Revelation.
19.
Antyerl ilkwan angkenty-penh, atha akngerr innga awew irrwerl-itwew, ingkerrenh atayel arlkenty alakenh: “Aleleweya! Akngey nakey anantherr! Rant anyentel anenhantherrenh itethelem ipmewety! Ranap mwerr-angker, ingwer-rnem-apeny-weny, itwern-apeny arrtyernemel! Rant anyent arawerrng ilkwakert! 
Rant arraty-angkwarr ingkerrenhew apmelerr mpwarem, lipwel-antey ingkerrenh rnkernem ayernemel. Rap arelh apmwa renh arew, rarl ingwer-rnem ilanthenh apmwangkwarr, akngerr ahern-areny-rnem apmwelemel, ingwer-rnem-itwew ayntaynteyew apmer arrpanenhel. Arelh yanhel Akngey-wenh-rnem ipmew-antey atwew. Akngeyelanap renh awakelhemel atwew-anemarl.” 
Irrwerl-areny-rnem arlkew arrpemarl alakenh: “Aleleweya! Akngey nakey anantherr! Rarl tawen yanh rwa ilkwel arrtyew. Kwert-rnem arlwar anayntem intem-antey.” 
Ampwa alkenh weth-rnem 24 atnwenh iteth weth-rnem 4-then rernem ingkerrenh kwenerrew atnertel-ayeth, Akngey renh nakemel. Ran aleth anenh chair mwerr-angker ikwer-itwew. Rernemap arlkew alakenh: “Amen! Akngey nakey anantherr! Aleleweya!” 
Ikwer-penhan atha awew, ingwerentyarl arlkenty, rarl rtnenh chair mwerr-angker arrerenty. Ra alakenh arlkew: “Akngey anewantherrenh nakey anantherr! Warrkenh ikwerenh-rnemel renh nakem, rernem ikwerarl mwanty awelhem, ikwer-warl-athek mwanty ilelhemel. Ilkwernem, akely-rnem, rlterrk-rnem, rlterrk-weny-rnem-akerr; Ikwerenh-rnemel ingkerrenhel renh nakeyew!” 
Atha akngerr-anem awew, akngerr innga arlkalhelerrenh atayel innga. Awely-awely-apeny angkenh, kwaty anyerr anterreyel-apeny alyarnp inngey. Rernemap arlkalhelerrenh alakenh-anyem: “Aleleweya! Akngey nakey anantherr! Ingkart Akngey Atyetyart Ilkwa Ingkerrenhew ran alkenh aneyel ingkerrew! 
Renh inkwerelhemel nakey anantherr! Anantherr angkem ikwer, ‘Ngan ilkwarl, ingwer-rneman akelyarl!’ Akngey-wenh yep-yep akely itengerreyel-anem. Anewikw ikwerenh kel arnwarnelhew, mpwelheyel-anem ikwer. 
Akngeyel arnkwa mwerr-angker ngwampeny anthew, ra aylpeyew.” (Anantherr iterl-areyel, arnkwa yanh-rnemel warrk mwerr-angker anaynteleyel, Akngey-wenh-rnemelarl ikwer mpwarew.) 
Antyerlan angkew atyeng, “Pip ngkwenh-warl angka nhenhan ingkwerna. ‘Akngey-wenh yep-yep akelyarl itengerreyenhel, akngerr ingwer-rneman akarrerreyenh, amern akngerr inkwerelhemel kwenty arlkweyew. Akngeyan ikwerenh-rnem yangkelhew, akarrerreyew ingkerrenh-antey. Rernemap inkwerelhem ikwerew.’” Antyerl angkew arrpemarl atyeng, “Angka yanhan inngarl, Akngeyel ikwerenh-rnemew ileyel.” 
Athan awew, ayengap atnertel-ayeth kwenerrew arrwekel-ampeny antyerl-itwew. Ranap ayenh artwerelew, “Mentyaw! Alakenh kwenerrey-angenh! Ayenh nakey-angenh! Ayengan warrkenh Akngey-wenh ngapeny, ingwer-rnem angka Jesus-akertarl ileyel-rnem-apeny-then. Renhant nakaynteyew arrantherr!” Ingwerentyel angka Jesus-akert ilem, ra katy angkeyel Akngeyew arawerrng ilkwakert Inweng Mwerr-angker-wenh. 
