Genesis.
40.
Pharaoh-kenh warrkenh atherr, anyent wayn anthey-angker, warrkenh ingwer amern amperney-angker. 
Ratherr apmwelhelek. Pharaoh ikwer-atherr ahelirrek. 
Atyetyartel artwa ikwerenh-rnem ilanthek warrkenh renh-atherr tyayl-warl akwernetyek. Renh-atherr atherr-antey tyayl anyent-warl akwernek, Joseph-arl anenh-itwek. Rernem arleng-alenty aleth innga anenh. 
Atyetyart tyayl-arenyel Joseph renh ilanthek, ra artwa renh-atherr arntarnt-arayntetyek tyayl kwen. 
Ingwa anyentel artwa ratherr atherrel-antey altyerr arek. Akngey ingwerant atherr ratherr arek. 
Ingwepenh Joseph ra alhek, artwa renh-atherr aretyek. 
Ra renh-atherr arey-alhek, ratherrarl iterrenh artewentyel. Joseph-el renh-atherr ayernek, “Ilek mpwelanth artewentyel iterreyel?” 
Ratherr angkek, “Akngey aylanth arek, ingwer-rnemel apek aylekanth anayntileyang angka renh.” Joseph-el ilek, “Akngey rant angka arratyan iterl-areyel. Akngey arek-penh atyeng ilenherr-atherr atha apek iterl-aretyek.” 
Warrkenh wayn anthey-angker ra Joseph renh ilek, “Aylpa irrpety atha arek grapes-itwek, amern-angketyarr irrpety-antey. 
Pharaoh-kenh irrkwa atha atnyenetyek grapes-rnem iltyel anterrkwenhemel grapes-penh akarr irrkwa ikwer-warl thelhemel. Pharaoh renh-anem anthek, ra antywetyek.” 
Joseph-el ikwer anayntilek, “Atha ngkweng ingkerrenharl iley, ilekarl ra aynteyel, aylpa irrpety yanhan, arlta irrpety-apenyarl. 
Arlta irrpety-penhan Atyetyartel ngenh aketh-warl tyarleweyenh. Ntwa warrkenh ikwerenh arrpemarl anem, wayn arrpemarl anthayntetyek, ntwa awank-akerr anthenh-angkwarr-apeny.” 
Joseph-el renh ilek, “Nga tyerrelhentyelan tyayl-they, Pharaoh renh ila, ra ayenh tyayl-they tyarlewetyek. 
Artwa ingwer-rnemelan ayenhan anyelkel inenh Hebrew-kenh apmer-ampeny-they. Ayeng nharl tyaylel aneyel, atha apmwel-areth mpwarey-angenharl. Ayengan arlarl.” 
Warrkenh amern amperney-angker ra altyerr ikwerenh-anem ilek Joseph-warl, rarl ingwel arek, Joseph-elarl arraty-angkwarr anayntilek. Ra Joseph renh ayernek, ilekekarl ra altyerr arekek. Atha altyerr arek arrpemarl. 
Amern-akert amernek-arelh irrpety akngeynenh akapwert irrwerlel. Thip-rnemel amern renh-rnem arlkweynenh amernek-arelh irrpety ikwer-itwek. 
Joseph-el renh ilek, “Alakenh-anyemarl angka yanhan aynteyel, amernek-arelh irrpety yanhan arlta irrpety-apeny aynteyel. 
Arlta irrpety-penh Atyetyartel ngenh ita rlweth-akem, inkwartey arreylpel. Ipma aylpar-arrerneynenh arwerl arlpenty irrwerl-warl. Thip-rnemel tyelk ngenh arlkwayntetyek.” 
Arlta irrpety-penh Pharaoh-el amern tyenkerr arlkwenh warrkenh ikwerenh-rnem-akertel. Ra warrkenh ikwer-atherr yangkelhek, ratherr kwenty renh atyenhiletyek, rernem amern tyenkerr arlkwetyek ingkerrenhel-anem. 
Warrkenh wayn anthey-angker arrernek arrpemarl, ra warrkirretyek arrpemarl, ra warrk renh antheynek arrpemarl. 
Artwa amern amperney-angkeran ra ingwer-rnem ilanthenh renh ipmek atwetyek, ipma aylpar-arrerneyenh arwerl arlpenty irrwerl-warl, Joseph-elarl ilek-angkwarr. 
Ingkerrenh-angkwarr ayntek Joseph-elarl ilek-angkwarr-antey. Warrkenh wayn anthey-angker ra iylpelirrek. Atyetyart renh iley-angenh-antey, Joseph renh tyayl-they tyarlewetyek.