Matthew.
25.
Jesus-el renh-rnem ilek, “Angka atha iletyek, Akngey-kenh-angkwarr alakenh aynteyel. Artwa ra aleyak anyent-itwek itengirrey-alenty, aleyak 10 rernem alherlewek artwa anyent rlwatetyek lyenenty-akertel. 
Aleyak 5-pel ingwer-rneman akwerrparl. 5-pel ingwer-rneman akaltyarl. 
Aleyak 5-pel akwerrpel-rnem anter akelyarl akngek, rernem lyenenty lyerrtyiletyek. 
5-pel akalty-rnem rernem anter ilkwarl akngek, anter ywerrekerr, lyenenty lyerrtyiletyek. 
Rernem ingkerrenh mpwelhenh arleng-alenty. Renh-rnem ankwel atwek, rernem ankwanem ayntek. 
Ampepenyelan ingweran arlkek, ‘Artwa yanhey ra apetyeyel-anem! Mpa anwantherr arnekirrey ikwer-warl!’ 
Aleyak-rnem akwentenhey-alpek, ingkerrenhel lyenenty-anem lyerrtyilek. 
5-pel ingwer-rnem akwerrpel-rnem anterek-anem ayernenh aleyak ingwer-rnem, ‘Anter ingweran anthenherr-arey, lyenenty ywerrekarl-kety!’ 
5-pel ingwer-rnemel tyernek, ‘Arrangkw. Arrantherr store-warl alhenherr-arey anter ament payemeletyek!’ 
5-pel ingwer-rnem akwerrp-rnem alhek anter inetyek, artwa ra aremirrek ingkernarl, rernemarl store-warl alhek-kety. 5-pel aleyak akalty-rnem mpwelhenh, kel rernem aylpenhek warl ikwer-warl artwa ikwer-angkwarr, amern kwenty rernem arlkwetyek, artwa ra itengirrey-alenty. Ingwerentyel arriw martek-anem. 
Ikwer-penhan aleyak akwerrp-rnem apey-alpek-anem warl ikwer-warl arrpemarl. Rernem arlkek, ‘Ingkartay! Warl altywerilay! Warl altywerilay! Anwernantherr aylpenhetyek arrpemarl!’ 
Artwa angkek, ‘Atha arrenhantherr arraty ilem, atha arrenhantherr iterl-arey-angenh.’” 
Jesus-el angkanem anayntilek, “Alakenh-anyem aynteyel, ayeng apey-alpeyenh arrpemarl. Arrantherr mwanty arntarnt-arelhetyek, arrantherr iterl-arey-angenharl, ilenger ayeng apey-alpeyenhan.” 
“Akngey-kenh-angkwarr alakenh aynteyel, artwa anyentel artwa warrkenh irrpety arrernerl-alhek, rernem apmer arntarnt-arerl-ayntetyek. 
Kel ra renh-rnem iterl-arek. Artwa ra arrwekel anthek artwa anyent man 5,000-anem. Artwa ingweran anthek 2,000, artwa ingweran 1,000. Artwa atyetyart alethel-anem ikwer-penhan anperl-alhek. 
Atyetyart ra alhek-kety Artwa anyent ingwer 5,000-akertel, ra 5,000 ingwer-anem mpwarek. 
Artwa 2,000-arl anthek, 2,000 ingwer-anem mpwarek, irrkaty-angkwarr arrpemarl. 
Artwa anyent ingwer 1,000 anthekarl, ra irrka angernek, irrkewarl irrtyert akwernetyek arlengkewemel. 
Ingwer-ingeran atyetyart angkep-anem apetyek apmer ikwerenh-warl. Ranem renh-rnem anyentel-anyentel manek ayerneynek. 
Artwa 5,000-arl anthek ran ilelhek, ‘Atha 5,000 ingwer-anem ngkweng mpwarek.’ 
Atyetyart ranem angkek, ‘Ntwa mwerr-angkwarr mpwarek wenh! Ayeng ngkweng inkwerelheyel. Apetyay atyeng-angkwarr apmer mwerr-angkerel anetyek.’ 
Warrkenh ingwer 2,000-arl anthek, ranemarl ilelhek, ‘Atha 2,000 ingwer-anem ngkweng mpwarek.’ 
Atyetyart ranem angkek, ‘Ntwa mwerr-angkwarr mpwarek, ayeng ngkweng inkwerelheyel. Apetyay, atyeng-angkwarr apmer mwerr-angkerel anetyek.’ 
Warrkenh ingweran 1,000-akertel atyetyart ikwer ilelhek, ‘Ayengan arrangkwarl. Atyetyartay, ngan artwa awerrarl. Ntwa arwa alhewer man iney-angkeran ingkerrenh-they. 
Ayeng aterirrek, man ingkerrenh irrkewarl akwernek, arlengkewemel. Nhanyem man ngkwenh ingkerrenh-antey.’ 
