1 Israel-kenh-rnem anperl-alhek arlpaw itnan Sin-they. Akngerr-inger INGKARTel renh-rnem thwenek apmer ingwer-warl alhetyek, kel rernem alherlewek rarl ilek-angkwarr. Ingwer-inger rernem apmer Rephidim-el ayntenh-anem. Apmer Rephidim-el rernem ayntenh arlpawel kwaty-wenyel, nthakenh rernem antywey-angenh. 2 Rernem Moses ikwer ahelerrek, renh ayernek, “Kwaty-wenyarl arrangkwarl! Kwaty anwenhantherr antherl-ayna wenh, anwantherr antywetyek!”

Moses ikwer-rnem angkek, “Ilek arrantherr atyeng ahelerreyel? Ilekek arrantherr INGKART arrkerneyelarl? INGKART-angkwarr apek arrantherr apentey-angenh! Arrantherr iterreyel apek, INGKARTel anwenhantherr iwerl-alhenty-arrpantey! Arrantherr iterreyel apek, INGKART rlterrk-weny, nthakenh ra anwenhantherr arntarnt-arey-angenh! Arrantherr alakenh iterrenty, INGKART arrekantherr ahelerrem!”

3 Rernem angkethakw-anem irrek, kwaty-wenyel. Rernem Moses-ek aleth-antey tyel-angkerrenh. “Ilekek ntwa anwenhantherr Egypt-they atnwenhey-alpek wenh arlpaw-warlan kwaty-weny-warlan? Ilekekarl ntwa anwenhantherrenh ampernem-then, atnwenth-rnem-then nhenh-warl atnwenhey-alpek, aherrety inngewarl wenh? Anwantherr ingkerrenh ilwenherretyek arlpawel, kwatyek arrangkw-itwek wenh! Ilek-anem anwantherr antyweman?”

4 Moses INGKARTek arlkek, “Nthakenh atha nhenh-rnem ileman? Rernem atyeng awelhey-angenh. Rernem apwertel ayenh wekerr, ipmek atwekerr!”

5 INGKART angkek Moses-warl, “Artwa ampwernem ikngwa. Nga-then artwa ampwernem-then arrwekel alhetyek, Israel-kenh-rnem ingkern-they alhetyek. Irretety irrkaty aknga, arrwel ntwa kwaty lher Nile ikwerel atwek. Anamerl-apeny alha! 6 Apwert itnan Sinai ikwer-warl alhenherr-arey wenh. Sinai-itwek ntwa apwert ilkwa arey-alhem wenh. Ayeng apwert-itwek rtnem, arrekantherr-itwek arrwekel-ampeny-itwekarl. Apwert renh atwa irrertetyel. Kwaty-anem apwert-they thelelhetyek, arrantherr antywetyek-anem angkethakwel.” Moses INGKARTek awelhenh. Ra alhek, kwaty renh atwek apwert-itwek irrertetyel, artwamp-rnemel renh arenh-antey. Kwaty-anem thelelhek apwert ikwer-they. Rernemap antywek-anem ingkerrenhel-antey. 7 Moses-el apmer renh itnewek Massah-anem. Massah aynteyel arrkerneyelarl, Israel-kenhel-rnem INGKART arrkernek. Israel-kenh-rnem kwaty-weny anek, INGKART arrkernek, ayernerremel, “INGKARTang anwekantherr-itwek aneyel-antey? Arrangkw apek. INGKARTelang anwenhantherr arntarnt-areyel-antey? Arrangkw apek wenh.” Moses-el apmer renh ingwer-angkwarr itnewek, itna Meribah. Meribah-an ayntek ilterreyelarl, Israel-kenh-rnem kwaty-they ilterrenharl arlkarewemel.

8 Israel-kenh-rnem apmer Rephidim-el anenh, Amalek-areny-rnem akngerr apetyek, renh-rnem atwetyek. 9 Moses angkek Joshua-warl, “Ntwa artwa mwerr-rnem rlwanetyek, arrantherr atwerretyek Amalek-areny-rnem-itwek. Ingwelarreng ayeng alhem, apwert irrwerl-itwek rtney-alhetyek-anem. Irretety renh atha akngem, INGKARTelarl ayenh anthek. Atha irrertety ikwerel alhel-arerl-ayntem, arrantherrarl atwerrerl-anem-angkwarr, arrantherr renh-rnem ingkerrenh atwetyek.”

10 Joshua Moses ikwer awelhek. Ra artwernem rlwaneynek, Amalek-areny-rnem atwetyek. Moses apwert irrwerl-warl nganek, Aaron-then artwa ingwer-then itnan Hur. 11-12 Moses-el irrertety irrwerlelek akapwert irrwerl-ampeny atnyenek. Rap irrwerl-warl irrertety renh antwerrkek, Israel-kenh-rnemel Amalek-areny-rnem antengelenh-antey. Moses artwamp-anem, akwa-atherr alhengkerr-anem irrek. Ra irrertety renh irrwerl antwerrkey-angenh arrangkw-anem. Akwa alhengkerr-anem kwenerrenh-anem, Amalek-arenyel-rnem Israel-kenh-rnem antengelenh-anem. Aaron-el-atherr Hur-el-atherr ratherr apwert akely arrernek, Moses ra anerl-ayntetyek. Ikwer-penh Aaron-el-atherr Hur-el-atherr akwa-atherr Moses-kenh antwerrkenh irrertety-akert irrwerl-antey, ingwerel-rnem atwerrenh-angkwarr-antey. Aaron-elan akwa arraty-ampeny antwerrkenh, Hur-elan ayleng-ampenyarl antwerrkenh. Ratherr alakenh-anyem akwa-atherr Moses-kenh antwerrkenh, ingkeny aylpenhetyek-atwety. 13 Alakenh-anyem Joshua-then irlkenty Israel-kenh-rnem-then rernem Amalek-areny-rnem antengelemel atwek.

14 INGKART angkek Moses-ek, “Angka nhenh atwerrenharl-penh pip-warl ingkwern-aynta, ingwerel-rnem iterl-arayntetyek iylpelerrey-angenh. Angka nhenh Joshua-warl ilerl-ayntetyek, atha Amalek-areny-rnem ingkerrenh altheneyenh. Ingkern-penhel-rneman renh-rnem iterl-arey-angenh, akwerrp.”

15 Ikwer-penh Moses-el apwert-rnem arrernek, ampwal aker arrtyerneyek-arelh mpwarek INGKARTek. Ra renh itnewek, “INGKARTel Anwenhantherrenh Arntarnt-arayntem Ahelengkw-rnem-kety.” 16 Moses angkek-anem, “Atha irrertety alhel-arek irrwerl-warl-athek, INGKART aneyel-warl. INGKARTel aleth-antey atwayntem Amalek-areny-rnem.”