Matthew.
9.
Jesus rtnwewarl nganek, kwaty-angkwarr artarnpenhek. Ra angkep-anem alpek apmer ikwerenh-warl, tawen Capernaum-warl. 
Artwa ingwerel-rneman artwa lerrp anyent akngey-alhek pantyel, Jesus-warl. Jesus-el renh-rnem arek, rernemarl renh tnakek mwerriley-angker. Ra artwa lerrprenh ilek, “Apmwan atha ngkwengety iwem.” 
Artwa Pharisee-rnem-then Moses-kenh akalty-anthey-angker-rnem-then rernem angkerrenh, “Ran nhenhey irrtywerremel ilelheyel Akngey-arrpantey. Akngeyelant apmwan iwem!” 
Jesus-el iterl-arek artwa renh-rnem, rernemarl ikwer irrpelthirremel angkerrenh. Ra renh-rnem ilek, “Arrantherran apmwel-aretharl angkerreyel, atyeng irrpelthirremel! 
Ayengan Akngey-kenh Artwa Impen. Akngeyel ayenh thwenek ahern nhenh-warl, rlterrk innga. Akngeyel ayenh rlterrkilek, artwa arntety mwerriletyek, apmwa ingkerrenh-they iwetyek, arrantherr ayenh iterl-aretyek. Atha akwentelhilemel thwenem, ra apmer-warl alpetyek panty inerl-alhemel.” Jesus angkek artwa arntetyek, “Akwentenhey-alpa, panty ngkwenh inerl-alhemel, apmer-warl-anem alpa!” 
Artwa arntety-penh akwenterl-alhek, panty inerl-alhemel. Alpek-anem ra apmer-warl, mwerr-anem. 
Akngerrel intwarek apatemel, arntety rarl apmer-warl alpek. Rernem Akngeyek-anem inkwerelhek, rarl ahern-areny-rnem rlterrkilek, ingkerrenh mwerril-ayntetyek. Rernemap angkerrenh-anem, “Ngay! Akngey inngarl yanhan!” 
Jesus ra alpenh, ran artwa arek, itnan Matthew. Ra man akwetyenh, kapment-warl anthayntetyek. Jesus-anem angkek ikwer, “Atyeng-angkwarr apetya!” Ra warrk ikwerenh-kety ipmelhek, Jesus-angkwarrant-anem antelhenhek. 
Ikwer-penhan Jesus kwertengerl ikwerenh-rnem-akertel amern arlkwek artwa apmwernem-itwek, man akwetyey-angker-rnem-itwek warl kwenek. 
Pharisee ingwer-rnemel Jesus-kenh kwertengerl-rnem ayernek, “Ilekek ra amern arlkweyel man akwetyey-angker-rnem-itwek, apmwa ingwer yanh-rnem-itwek?” 
Jesus ra awek rernemarl angkerrenh. Ra renh-rnem ilek, “Ngangkerel arntety-rnemant arem, mwerr-rnem nthakenh arey-angenh. Ingwer-rnem rernem mwerr-arrpanteyarl iterl-arelheyel, atyeng-angkwarr-wenyarl. Ayengarl ran apmwa atha iwey-angkeran, arntety mwerriley-angkeran. 
Angka Akngey-kenh-angkwarr akaltyirra! Atha mwerr-rnemant arntarnt-arey-angenh. ‘Angka ingweran aynteyel amern tyenkerr anthetyek. Nga ingwer-rnemek-tangkwel amperrngirra!’ Alakenh-anyem Akngey-kenh pipel aynteyel, anwantherr iterl-aretyek. Ayeng ilkelheyel ingwer-rnemek-then amentewarl alheyel-rnemek-then, Akngey-kenh angkek awelhey-angenh-rnemek, rernem atyeng-warl angkepirretyek.” 
John-kenh kwertengerl-rnem apetyek Jesus-warl. Rernem renh ilek, “Anwantherr Pharisee-rnem-then Akngeyekant iterreyel, amernek iterrey-angenh. Kwertengerl ngkwenh-rnem-alew? Amern-kety ipmelhek arrpemarl?” 
Jesus ikwer-rnem angkek, “Artwa anyent itengirrem-angkwarr, ingkerrenhel ikwer-angkwarr amern kwenty arlkwetyek, inkwerelhemel. Alakenh-anyem, kwertengerl atyenh-rnem anyentirremel aylperrem, amern kwenty arlkwetyek, atyeng inkwerelhemel. Ayengarl alpeyenh-ketyant, rernem ipmelheyelpeyenh. 
Arnkwa apmwamwamel-rnem nthakenh anwantherr atanthey-angenh arnkwa mwerr-warl, renh arnwarnetyek. Arnkwa apmwamwam altherrkirrey-angker arrpemarl. Anwantherr menty arnkwa apmwamwam iwey, arnkwa mwerran atnyenemel.” 
