19
Atoin Farisis namin ranan he namouf Usif Yesus nok rais matsaos ma manporin
(Naiꞌ Markus 10:1-12)
1 Naiꞌ Yesus nanoniꞌ nrair sin on naan ate, In nnao nasaitan Galilea he nnao neu propinsi Yudea et noe Yarden in panin. 2 Too mfaun ein natuin Ee. Onaim In narekoꞌ ameent ein anbin naan.
3 Atoin Farisis fauk neman he namouf Naiꞌ Yesus. Sin nataan Ee mnak, “Tatuin hit atoran rais pirsait, atoin amatsaos, in bole nporin in fee nok ranan saaꞌ ahaa oo, aiꞌ on mee, tua?”
4 Mes Naiꞌ Yesus nataah am nak, “Hi reꞌ ia, atoin ahiin rais pirsait. Mes nansaaꞌ am es hi ka mihiin fa Uisneno In Suur Akniunꞌ ee in afan? Fin anbi retaꞌ ahun-hunut, matuꞌi mnak, ‘Uisneno nmoeꞌ mansian, atoniꞌ ma bifee.’✡ Retaꞌ Ahun-hunut 1:27, 5:2 5 Matuꞌi nteniꞌ mnak,
‘Es naan ate, atoin ii ro he nnao nasaitan in ainaf-amaf,
he nmoin nabua nekaf meseꞌ ma ansaof meseꞌ nok in fee,
fin sin nua sin njarin meseꞌ.’✡ Retaꞌ Ahun-hunut 2:24
6 Onaim karu Uisneno neikn On es reꞌ naꞌmeseꞌ sin nua sin, mansian ii kais anbatis sin!”
7 Anneen Naiꞌ Yesus naꞌuab on naan ate, atoin Farisis sin nataan antein Ee mnak, “Karu on naan ate, nansaaꞌ am es kaꞌo Musa nak, atoniꞌ bisa nporin in fee, asar in nfee suur manporin neu in fee?”✡ Surat reꞌ Naretaꞌ Nafaniꞌ Raan Aꞌhonis 24:1-4, Naiꞌ Mateos 5:31
8 Onaim Naiꞌ Yesus nataah am nak, “Kaꞌo Musa nkonan hi beꞌi-naꞌi sin nmanpoir ein nok sin feek ein, natuin sin aꞌnaak-fatun on reꞌ hi! Mes Uisneno nmoeꞌ pah-pinan ia, In sairt ii ka on fa naan. 9 Onaim Au utoon, ki mꞌak: karu bifee ji anmakaek nahuun, atoin ii bisa nporin. Mes karu bifee ji ka nmakaek fa, mes atoin ii nporin, rarit ansao ntein bifee ꞌtetaꞌ, naan makaket!”✡ Naiꞌ Mateos 5:32, 1 Korintus 7:10-11
10 Anneen In naꞌuab on naan, In atoup noinꞌ ein naꞌuab ein am nak, “Karu on naan, reko nneis kais atsao.”
11 Onaim Naiꞌ Yesus nataah am nak, “Ka neu fa he tuaf amfaun bisa ntoup saaꞌ reꞌ Au uꞌuab ee reꞌ ia. Suma tuaf reꞌ Uisneno nruur ma nreek ee. 12 Anmuiꞌ tuaf ka nsao fa, natuin naꞌko oras nahoins ee te on naan. Anmuiꞌ tuaf bian ka nsao fa msaꞌ, natuin tuaf anmoeꞌ je on naan. Ma nmuiꞌ tuaf bian anpiir ranan he ka nsao fa, natuin in suma he nanaobaꞌ Uisneno In mepu. Tuaf reꞌ bisa nahiin ma ntoup noniꞌ reꞌ ia, maut he in ntoup goe.”
Usif Yesus naꞌuab anfee tetus neu riꞌaan aꞌbaut ein
(Naiꞌ Markus 10:13-16, Naiꞌ Lukas 18:15-17)
13 Oras naan, mahoin ein naskau neik sin aanh ein neu Naiꞌ Yesus he In ntao In aꞌniimk ein ma naꞌuab anfeen sin tetus. Mes In atoup noinꞌ ein nakain mahoin ein naan. 14 Onaim In naskarak In atoup noinꞌ ein am nak, “Amkonan riꞌaan ein naan neman Kau! Kais mikainaꞌ sin! Natuin tuaf reꞌ nahuum on reꞌ sin reꞌ naan, Uisneno Iin na.”
15 Rarit In ntao In aꞌniimk ein nbi riꞌaan ein naan, ma In ntoit Uisneno he nfeen sin tetus. Rarit In nnao nasaitan bare naan.
Atoin amuꞌit naim ranan he nmoin nabar-baar nok Uisneno
(Naiꞌ Markus 10:17-31, Naiꞌ Lukas 18:18-30)
16 Neot es, anmuiꞌ tuaf es neem nataan Naiꞌ Yesus am nak, “Aam Tungguru! Au he ꞌmoeꞌ rais reko on mee, he uhiin batuur-batuur ꞌak, au bisa ꞌtaam ꞌeu sonaf neno tunan? Au he ꞌmoin ubar-baar ꞌok Uisneno.”
