MATYU
Lahlag Mo Matyu Ginofena
Ohuna buk enaig esog
Ohuna ginofba Matyu enaig sihifeg autunam God Israel elim sihi wahiani eso Sisas ati enam opugug. Afa God enaig sihifena og ka elim ningihiaiba eso ma bo nem piske wambu. Ohuna lahlag moba eba mang Ju elni mungo mo. Amo, enag lahlag mo eba mungwali elni gaba fenig.
Mahim Sisas ohuna bite wa gofenaba mang so Sisasim puguna ena mom Matyu sihiageg. Afa Matyu enaig sihifiahgena mahim Sisasim afag fokwanam afa ikan ehem tigifatinibi eso ehe piske bihianam afa sisi gam fukukana.
Afa mingnag nalig mo Matyu sihiageg eba Godna bog meg mom sihig. Tok Pisinba enaig sefifig Godna Kingdom. Afa Sisas enaig gafuga ofefnaba ogna Godna bog meg mom sihiageaka. Ena bukwaba eba afawa gohug mo feg. Ena moba Sisas elim wagfufenugeg mo.
1. Afa angig mo sapta 5 fegim ikag 7 wa pugug eba enaig esog Sisas mugwa mo sihina. Afa ena nai yi Sisas enaig esona Godna elni nihe so ma enaig gohei.
2. Afa angigieg mo sapta 10 wa Sisas heafna pahlukuiag elim enaig sihifeni og elim kana mo osihigon fibi so na mang fif.
3. Afa olyi nai mo sapta 13 wa eba Godna bog meg waskwes mo.
4. Afa fignieg mo sapta 18 wa eba ahanaig nihe ini pahlukuiag el so ma fi.
5. Afa afawa gohug mo sapta 24 fegim ikag 25 wa pugug eba enaig esog awaieg osuna mang so ahanaig ahanaig puguiagef.
1
Sisasna simbianingag eba enaig eseg
1 Ena moba Sisas God Gishu Wahiag Elni simbianingam suwigig. Ehe Devitna simbianinga afa Devit Abrahamna simbianinga.
2 Abrahamna leg Aisak. Aisakna leg Jekop.
Jekopna leg Juda afa heafna nilite. 3 Judana legnigi Peres i Sera i.
Ehenigina afag Tamar. Peresna leg Hesron.
Hesronna leg Ram. 4 Ramna leg Aminadap.
Aminadapna leg Nason. Nasonna leg Salmon.
5 Salmonna leg Boas. Heafna afag Rahap.
Boasna leg Obet. Heafna afag Rut. Obetna leg Jesi.
6 Jesina leg Devit eba misog el. Devitna leg Solomon. Autunam heafna afag eba Uriana angwag.
7 Solomonna leg Rehoboam. Rehoboamna leg Abiya.
Abiyana leg Eso. 8 Asana leg Jehosafat.
Jehosafatna leg Jehoram. Jehoramna leg Aisaia.
9 Aisaiana leg Jotam. Jotamna leg Ahas.
Ahasna leg Hesekia. 10 Hesekiana leg Manase.
Manasena leg Emon. Emonna leg Josaia.
11 Josaiana leg Jekonia afa heafna nilite. Enanam Babilon el Israel elim wanahunam heafgelni bite wa wasani.
12 Mahim wasanibi Jekoniana leg Sealtiel. Sealtielna leg Serubabel.
13 Serubabelna leg Abiut. Abiutna leg Eliakim.
Eliakimna leg Eso. 14 Esona leg Sadok.
Sadokna leg Akim. Akimna leg Eliut.
15 Eliutna leg Elieser. Elieserna leg Matan.
Matanna leg Jekop. 16 Jekopna leg Josep.
Josep Mariana ligag. Afa Maria Sisasim wanigana. Sisasba sefig Krais God Gishu Wahiag El. 17 Afa Abrahamna simbianinga gohugum ikag Devit nai yi pugug eba 14 wa gohug. Afa Devitna simbianinga agfohianam enanam Babilon Israel elim ambugog wanahuna eba 14 wa gohug. Ena nai yi gofenaba God Gishu Wahiag Elbi gohna eba gwenaig eseg 14.
Maria Sisasim God Gishu Wahiag Elim wanigana
Luk 2:1-7
18 Sisas Krais, God Gishu Wahiag El, gohug mo enaig eseg ehena afag Maria ati Josepim eso wahini og ma Josepnai yi gai. Afa mas ika gana mo, afa nangunibi Maria Godna Sungwag ati enogni fena. 19 Ehena ligag Josep eba lahlag el. Ehe ogna ehem fagim wahia. Ehe mo ambagwa sihiagim kusina afa so mas Mariam ahwanef mo faina mo. 20 Josep enam onigkafnaba afa itiwa Godna ofwanai el bona ehem puguna. Enag ofwanai el esona og, “Josep Devitna simbianinga nofeka Mariam fagimba embef. Sa hig enaba enogni wanigiahba el mas enaig eseg mo eba Godna Sungwag ehe faig enag luwalba. 21 Enaba fagonai luwal wanigaf. Afa ne ehena unehlagimba Sisasim unehlig eso mungwali heafna elni amtakwalig mo hugufatinam afa ehefum wambf eso God ehengelim mas mungo faif.”
22 Enaba pugunaba Ainiyag ati Godna mo fi sihiule elni mengig wa sihi wahianaba ena moba inim puguna, mo fi sihiule el esona og;
23 “Higim, angwafig mungo angwaming awagwa ga hwainig enogni afa fagonai luwal fokwaf. Afa unehlagba Emanuelim sefif.” Ais 7:14
Enag mog unehlagba ‘God bigim wanga.’ 24 Josep ginim bihianam eso gwenaig esena Ainiyagna ofwanai el eso sihinagenaba eso ehe enag angwafigbi fana. 25 Angwafigbi fanam mas mungo kugwa ahgini mo awai isug ahfena afa eso luwal fagona waniganaba. Afa eso ehe Sisasim unehlana.
THIS IS TEST VERSION 2011-07-25.
Please report any problems with this translation. Thank you!
Dispela buk i stap redi long sekim tasol. Sapos yu lukim sampela asua, plis toksave long mipela. Tenk yu!