko nafrtndohhato rpen rpen o husen husen tohneft. Yo na wofnkaha rhu hanyhato tuko nakfo rindho borindhoneft o kfo rkmok kfo gungmiohnefm o niko tuhagrhahato sioshu nefm tfit nikomn kfo kekutneft. 21 Yo na miruha nikompno aneya, ka nia mhti yimtnaruhanm bok met yindarim nhai yima yuhum yak kekuthato mong trohrmomm turoh ijoh tone yuham, fasoh nefroh naneftn o wom mett o yindarir htihato yima yuhu tohetoh nefm. Na ndhtet nefm mhtineft na be bro duka dungunangu-nefti bro yimtneft Bro Nkifrarhu nyingampno yakruha.