Atyetyart ranem renh ilek, ‘Ngan warrkenh apmwarl, alhengkerrarl. Ntwa ayenh iterl-areyel, atha ingkerrenh akarriley-angker, amern atha lyapelhey-angenh-itwek. 
Ntwa man bank-warl arrerney-areny areyilemel. 
Man ngkwenh antha artwa 5,000-akert-warl. 
Arraty-angkwarr apenteyel-rnem Akngeyel renh-rnem arntarnt-areyenh. Apmwangkwarr alheyel-rnem, Akngey ikwer-rnem-kety ipmelheyenh. 
Warrkenh apmwa akwerr-ampeny-warl irrenteyenh, atayel arrangkeyel-rnem-warl.’” 
Jesus-el renh-rnem ilek, “Ayeng Artwa Impen Akngey-kenh. Ayeng apey-alpeyenh rlterrk ilkwakert angel-rnem-then. 
Ahern-areny-rnem ingkerrenh rernem anyentirreyenh atyeng-warl. Atha ingkerrenh akngakeyenh artwa anyentelarl yep-yep-rnem-then nanikwet-rnem-then akngakeyenh-apeny. 
Yep-yep-rnem atha akngakeyenh arraty-ampeny-warl. Nanikwet-rnem atha akngakeyenh ayleng-ampeny-warl. 
Athanem arraty-ampeny-rnem ileyenh, ‘Apetyenherr-arey, Akngey atyenh arrekantherr inkwerelheyel. Apmer nhenh atha arrekantherr arrwekel-antey mpwarek, ahern nhenh arrpmerney-angenh-antey. 
Ayeng angayakwirrek, arrantherr amern anthek arlkwetyek. Ayeng angkethakwirrek, arrantherr ayenh kwaty antywetyek anthek. Ayeng alethangank, arrantherr ayenh arntarnt-arenh. 
Ayeng arnkwek arrangkw anenharl, arrantherr ayenh arnkwa anthek. Ayeng arntetyirrek, arrantherr ayenh arntarnt-arenh. Ayeng tyayl-itwek anenharl, arrantherr atyeng-warl apetyek rwanng aretyek weth-lkwer ilkwatherr.’ 
Mwerrel-rnem renh tyernek, ‘Ingkartay! Ilenger ngenh anwernantherr angayakw arek, amern-anem anthemel? Ilenger ngenh anwernantherr angkethakw arek, kwaty-anem antywetyek anthek? 
Ilenger ngenh alethang anwernantherr arek, warl-warl-anem atnwenheynek? Ilenger ngenh anwernantherr arnkwek arrangkw arek, arnkwanem ngkweng anthemel? 
Ilenger ngenh arntety anwernantherr arek, tyayl-itwek-then ngenh arek?’ 
Atha tyerneyenh, ‘Atha arrenhantherr arraty ilem, arrantherr alakenh-anyem irrepern-rnem arntarnt-arek, rernem atyenh-rnem ingkerr.’ 
Ikwer-penhan ra ayleng-ampeny-rnemek ilek, ‘Arrantherr apmwernem alhenherr-arey atyengety! Alhenherr-arey rwa aknganenty-warl aletharl ampeyel-warl. Atha rwa mpwarekarl, renh-rnem arrtyetyek arrenty-kenh-rnem-then. Rwa nthakenh ilwernelhey-angenh. 
Ayeng angayakwirrek, arrantherr ayenh amern arlkwetyek anthey-angenh. Ayeng angkethakwirrek, arrantherr ayenh kwaty antywetyek anthey-angenh. 
Ayeng alethang anek, arrantherr atyengety intwemelant irrek. Ayeng arnkwek arrangkw anenharl, arrantherr ayenh arnkwa anthey-angenh. Ayeng arntetyirrek, ayenh arntety arntarnt-arey-angenh. Ayeng tyayl-itwek anek, arrantherr ilkwatherr apetyey-angenh atyeng-warl.’ 
Apmwel-rnem renh tyerneyenh, ‘Ingkartay! Anwernantherr ngenh angayakw arey-angenh? Anwernantherr angkethakw arey-angenh? Anwernantherr ngenh alethang anwernantherr arey-angenh? Anwernantherr ngenh arnkwek arrangkw arey-angenh? Ilenger ngenh arntety anwernantherr arek, tyayl-itwek-then, ngenh arntarnt-arey-angenh?’ 
Atha tyerneyenh, ‘Atha arrenhantherrenh arraty ilem, arrantherr apek artwa apmwamwam atyenh-rnemek alakenh-anyem arntarnt-arey-angenh, rernem atyenh-rnem ingkerr.’ 
Apmwerneman alheyenh apmer rwa aknganentyarl aleth ampeyel-warlarl. Mwerr-rneman apmer mwerr-warl alheyenh, rernem intem-antey iteth aneyenh ikwer-itwek.”