1 Atyenh-rnem, Akngey arrekantherr mwerr-angkwarr lwewarrernelhek. Alakenh atha arrenhantherr ileyel. Arlka arrekantherrenh Akngey-kenh-angkwarr anthelhetyek, ra impen arrekantherr inkwerelhetyek. Apmwek anthelhey-angenh. Alakenh-angkwarr arraty apenterl-ayntetyek ikwerenh-angkwarrant. 2 Ingwer-rnem apmwangkwarr ilpertilekerr ahern-areny-kenh-angkwarr, Akngey-kenh-angkwarr arraty apenterl-ayntetyek. Akngey rant akwerrng arratyiletyek, arrantherr ikwer iterr-ayntetyek. Arrantherrap iterl-arayntetyek Akngey rarl ilkelheyel-angkwarr-antey.

3 Akngeyel ayenh rlwanek, ayeng angkakert apetyem arrekantherr-warl, arrenhantherr iletyek. Ingkart-areny ingwer-rnem-angkwarr mwerr-angkwarr tnakelhey-angenh Ingkart-kenh-angkwarr. Anwekantherrenh-angkwarr-weny, rant iwerr anwekantherr arrernek, alakenh anwantherr apentetyek ikwerenh-angkwarr. 4-6 Anwantherr anyentirretyek ikwerenh-angkwarr anyent-apeny ilterrey-angenh, anyent-angkwarr, arlka anyent-apeny. Akngeyel anwenhantherr arrernek, amentew-ament ikwer warrkirr-ayntetyek. Arlkan iltyakert, anngakert ingkety-akert amentew-ament mpwareyel. Arlka amentew-ament arlperrty mpwareyel-apeny, tyaty-areny ingkerrenh rernem amentew-ament mpwareyel arrpemarl, angka anyent-angkwarr-antey, Christ anyent ikwer-antey. Angka anyelk anayntiley-angker, ra ingkerrenhek anayntilem. Akngeyel ingwerel arrernek, rernem angka iletyek angkakert arwa alhewer Akngey renh tnakemel. 7 Akngey-kenh warrk alakenh. Ingwer-rnem arntarnt-aretyek apek, kel mwerr. Ntwa apek Akngey-kenh angka anayntiletyek, kel mwerr. 8 Ingwer-rnem rlterrkil-ayntetyek, irrkngerneyarl arntarnt-arayntetyek, man anthetyek irrepern-rnemek, arnkatyel akalty-anthayntetyek nyerrirrey-angenh, kel mwerr. Ingwer-rnemek amperrngirretyek, anthetyek mwerrarl.

9 Arrantherr ingwer-rnemek innga inkwerelh-ayntetyek, arntarnt-arayntetyek mwerr-angkwarr. Arraty-angkwarr innga apenterl-ayntetyek apmwangkwarr apentey-angenh. 10 Ingwer-rnem arntarnt-arayntetyek, ngkwenh-rnem-apeny, ngkwenh-rnem arntarnt-areyel-apeny, ament-angkwarr-weny, mwerrant-arey anayntetyek, mwerrant-arey arntarnt-arerr-ayntetyek. 11 Ingkart-angkwarr intem-antey apenterl-ayntetyek, Itnweng rlterrk-akertel, irrkngerney anayntetyek, ipmelhey-angenh. 12 Intem-antey irrkngerney anaynta, Ingkartek mpwelhemel. Ipmelhey-angenh ingwer-rnem-kety. Akngey intem-antey irrkngerneyel ayern-ayntetyek, ipmelhey-angenh. 13 Ingkart-areny-rnem arntarnt-arayntetyek, irrepern-rnem anthayntetyek. Alethang ingwer-rnem arntarnt-arayntetyek.

14 Ingwerenty ngkweng irrpelthirrenty, ntwa Akngey ayernetyek, renh atwey-angenh, ra renh arntarnt-aretyek mwerr-angkwarr, apmwangkwarr tyarlewey-angenh. 15 Ingwer-rnem apek irrkngerney aneyel, ikwer-rnem-angkwarr irrkngerney arrpemarl aneyel. Ingwer-rnem apek amperrngirreyel, ikwer-rnem-itwek amperrngirremel ana. 16 Artwa ingwer-rnem-itwek mwerrant-arey anayntetyek, atyetyart ilkwarrpantey tnakelhey-angenh, artwa apmwamwam-kety irrentelhey-angenh anetyek.

17 Ingwerentyel ngenh apmwangkwarr mpwarenty, angkep apmwangkwarr mpwarey-angenh ikwer. Arratyelirretyek weth-lkwer, ingkerrenhel ngenh arraty iterl-aretyek. 18 Arrantherr ingkerrenh mwerrant-arey anayntetyek arrkernelhem. 19 Angkep atwey-angenh, Akngey-kenhant. Akngeyelant renh menty apmwangkwarr tyarlewetyek, ra ament atwelhetyek. Angka Akngey-kenh alakenh aynteyel: “Ayengarl angkep atwey-angkeran.” Ingkart ilelhek. 20 Angka Akngey-kenh alakenh aynteyel: “Ingwerenty ngkweng ahelirrenty, ntwa amern anthem arlkwetyek, ntwa kwaty anthetyek antywetyek, ra nyerrirremel iterl-arem-anem.” 21 Mwerr-angkwarr apententy, ngenh atweyelarl-kety, ngenh ilteyelarl-kety, anwantherr arrenty renh antengiletyek.