1 Ingwer-ingweran artwamp Samuel angkew Saul-ew, “INGKARTel ayenh ilew, ngenh atyetyart arrerneyew ikwerenh-rnemew Israel-wenh-rnemew. Awelha angka nhenhew-anem, rarl ayenh ilew ngwamp. 2 ‘Awank-akerr, Israel-wenh-rnemarl alperlewenh Egypt-they, Amalek-areny-rnem apetyew, renh-rnem atweyew. Aleyan athanemarl renh-rnem atweyew, rernemarl alakenh-anyem apmwa mpwarew atyenh-rnemew. 3 Amalek-areny-rnem atweyew alhenh-arey! Arrtyemel ilek-ilek ikwer-rnem-wenh! Ingkerrenh atweyew ywerrelhelemel; artwernem, arelh-rnem, ampernem, pwelek-rnem, yep-yep-rnem, kamwerl-rnem, tangkey-rnem-akerr ingkerr-antey! Atyeng ingkerrenh antheyew alakenh.’ ”

4 Saul-el angka thwenew apmer arrpanenh-warl, artwa ahawarr-rnem akarrerreyew apmer anyentel Telaim-el. Akngerr akarrerrew apmer ikwer-itwew; 200,000 Israel-areny-rnem, 10,000 Judah-areny-rnem. 5 Ra renh-rnem atnwenhew apmer Amalek-areny-rnem-wenh-warl, rernemap irrtyert-aylpew atwaty-itwew, apmer ikwer-itwew arrer-antey. 6 Ikwereng-arey ingwer-rnem-then anenh apmer ikwerel, Ken-areny-rnem. Saul-el angkakert ikwer-rnem thwenew, alakenh angkeyew, “Arrantherr Ken-areny-rnem alhemer-tangkwel arnangerremel, atha ingkerr ilwerl-atheneyenh-wety Amalek-areny-rnem. Nthakenh atha arrenhantherrenh atwey-angenh, arrantherrarl Israel-wenh-rnem alpemelew, arrwekeleny-rnem awank-akerrarl alperlewenh Egypt-they.” Ken-areny-rnem alhew-tangkwel apmer ikwer-they arnangerremel.

7 Saul-el artwa ikwerenh-rnem-akertel alwernew Amalek-areny-rnem apmer Havilah-they apmer Shur-ew-atety, akngerrakw-ampeny Egypt-they. 8 Saul-wenh-rnemel ipmew atwew artwa, arelh, ampa ingkerrenh-antey. Atyetyart Amalek-arenyan itnan Agag rernem atwey-angenh, arrangkwarl. 9 Itetharl renh atnyenew. Atnwenth mwerr-rnem-then iteth atnyenew; yep-yep, pwelek, akwerrk-rnem-then ikwer-rnem-wenh. Atnwenth apmwernemant rernem ipmew atwew. Ingkerrenh ipmew atwey-angenh-antey, arrangkw. Rernem awelhey-angenh, INGKARTelarl Saul ilew-angkwarr.

10 Ikwerel-antey INGKARTel artwamp Samuel ilew, 11 “Saul-an atyeng awelhey-angenh. Intwemelerrew atyeng-wety. Ayengan amperrngerreyel, atharl renh atyetyart arrernew.” Samuel-el awew, rap arlka apmwerrew. Ankwakel ra artnemel angkew INGKARTew.

12 Ingwepenh-antey Samuel akwentew, alhew-anem, Saul-ew nthweyew. Ingwerentyel renh iley-ayntew, “Arrangkw nhenh. Saul ra alhew apwert Carmel-warl. Apwert ikwer-itwew apwert arlpenty-anem ra rnkernew, ingkerrel iterl-araynteyew, rantarl Amalek-areny-rnem ywerrelhelemel atwew. Ikwer-penh ra alhew apmer Gilgal-warl-anem.”

13 Samuel-elarl renh arey-alhew, Saul angkew, “Samuel-ay! INGKARTel ngenh irrngerney-anthemer! Atha kel-antey mpwarew, rarl ilanthew-angkwarr!”