17 Onaim Naiꞌ Yesus nataah am nak, “Nansaaꞌ am es ho mutaan Kau nok saaꞌ es reꞌ reko? Suma Uisneno es reꞌ reko. Karu ho mroim he mmoin mok Ne te, ammoin mutuin In aprenat.”
18 Atoniꞌ naan nataan anteniꞌ mnak, “Prenat reꞌ mee?”
Onaim Naiꞌ Yesus nataah am nak,
“Kais muꞌmaet mansian;
kais ammakaek;
kais mubaak;
kais amjair saksii poi;✡ Anpoin naꞌkon Pah Masir 20:13-16, Surat reꞌ Naretaꞌ Nafaniꞌ Raan Aꞌhonis 5:17-20
19 amhormaat ho ainaꞌ-amaꞌ sin;
ma amneek ho aom-bian sin on reꞌ ho mneek ho tuam aan kuum.”✡ Anpoin naꞌkon Pah Masir 20:12, Surat reꞌ Naretaꞌ Nafaniꞌ Raan Aꞌhonis 5:16, Aꞌnaak Rais Pirsait ein sin Atoran 19:18
20 Atoniꞌ naan nataah am nak, “Preent ein naan ok-okeꞌ, au utuin aꞌrair sin. Saaꞌ es reꞌ ankuran feꞌ?”
21 Anneen on naan ate, Naiꞌ Yesus nataah am nak, “Karu ho mroim he mutuin Uisneno In roimn ein ok-okeꞌ te, mfain nai, ma mnao muꞌsosaꞌ mporin ho ꞌmuiꞌm ein ok-okeꞌ. Rarit amnao mbait roit ein meu amaꞌmuiꞌt ein. Rarit amfain uum he mutuin Kau. Fin Uisneno of anbaras anfee ko aꞌmuꞌif natho-hoen et sonaf neno tunan.”
22 Anneen on naan ate, atoniꞌ naan ntebi nfain nok neek susat, natuin in aꞌmuiꞌn ii kah een.
23 Rarit Naiꞌ Yesus naꞌuab nok In atoup noinꞌ ein am nak, “Ampirsai Kau, atoin amuiꞌt ii susa maꞌtaniꞌ henaꞌ ntaam neu sonaf neno tunan. 24 In suust ee, on reꞌ bikaes unta kouꞌ goes, antaam neu in oꞌof anpeoꞌ aent ee konan.”
25 Anneen on naan ate, In atoup noinꞌ ein ansanmakan. Onaim sin natahan am nak, “Karu on naan ate, sekau es reꞌ bisa ntaam neu sonaf neno tunan?”
26 In nkius narek-rekoꞌ sin, rarit In naꞌuab am nak, “Batuur, karu mansian ii es reꞌ anmeup, ka bisa fa. Mes karu Uisneno es reꞌ anmeup, saaꞌ-saaꞌ ii ro njair.”
27 Onaim naiꞌ Petrus namnaub am nak, “Aam! Hai mnao misaitan hai ꞌmuiꞌm ein oekꞌ een, he mituinaꞌ Ko. Onaim hai mipein saaꞌ, tua?”
28 In nataah am nak, “Ampirsai Kau! Oras Uisneno nmoeꞌ saaꞌ-saaꞌ ii ok-okeꞌ njair feꞌu te, Au, Mansian Batuur-Batuur reꞌ ia, aꞌtokoꞌ ꞌbi ꞌtokoꞌ prenat. Oras naan, hi reꞌ mituinaꞌ Kau, mtoko mbi ꞌtokoꞌ prenat boꞌes am nua, he mjair afeek rasi meu uuf Israꞌel boꞌes am nua!✡ Naiꞌ Mateos 25:31, Naiꞌ Lukas 22:30 29 Tuaf reꞌ nnao nasaitan in umi, in orif-tataf, in ainaf-amaf, in aanh ein, ma in rene, he natuinaꞌ Kau, in of antoup nafaniꞌ no nautn es. Rarit oras pah-pinan ia namsopu te, in nmoin nabar-baar nok Uisneno. 30 Onaim mimnau! Tatuin Uisneno In tenab, tuaf reꞌ naꞌnaeb in tuan, in reꞌ naan, es reꞌ tua aꞌbaut. Mes tuaf reꞌ naꞌparan in tuan ee on reꞌ atoin aꞌbaut, in reꞌ naan, es reꞌ tua aꞌnaet natuin Uisneno In tenab.”✡ Naiꞌ Mateos 20:16, Naiꞌ Lukas 13:30
✡19:4 Retaꞌ Ahun-hunut 1:27, 5:2
✡19:7 Surat reꞌ Naretaꞌ Nafaniꞌ Raan Aꞌhonis 24:1-4, Naiꞌ Mateos 5:31
✡19:9 Naiꞌ Mateos 5:32, 1 Korintus 7:10-11
✡19:18 Anpoin naꞌkon Pah Masir 20:13-16, Surat reꞌ Naretaꞌ Nafaniꞌ Raan Aꞌhonis 5:17-20
✡19:19 Anpoin naꞌkon Pah Masir 20:12, Surat reꞌ Naretaꞌ Nafaniꞌ Raan Aꞌhonis 5:16, Aꞌnaak Rais Pirsait ein sin Atoran 19:18
✡19:28 Naiꞌ Mateos 25:31, Naiꞌ Lukas 22:30
✡19:30 Naiꞌ Mateos 20:16, Naiꞌ Lukas 13:30