Jesus-el renh-rnem ilek, “Anwantherr theley-angenh ngkwarl wayn lyerteny arranty apmwamwam-warl. Arranty apmwamwam altherrkirremarl. Arranty-they ngkwarl wayn thelelhekerr ingkerrenh-antey, rwenpirrentyan. Arranty ampwanemarl. Anwantherr ngkwarl wayn lyertenyan arranty mwerr-warl-anem theletyek. Arranty mwerr-itwek wayn mwerr aynteyel, thelelhey-angenh anetyek.” 
Jesus angkenharl-antey, artwa Atyetyart ilkwa ranem apetyek, ampwethel arrernelhek kwenirremel, “Kwey alerey atyenh kel ilwek. Renh arnep-arna, ra angkep itethirretyek.” 
Jesus ra rtnerl-alhek, ikwer-angkwarr antelhenhek, kwertengerl ikwerenh-rnem-akert. 
Arelh anyent arntety inngan, aherrety 12-ek-atwety, arleng-alenty anenh. Arelh ra ingkern-they apetyek, arnkwanem Jesus-kenh arnep-arnek. 
Ra ament-anem iterrek, “Atha arnkwa ikwerenh arnep-arnenty, ayengap mwerrarl irreman.” 
Jesus ranem artepang arek arelh renh, ra ikwer angkek, “Nga mwerr-anem irrek, ntwarl ayenh tnakek.” Kel ikwerel-antey ra mwerrirrek. 
Warl atyetyart-kenh-warl ra aylpenhek, ra arek ingwer-rnemarl artnalhelirrenh. 
Ra angkek, “Arnangerrenherr-arey! Kwey ngkwenh ilwey-angenh, ankwarl ra aynteyel.” Ingkerrenh Jesus ikwer atherrenh irrpelthirremel. 
Ingkerrenh aketh-warl irrentek-penh, Jesus ra aylpenhek, arrewaly rarl ayntenh-warl. Ranem akwethey rnkernek, rtnerl-alhetyek. Kwey ra akwentenhey-alpek-anem. 
Ingkerrenhel ahern Judea-ampeny-they rernem angka awek-anem, Jesus-elarl renh itethilek. 
Jesus apmer ikwer-they anperl-alhek, artwa aparrng atherrel Jesus renh apentenh ingkern-they. Ratherr arlkek, “Aylekanth amperrngirra! David-kenh alerikw!” 
Jesus ranem warl kwen-warl aylpenhek. Artwa aparrng ratherr ikwer-warl apetyek, Jesus-el renh-atherr ayernek, “Mpwelanth ayenh tnakeyel, atha mpwelanth mwerriley-angker?” “Kel Ingkartay, aylernanth ngenh tnakeyel,” ratherr alakenh angkek. 
Jesus-el annga renh-atherr arnek, angkemel, “Kel mpwelanth mwerrirrem-anem, ayenh tnakekarl-penh.” 
Kel ratherr mwerrirrek-anem. Jesus ikwer-atherr arrkngert angkek, “Ingwer-rnemek ilelhey-angenh, atharl mpwelanth mwerrilek.” 
Apmer arrpanenh-warl ratherr ilelherl-apenh, renh-atherrarl mwerrilek Jesus-el. 
Jesus anperl-alhek kwertengerl ikwerenh-rnem-akert, ingwer-rnemel artwa arrenty-akert atnwenhek Jesus-warl. Arrentyel artwa arrwekel-antey renh angkey-angenh ilek. 
Jesus-el arrenty renh irrentek, artwa ikwer-they. Artwa rap angkek-anem, mwerr-anem. Jesus renh arek-penh, ingkerrenh inkwerelhemel iterrek, “Aleyant anwantherr arek, Israel-ampenyek arey-angenh.” 
Artwa Pharisee rernem angkerrenh, “Artwa yanh arrenty atyetyart-kenh rlterrk-akertel arrenty ingwer-rnem irrenteyel.” 
Jesus ra apmer arrpanenh-warl akalty-antherl-apenh, Akngey-kenh-angkwarr apenterl-ayntetyek, Jew-kenh tyaty-itwek, arntety-rnem mwerrilerl-apenh. 
Ra ingkerrenh arek, ra ikwer-rnem amperrngirrek, rernemarl ywarn iterrenh. Ingwerentyel renh-rnem akalty-anthey-angenh. Rernem apatemel anenh, atyetyartek arrangkw, yep-yep atyetyart-weny apatemel arlperrtyirrem-apeny. 
Ra kwertengerl ikwerenh-rnem ilek, “Akngerr ingwer-rneman Akngey-kenh angka awey-angenh-antey. Angkakert apetyey-angenh-antey, renh-rnem akalty-anthetyek. 
Ingkart Akngey ayernetyek, angkakert thwenetyek, angka mwerr-angker ilerl-apayntetyek, akwerrp-rnem-warl.”