14 Samuel angkew, “Ntwa ilek-ilek ingkerr ywerrelhelemel atwey-angenh! Aleyan atha aweyel, yep-yep-rnem pwelek-rnem-then artneyelarl!”

15 Saul-el tyernew, “Artwa ahawarr-rnemel, rernemarl alakenhan mpwarew! Rernem atnwenth mwerr-rnem inew Amalek-areny-rnem-wenh. Iteth-antey rernem atnyenew, ntwaw arrtyaynteyew INGKARTew. Ingwer-rneman anantherr ipmewarl atwew.”

16 Samuel-el renh akeleytelew. “Akeleyt awelha atyeng-tangkwel! Atha ngenh ileyew, INGKARTarl atyeng angkew-angkwarr ingwel.”

“Ya, ila ayenh.”

17 “Akely-tangkwel nga ilelhew. Nga ilkwa aneyew arrkernelhey-angenh. INGKARTel ngenh ilkwarl arrernew, ikwerenh-rnemew atyetyart anaynteyew. 18 Ra ngenh ilanthew, atweyew apmwa yanh-rnem Amalek-areny-rnem. Ngenh ilanthew, renh-rnem ywerrelhelemel atweyew ingkerrenh-antey. 19 Ilekew nga awelhey-angenh ikwer? Ilekew ntwa apmwa mpwarew INGKART-wenh-angkwarr? Ra ngkweng ahelerrew, ntwarl inew ilek-ilek ikwer-rnem-wenh.”

20 Saul-el apatemel tyernew, “Ay? Innga ayeng awelhew INGKARTew! Atha mpwarew, rarl ayenh ilanthew-angkwarr! Atha atwew ingkerr; artwa, arelh, ampethen. Atyetyart Agag-then atha akngey-alpew iteth-antey. 21 Artwa ahawarr-rnemel, rernem inew atnwenth mwerr-rnemant ikwer-rnem-wenh! Yep-yep-then pwelek-rnem-then rernem akngey-alpew, ntwaw arrtyeyew INGKARTew apmer nhenh-itwew Gilgal-itwew.”

22 Samuel angkew, “INGKART ilkelhem, angka ikwerenhew-tangkwel awelh-aynteyew. Aker pwelhew ra ilkelhem alyepant. Anter pwelhew ra ilkelhem alyepant. Ikwerarl awelhemewant ra inkwerelhem. 23 Ntwa iterl-aremer, ingwerenty awelhey-angenh INGKARTew, rap apmwa inngarl mpwarem. Apmwarlap alakenhan, inweng apmwa ayernenty-apeny. Ingwerenty tangkemel anenty, INGKARTan ikwer inkwerelhey-angenh. Apmwarlap alakenhan, ampwal-rnemewarl kwenerreyel-apenyarl arwerl-penhew apwert-penhew. Nga awelhey-angenh angka INGKART-wenhew, rap ngkweng-wety intwemelerrew arrpemarl. Nga atyetyart apmwanem irrew Israel-wenh-rnemew! Ngarl apmwelhelew-wety, INGKARTel ilew, ‘Nthakenh nga atyetyart aney-angenh-anem, arrangkw.’ ”

24 Saul angkew, “Ayeng-antey apmwelhelew. Awelhey-angenh INGKARTew ngkweng-then. Ayeng atererrew artwa ahawarr-rnem-wety, ikwer-rnemewant awelhew. 25 Athan ngenh ayernem, ahelerrey-angenh atyeng. Alpey-angenh atyeng-wety. Apey-alpa atyeng-itwel atyenh-rnem-warl. Ayeng INGKARTewant kwenerremel angkaynteyew.”

26 Samuel-anap alakenharl ikwer angkew, “Ngan awelhey-angenh INGKARTew. Nthakenh ayeng alpey-angenh ngkweng-itwel. Ngan awelhey-angenh INGKARTew, rap ngkweng awelhey-angenh arrpemarl. Nga atyetyart apmwanem irrew! Ngarl apmwelhelew-wety, INGKARTel ilew, ‘Nthakenh nga atyetyart aney-angenh-anem, arrangkw.’ ” ...