Revelation.
18.
Ikwer-theyan atha antyerl ingwer-anem arew altyerr-angkwarr, irrwerl-theyarl atwarrenhey-alpenh arawerrng rlterrk-akert. Ran artewenty amparrkenh, lyenenty arrtyernew apmer arrpanenh-itwew ahern-itwew. 
Ra atayel arlkenh alakenh: “Arrangkw-anem! Tawen ilkwa Babylon atakelhew! Apmwamwan-rnemant aneyel-anem yanh-itwew: inweng apmwerneman, arrenty-rnem, antyiper-rnem, thip irrpwerl-rnem-then. Moses-an angkew, ‘Yanh-lkwer arlkwey-angenh!’ 
Apmer yanh-areny-rnemel intem apmwel-ayeth mpwarenh. Rernemap ayntenh ingwer-rnem-itwew apmwangkwarr. Akngerr apmer arrpanenh-areny alhenh apmer yanh-warl, renh-rnem iwarrerneyew, apentemel apmwangkwarr. Atyetyart apmer arrpanenh-areny alhenh apmer yanh-warl, ilek-ilek apmwel-ayeth mpwareyew irrkaty-angkwarr. Ingwer-rneman apmer arrpanenh-areny tharlemeley-angker rernem alhenh apmer yanh-warl, ilek-ilek mwerr-angker tharlemeleyew ankety-rnemew, man akngerr inaynteyew ikwer-rnem-they. Ingkerrenh arwengk-arwengk irrenh ngkwarl antywenty-penh-apeny.” 
Atha awew ingwerentyak-anem, irrwerl-theyarl arlkenty alakenh: “Atyenh-rnemay! Awelhenh-arey atyeng! Iwerl-alhenh-arey apmer apmwa yanh! Anerl-aney-angenh apmwernem-itwew yanh. Apmwangkwarr iwarrerney-angenh, athan arrenhantherrenh atwewerr arrpemarl, irrkaty-angkwarr atha renh-rnem atweyenh-apeny artewenty. 
Rernem intem-antey apmwel-ayeth mpwarem, apmwa weth mpwer tywenem-apeny alkerew-atety. Akngeyelan renh-rnem iterl-areyel kanper, rernemarl apmwel-ayeth mpwarem. 
Rerneman arrenhantherrenh intem-antey irrwernenh. Atwenh rerneman arrenhantherrenh artewenty, artewenty inngarl renh-rnem-anemarl angkep-antey atweyew! Angkep atweyneyew artewenty innga apmwa yanh-rnem! 
Rerneman ankety anenh, nakelhemel intem-antey. Apwert akngerr-akert, arnkwa akngerr-akert, ilek-ilek mwerr-angker-akert. Rernem angkenh, ‘Anantherr atyetyart aneyel akngerrew apmer arrpanenhel. Anantherr artnemel aney-angenh akertemwengk, arrangkw.’ Kel arrantherran renh-rnem-anem awakelhemel akertemwengk amperrgeleyew! 
Tangkemel rernem angkenty-penh Akngeyel renh-rnem anamerl-antey court-em-elemel artewenty atweyenh arawerrng ilkwa ikwerenh-akertel. Rernemap angayakwarl anerl-aneyenh akertemwengk, pwarrkerreyenh arntety ilkwakert, Rernemap ilwernerreyenh-anem. Akngeyelan rwa thweneyenh apmer Babylon-warl, rap amperl-aneyenh ywerreyew-atety.” Alakenhan antyerl ingwerentyak atyeng angkew. 
Tawen yanhan amperl-aneyenhel, kwert akngerr arlwa anerl-aneyenh ikwer-they. Ingkerrenhelan areyenh. Atyetyart apmer arrpanenh-areny-rnem rerneman apmer yanh-warl alhenh, ilek-ilek apmwa mpwareyew. Rernemap apmwangkwarr ayntenh ingwer-rnem-then apmer ikwer-areny-rnem-itwew – apwert akngerr-akert, arnkwa akngerr-akert, ilek-ilek mwerr-angker-akert. Rernemap kwert areyenh, artnemel artewenty arrangkeyenh apmer ikwerew, atyetyart yanh-rnem. 
Arleng-they rernem apmwa yanh arerl-aneyenh. Rernemap atererreyenh, nthakenh arrer-apeny alhey-angenh, Akngeyelarl renh-rnem arrtyewerr arrpemarl. Artewenty inngey rernem artneyenh alakenh angkemel: “Atyewey pwertay! Irrepern-rnem Babylon-areny-rnemay! Ywerrelheleyenh ingkerrenh-antey! Rernem anenh atyetyart-tangkwel, aleyan arrangkw-anemarl! Tawen ikwer-rnem-wenh ilkwa rlterrk anenh! Artwa army-areny akngerrelan tawen renh arntarnt-arenh! Aleyan Akngeyel anamerl-antey tawen renh ywerrelheleyenh-anem!” 
“Tharlemeley-angker-rnem rernem-then arrangkeyenh tawen ikwerew arrpemarl, iney-angker-rneman ingkerr-anemarl ipma aneyel. Nthakenh man iney-angenh-anem, arrangkw-anem. 
Rernemap apateyelpeyenh, ayernerr-aynteyenh-anem, ‘Angwenhel-aneman anewantherr-itwew gold, thilp, man ilek-ilek mwerr-angker-then ineyenh? Angwenhel-anem anewantherr-itwew ineyenhan arnkwa mwerr-angker, arwerl mwerr-angker intenty-then? Angwenhel-anem anewantherr-itwew ineyenhan ilek-ilek arwerl-penh, apwert-penh, ayen-penh-akerr? 
