Matthew.
28.
Arlta ltyerrey-angker Ingkeny tyerrelhey-alentyel, Mary Magdala-areny Mary ingwer-then alhek, intey renh aretyek. 
Ikwer-penh ahern akngelhekarl ratherr awek, Ingkart-kenh angel ikwer-atherr-warl apetyek irrwerl-they. Ranem apwert renh atwepert-iwek, ranem apwert ikwer-itwek anenh. 
Angel ranem lyenentyel-apeny arrtyernek, arnkwan ikwerenh arlter innga. 
Ahelengkw-rnem aterirremel ahern-warl aytnek, ipmapeny-anem ayntenh. 
Angel angkek ikwer-atherr, “Aterirrey-angenh anenherr-atherr! Atha mpwelanth iterl-areyel. Mpwelanth Jesus-ek nthweyel, arwerl ilpeyl-atherr-warl atanthekek. 
Ra nhenh aney-angenh-anem. Akngeyel renh itethilek, weth rarl ingkerrenhek arrwekel ilelhek-angkwarr. Apetyenherr-atherr, intey renh aretyek, rarl ayntenh. 
Alhenherr-atherr, kwertengerl ikwerenh-rnem iletyek, rarl ipmepenh itethirrek. Ra Galilee-warl alhek arrwekel, arrantherr alhetyek renh arey-alhetyek. Alakenh-anyem ayeng angkakert apetyek, mpwelenhanth atha ilek.” 
Ratherr aterirremel-antey anterrek inkwerelhemel, kwertengerl-rnem iletyek. 
Jesus-el renh-atherr rlwatek, ratherr-anem kwenirremel arrernelhek ingkety atherr anterrkwek, ikwer inkwerelhek. 
Jesus angkek, “Aterirrey-angenh, kwertengerl atyenh-rnem ilenherr-arey, rernem ayenh Galilee ikwer-itwek arey-alhetyek.” 
Ratherr alhenharl-antey ahelengkw-rnem tern ilkwewarl alhek. Rernem tyaty-areny atyetyart-rnemek angka ilek. 
Atyetyart tyaty-areny-rnem-then rernem angkerrenh, ahelengkw-rnem payemeletyek rernem menty akater anayntetyek, ingwer-rnemek angka Jesus-akert iley-angenh, rarl itethirrek. Atyetyart ingwer-rnem angkerrenh arrpemarl. 
“Ingwer-rnem ilayntenherr-arey, kwertengerl weth-rnemelarl arrewaly tyerremel irrtyert akngek, awenng-they. Anwantherr arnkwa ayntenharl-antey. 
Pilate ra angka awenty, mwerrarl anwantherr renh ilem, nthakenh arrenhantherr ayntarrp-ileyangarl.” 
Rernem ahelengkw-rnem man payemelek. Rernem-anem akater anenh. Apmer Judea-areny-rnem rernem arraty iterl-arey-angenh-antey. 
Kwertengerl 11-pel alhek Galilee-warl, apwert ilkwewarl, Jesus-el kel renh-rnem ilek arrwekel, renh rlwatetyek. 
Rernem renh arek, ikwer inkwerelhemel. Ingwer-rnem arrangkwarl, ikwer irrpelthirrenh. 
Jesus ikwer-rnem-warl apetyek angkemel, “Akngeyel ayenh arrernek, alker-areny-rnemek, ahern-areny-rnemek, Ingkart ingkerrenhek anetyek. 
Apmer arrpanenh-warl alhenherr-arey, ingkerrenh akalty-anthetyek, rernem kwertengerl atyeng-anem anayntetyek. Baptise-emelenherr-arey renh-rnem itna Akngeyek, Alerek, Itnweng Rlwartek angkemel. 
Akalty-anthenherr-arey renh-rnem, angka atyenh ingkerrenh ywerreyek-atwety. Ayeng arrekantherr-itwek aneyenh, ahern nhenh ywerreyek-atwety.”