Ruth.
4.
Ikwer-penhan Boaz ran alhek, keyt-itwel arrernelhetyek, rernemarl aylpenhem tawen-warl. Keyt ikwer-itwel rernem akarrerrenh, ilek-ilekek apmelerr angkayntetyek. Rarl ikwer-itwel arrernelhek, artwa ran apetyek, wetharl Boaz-el arrwekel itnewek. Ranap arelh inpert arntarnt-arey-angker anenharl. Boaz ikwer arlkek, “Atyeng apeltyay! Apetyay! Atyeng-itwel anetyek.” Artwa ra apetyek, ikwer-itwel anetyek. 
Boaz-elan artwamp-rnem 10-anem inerl-apenh, rap angkek ikwer-rnem, “Apetyenh-arey! Aylek-itwel arrernelhetyek.” Rernemap aney-alhek-anem. Akngerr ingwer-rneman anenh arrpemarl. 
Boaz angkek artwa ikwer-warl, “Ntwa apek awek, Naomi rarl apey-alpek Moab-they? Inperterrenty-penh ra iterreyel, katen anewikw ikwerenh-kenh Elimelek-kenh tharlemeletyek. Elimelek ra aylekenh-antey aneyel. 
Ayengan iterrenh, ngkweng-warl angketyek. Aleyaym nga ilkelhem apek, katen yanh payemeletyek, artwamp-rnemel aweyelarl-kety. Ntwemernt payemelemer. Nganap apek iterreyel, mentyarl aretyek. Kel mwerr. Athanemarl payemeletyek.” Artwa ingwerelan awek, rap angkek, “Ya, mwerr, atha payemelem.” 
Boaz-el tyernek, “Ntwarl katen payemelem, ntwap inem arelh Ruth wethey, inpert yanh Moab-areny, Elimelek-kenh ahenterrikw. Nga itengerrem ikwer-itwel, ra awey akely atnyenetyek, alerey Mahlon-kenh anetyek anwekantherrenh-angkwarr. Rarl alkenherreyenhel, rap apmer inetyek ikwer.” 
Artwa ran angkek Boaz-ek, “Yew! Boaz, nga arraty angkeyel. Kel nthakenh ayeng Ruth-itwel itengerrey-angenh. Atha apmer payemelenty, aleraty atyenh-rnemel nthakenh iney-angenh, ayengarl ahaperrenty-penh. Kel nthakenh atha iney-angenh. Ntwantey inetyek!” 
Alakenh angkenty-penh artwa ra pwet anyent lhelek, anthemel Boaz ikwer. Rap angkek, “Mwerr wenh ntwa apmer payemeletyek.” Alakenhap Israel-kenh-rnemelan mpwarenh. Rernem angkerrenh-tangkwel. Anyentelan pwet lhelenh, ingwer-warl-anem anthemel. 
Boaz ranem angkek artwamp-rnemek ingwer-rnemek-then, “Kel arrantherr anngetherrarl areyel, atharl apmer payemeleyel Naomi-they. Arrantherr iterl-areyel, apmer yanh Elimelek-kenh-tangkwel, alerikw ikwerenh-atherr-then-kenh, Mahlon-then-kenh Kilion-then-kenh. 
Arrantherrap areyel, atharl Mahlon-kenh anewikw ineyel arrpemarl, Ruth wethey Moab-areny. Ayengan ikwer-itwel intengerrem-anem. Aylanth ampernem atnyenem apek, ampernem Mahlon ikwer. Kel mwerraw. Alakenhaym apmer nhenh-areny-rnemel renh iterl-aretyek, iylpelerrey-angenh.” 
Artwamp-rnemel ingwer-rnemel-then awek, rernemap angkek Boaz-ek, “Yew! Anantherran anngetherr arek. Mwerr alakenhan. Anantherrap INGKART ayernem, arelh renh arntarnt-arayntetyek, rarl apmer ngwenh-itwel aney-alpetyek. Anantherr INGKART ayernem, renh anthetyek ampernem akngerr. Awank-akerr artwa arwekeleny Jacob ra Rachel-then Leah-then-itwel itengerrek, ratherrap ampa akngerr atnyenek. Alakenh. Arelh atherr-they anantherr Israel-wenh-rnem akngerrerrek apmer nhenh-itwel. Ephrath-kenh-rnem ingkerrenhelan ngenh nakayntetyek. Bethlehem-areny-rnem ingkerrenhel ngenh iterl-aretyek. 
Alakenh-kety anantherr INGKART ayernem, mpwelanthenh ampa akngerr anthetyek. Anewart weth-atherr arrwekeleny-atherr-apeny, Tamar-then Judah-then-apeny. Ratherr alerikw anyent atnyenek itnan Perez, ngkwenh arrwekeleny. Aleyan akngerr-anem Perez-kenh-antey aneyel. Alakenhey.” 
Kel-anem Boaz-then Ruth-then itengerrek. INGKARTan athamerrenh Ruth ikwer. Ingwer-ingweran ra awey akely atnyenek. 
Arelh Bethlehem-areny-rneman angkek-anem Naomi ikwer-warl, “INGKART nakey anantherr ingkerr! Ran ngenh anthek awey aperlengkw. Rarl alkenherrenty rap ngenh arntarnt-arem-anem. Israel-kenh-rnem ingkerrenhel renh iterl-areyenh. 
Ngarl arelhampw irreyenhel, ra ngenh irrngerney-antheyenh, ngenh rlterrkelemel. Anherrengkw ngkwenhan artewenty ngkweng ilkelheyel, anperarl ingwer-rnem-angkwarran. Arelhampw anyentelan ampa irrwey 7 atnyenem apek, renh arntarnt-arayntetyek. Anherrengkwel ranap ngenh amentarrp athamerremel arntarnt-arenh arlengew-alenty. Aleyan ra aperlengkw ngkwenh-anem atnyenek.” 
Naomi-elan awey renh inek, rap iytnwel-anem atnyenek, renhap arntarnt-aremel. 
Arelh Bethlehem-areny-rnemel renh itnewek Obed, rernemap angkek, “Awey akely renh Naomi-ek atnyenek!” Ingwer-ingweran Obed ra awey akely atnyenek itnan Jesse. Jesse ran awey akely atnyenek itnan David-anem. 
Perez-kenh-rnem alakenh aynteyel: Perez-an aynikw Hezron-kenh anek, 
Hezron-an aynikw Ram-kenh anek, Ram-an aynikw Amminadab-kenh anek, 
Amminadab-an aynikw Nahshon-kenh anek, Nahshon-an aynikw Salmon-kenh anek, 
Salmon-an aynikw Boaz-kenh anek, Boaz-an aynikw Obed-kenh anek, 
Obed-an aynikw Jesse-kenh anek, Jesse-an aynikw Atyetyart David-kenh anek.