Angwenhel-anem anewantherr-itwew ineyenhan ilek-ilek mwerr intenty alyerremwey-then, ngkwarl wayn, anter olive, pelaw-akerr? Angwenhel-anem anewantherr-itwew ineyenhan pwelek-rnem, yep-yep-rnem, nantew-rnem, pakey-akerr? Angwenhel-anem anewantherr-itwew ineyenhan irrepern-rnem, anantherrarl pwerep-anthenh, arwa arrangkwew warrkerreyew? Nthakenh ingwerentyel ilek-ilek iney-angenh-anem anewantherr-itwew, arrangkw-anem!’ Alakenh iterr-aynteyenh tharlemeley-angker yanh-rnem. 
Rernemap angkeyenh alakenh, ‘Tawen Babylon-ay! Arrangkw-anem! Ngan apmer ilkwetangkwel anenh. Aleyanap ilek-ilek mwerr-angker ngkwenh-rnem arrangkw-anem. Nga ilek-ilekek ahenty anenh, rernemap arrangkw-arem. Man ngkwenh arrangkw-anem irrew. Nthakenh inenhey-alpey-angenh, arrangkw.’ Alakenh-anyem rernem angkerl-aneyenh. 
Rernemap man akngerr innga inenh, apmer ikwer-warlarl alhenh, ilek-ilek tharlemel-aynteyew. Arleng-they rernem arerl-aneyenh. Rernemap atererreyenh, nthakenh arrer-apeny alhey-angenh, Akngeyel renh-rnem arrtyewerr arrpemarl. Rernemap artneyenh artewenty inngey, 
alakenh angkemel: “‘Pwertay! Irrepern Babylon areny-rnem! Arrangkw-anem ingkerrenh-antey! Tawen ikwer-rnem-wenh ilkwa inngarl anenh! Arnkwa arlkeny-arlkeny-warl rernem aylpenh! Arlkitwew ilek-ilek gold-penh arrernew apwert mwerr-angker-rnem-then! 
Akngeyelanap ilek-ilek mwerr-angker anamerl-antey ywerrelhelew-anemarl!’ “Akngerr ingwer-rneman kwaty alayel artarnpenhew rtnwangkwarr, man ineyew apmer arrpanenhel. Rernemap arleng-they arerl-aneyenh warrkenh ikwer-rnem-wenh-thenel. 
Kwert rernem arerl-aneyenh, arlwar anerl-aneyenh rwa ilkwa inngethey apmer ikwer-itwew. Rernemap angkerrerl-aneyenh alakenh, ‘Tawen ingwer-rneman tawen nhanyem-weny. Tawen nhenhan ilkwa ingwer-rnem-angkwarrarl.’ 
Rernemap akapwert-warl ahern arrerneyenh, rernemarl amperrngerreyenh apmer yanh-areny-rnemew, artewenty inngey artneyenh alakenh angkemel: “‘Pwertay! Irrepern Babylon areny-rnem! Arrangkw-anem ingkerrenh-antey! Akngerr ingwer-rneman apmer ikwer-warl alhenh, kwaty alayel artarnpenhemel rtnwangkwarr, ilek-ilek tharlemeleyew, man inaynteyew tawen ikwer-areny-rnem-they. Aleyan Akngeyel tawen renh ywerrelheleyelpew-anemarl!’ 
Irrwerl-areny-rnem arrantherran inkwerelhenh-arey-anem! Apmer apmwa yanh arrangkw-anem! Inkwerelhenh-arey-anem Akngey-wenh-rnemay! Inkwerelhenh-arey-anem kwertengerl Jesus-wenh-rnemay! Inkwerelhenh-arey-anem artwa angkakert Akngey-wenh-rnemay! Babylon areny-rnemelan arrenhantherrenh atwenh, pwarrk ilkwa anthemel. Aleyanap Akngeyel renh-rnem angkep atwew irrkaty-angkwarr.” 
Ikwer-penhan antyerl ilkwel apwert ilkwa irrwerlelew, kwaty alay-warl-anem iwew. Rap angkew: “Athap apwert ilkwa iwew kwaty alay-warl, raw ywerrey-alhewarl. Kel alakenh Akngeyel tawen renh Babylon ahern-warl iweyenh, ran arrangkwerreyelpeyenh. Nthakenh arey-angenh-anem. 
Angwenhel arreyn mwerr-angker aylelhey-angenh-anem apmer ikwer-itwew, arrangkw-anem. Angwenhel ketay-apeny inkwerelhemel pelayerrey-angenh-anemarl. Angwenhel terampet inkwerelhemel pelayerrey-angenh-anemarl. Arrangkw-anem, akeleyt-anem. Angwenhel ampwal mwerr-angker-rnem nthakenh mpwarey-angenh-anem ikwer-itwew. Angwenhel-anem ntang athey-angenh amernew, arrangkw-anem. 
Tawen ikwer-itwew angwenhel-anem lyenenty arrtyey-angenh-anem. Artwernem-then arelh-rnem-then nthakenh itengerrey-angenh-anem. Apmer ikwer-areny-rnem tharlemeley-angker-rnem rernem tyak innga anenh. Ingwer-rnem apmer arrpanenh-areny-rnem renh-rnem nakenh. Ngangker-akert-rnemel ingwer-rnem irrtywerl-ampernenh apmer yanh-itwew. Akngerr ingwer-rneman apmer arrpanenh-areny-rnem awelhenh ikwer-rnemew. 
Tawen Babylon-areny-rnemel ipmew renh-rnem atwenh artwa angkakert Akngey-wenh-rnem. Akngey-wenh-rnem ingkerrenh, akngerr ingwer-rnem-then rernem ipmew atwenh. Alakenh-anyem Akngeyel tawen Babylon ywerrelhelew-anem ikwer-areny-rnem-then.”