Exodus.
20.
Akngey angkenh Israel-kenh-rnemek alakenh-anyem, 
“Ayengan Akngey arrekantherrenh, itnan INGKARTarl. Atharl arrenhantherrenh Egypt-they atnwenhey-alpek, Egypt-arenyel-rnemarl arrenhantherrenh warrk ilkwa anthenh-kety, arrantherr tyayl-areny-apeny warrkirrenh. 
Ayengan Akngey arrekantherrenh anem. Arrantherr altyerr-arrpantey ingwer-rnem apentey-angenh anetyek. Atyengant arrantherr inkwerelhetyek. 
Akngey-arrpantey ingwer-rnemel mpwarem apwert-penh arwerl-penh. Rernem altyerr-arrpantey mpwarem irrwerl-areny-apeny apek ahern-areny-apeny apek kwaty-areny-apeny apek. Rernem ikwer-rnem kwenerr-ayntetyek inkwerelhemel. Alakenh-anyem rernem apmwel-ayeth mpwarem atyengety. Alakenh-anyem arrantherr mpwarey-angenh! Akngey-arrpantey arrantherr mpwarey-angenh, kwenerrey-angenh ikwer-rnem. Menty ayntetyek! Ayengan Akngey arrekantherrenh anem, itnan INGKARTarl. Atha arrenhantherr antwerrkeman, atyenh-rnem. Arrantherr atyeng arlkarerrenty, altyerr-arrpantey apenterl-anenty, alakenh-they ayeng arrekantherr ahelerrem. Arrantherr apek alakenh atyengety intwemelerrenty, atha aler arrekantherrenh atwem alhewer, arrengey-rnem-then, artartey-rnem-then atwemarl, ingkern-penh-rnem ingkerrenh atwem alhewer. 
Ingwer-rnemel angka atyenh apenterl-ayntem, rernem atyeng artewentyel ilkelh-ayntem, ayeng ikwer-rnem ikwer-rnem-kenh-then aleth-antey artewentyel ilkelh-ayntem. Nthakenh atha renh-rnem iwerl-alhey-angenh. 
Itnan atyenh impen. Arrantherr itna atyenh INGKART arwa iley-angenh, arrantherr arraty-angkwarrant itna atyenh iletyek. Arrantherr itna atyenh apmwangkwarr itnewenty, atha arrenhantherr atwem. 
Arrantherr arlta ltyerrey-angker atyenh iterl-ayntetyek. Arlta Saturday anyent impen ikwerel, arrantherr atyengant iterretyek wenh, atyeng iylpelirrey-angenh. 
Arlta 6-ek-atwetyant arrantherr alhewer warrkirr-ayntetyek. 
Arlta 7-el impen ltyerrey-angkerarl, arlta atyenharl. Ayengan Akngey arrekantherrenh, itnan INGKARTarl. Arlta ikwerel warrkirrey-angenh anetyek. Angka nhenh ingkerrenhekarl, aler-rnem arrekantherrenhek-then, warrkenh-rnemek-then, pwelek-rnem arrekantherrenhek-then, alethang-rnemek-then rernemarl aneyel arrekantherr-itwek. 
Awank-akerr atha ingkerrenh arrpmernek arlta 6-ek-atwety. Atha alker-then ahern-then kwaty alay-rnem ingkerrenh-then arrpmernekan. Atha ahernel alheyel-rnem-then alkerel alheyel-rnem-then kwaty-areny-rnem-then atnwenth ingkerrenh arrpmernek. Ikwer-penhan arlta 7 Saturday-elan ayeng ltyerrek-anem warrkirrey-angenh-anem anenh. Alakenh atha arlta anyent impen renh itnewek, arrantherr ltyerrayntetyek. 
Arrantherr akngeyek-then ameyek-then awelhetyek, rernem arrenhantherrenh ilenty. Antwerr alhey-angenh. Arrantherr ikwer-rnem awelhemel iylpareth anetyek, inkwerelhemel. Arrantherr ikwer-rnem awelhenty, arrantherr arleng-alenty anem apmer ikwer-itwek, atharl arrekantherr anthem. 
Arrantherr ingwer-rnem ipmek atwey-angenh anetyek. 
Arrantherr anewikw ingwer-kenh ikngwey-angenh anetyek. 
Arrantherr ingwer-kenh ampwal ilek-ilek irrtyertel iney-angenh anetyek. 
Arrantherr court-itwek ingwerenty irrtywerremel iley-angenh, arrantherr ingwerenty angka arratyant iletyek. 
Arrantherr alharlkwerrey-angenh ingwer-rnemek anetyek. Arrantherr ingwer-kenh apmer-they apek, anewikw-they apek, pwelek-akerr-they, tangkey-akerr-they, warrkenh ikwerenh-they alharlkwerrey-angenh anetyek. Ampwal nhenh-rnem aynteng, ingwer-kenhan aynteyel. Angka rlterrk nhenh-rnem arrantherr aleth-antey apenterl-ayntetyek ipmey-angenh.” 
Israel-kenh-rnem ingkerrenh apwert ikwer-itwek arrerenty rtnenherrenh. Rernem awely-awely awek angkenharl, terampet-anem angkelh-angkelhelenty awek. Kwert-angketyarr rernem apwert-itwek arek. Rernem arek-penhan, rernem aterirrek-anem, arleng-anem rtney-alpek apwert ikwerety. 
Rernem Moses-warl angkek, “Ngant anwekantherr angkey-areny. Akngey apek anwekantherr angkenty, anwantherr ilwekerrarl. Anwantherr ngkwengant awelhem.” 
Moses ikwer-rnem angkek, “Aterirrey-angenh! Akngey apwert nhenh-warl apetyek, rarl arrenhantherrenh arrkernetyek, arrantherr renh apek apentetyek. Ra ilkelheyel, arrantherr ikwer iterretyek aleth-antey, apmwangkwarr aney-angenh.” 
Rernem rtnenh apwert ilkwethey arleng-antey. Moses-ant alhek kwenpay ikwer-warl Akngey-warl. ...