Ikwer-penhan atha altyerr-angkwarr arew alker altywererrenty. Nantew ntwarlker-anem anamerl-antey aremerrey-alhew. Artwa anyent anerl-anenh ikwer-itwew. Akngerrel renh itnewem Akngey-wenh Inngarl Arraty Ikwer Iterreyel. Ranap ingkerrenh areyel. Rernem mwerranty aneyel apek, arrangkw apek. Aheng-arey rap apmwernemant atwem. 
Annga atherran lherrm-apenyarl ampenh, akapwert-itwew mwekart mwerr-angker atyetyart-wenh akngerr. Arlkitwew ingkwernew itna ingwer-lkwer. Ingwer-rnemel itna iterl-arey-angenh; rant anyentel iterl-areyel. 
Artwa nantew-arenyel arnkwa arlpenty-akert. Ingwerentyel arnkwa renh arrkngewarl-tangkwel pwerlp-arrernew. Itna ingweran Angka Akngey-wenharl. 
Artwa army irrwerl-areny-rnem akngerrel renh apentenh. Rerneman arnkwa ngwampeny arlter-akert-rnem. 
Arrakert ikwerenh-they tyerrelhew nayp arplenty arreylp. Nayp ikwer-akertelan rap apmwernem athenemel atwem apmer arrpanenh-areny-rnem. Ra atyetyart ikwer-rnem anerl-aneyenh. Awelhey-angenh-rneman ra atwem kerwep-akertelarl. Rap renh-rnem ipelipeleyenh, lthwenhemel grapes-apeny. Alakenh-anyem ra ingkerrenh ileyenh, “Akngey Atyetyart Ilkwa Ingkerrenhew ra ahelerreyel inngarl arrewantherr.” 
Itna ingweran iyleper anyent-itwew ingkwernew arnkwitwew-then. Itna ra Atyetyart Ilkwa Ingkerrenhew. 
Atha antyerl arew-anem, irrwerleng rtnenh ingkeny-itwew. Rap atayel arlkew thip-rnemew, alkererrenharl alker-itwew. “Apetyenh-arey arrantherr! Akarrerrenh-arey, aker-rnem arlkweyew, Akngeyelarl antheyel! 
Apetyenh-arey, arlka ipmernem-wenh arlkweyew. Artwa nantew ntwarlker-arenyel renh-rnem ipmew-antey atweyenh; atyetyart-rnem, artwa ilkwernem army-areny-rnem, artwa ilkwa ingwer-rnem, nantew-rnem, nantew-artey-rnem-akerr. Rap ingkerr ingwer-rnem-then ipmew atweyenh arrpemarl; ingwer-rnem apmer arrpanenh-areny-rnem, atyetyart-rnem, warrkenh-rnem, ilkwernem, akely-rnem-akerr. Arrantherrap renh-rnem arlkwem!” Alakenh antyerl angkew thip-rnemew, rarl irrwerleng rtnenh ingkeny-itwew. 
Ikwer-penhan atha arraylenty renh arew arrpemarl. Rarl rtnenh atyetyart apmer arrpanenh-areny-rnem-itwew. Artwa army-areny ikwer-rnem-wenh rernem rtnenherrenh arrpemarl. Rernemap artwa nantew ntwarlker-areny ikwer mpwelhenh ikwerenh-rnemew-then, ikwer-rnem-itwew atwerreyew. 
Artwa nantew ntwarlker-areny ra arraylenty renh antwerrkew. Artwa angkakert wethan, rarl irrtywerremel ilenh, renhap antwerrkew arrpemarl. Rap ilek-ilek tyak katy arnwarnenh arraylenty ikwer arawerrng apmwakert. Alakenh-anyem ra akngerr irrtywerremel ilenh, renh-rnemarl ampernew rlwangkwarr. Rernemap kwenerrenh ampwal apwert-penhew arraylenty-apeny. Artwa nantew ntwarlker-arenyel ra arraylenty artwa angkakert-then iwew iteth-anteyarl rwa ilkwewarl, kwert ikwakengarl intenh-warl. 
Rap army-areny ikwer-rnem-wenh ipmew atwew nayp arlpenty-akertel, arrakert-they tyerrelheyelel. Thip weth-rnemel kwenty arlkwenh, tyelk arlkwemel.