1 Rarit Naiꞌ Yesus nok In atoup noinꞌ ein antean nefo Galilea in panin, anbi baer jes reꞌ anteek ee te, nak Gerasa. 2-6 Anbi naan, anmuiꞌ naan atoin es anniut sae tar in namaun. In natua nbi faut naetf ein. Fai-manas in naꞌoin neu-mneem nok ao afaꞌ nkoon anbi areꞌ kneteꞌ ma ꞌnoonf ein, ma nhunun ka natfeek fa. In ntuut napapaꞌ in aon neik fatu. In maꞌtain reꞌuf. Ka tiit fa es, reꞌ bisa nfuut goe, maski npaken korenit amsaꞌ. Sin nfuut in haen-niman fani-fani npaken korenit, mes in nafeek koreent ein naan, ma niit besin naan in naꞌiup sin naꞌkon in haek ein. In ro maꞌtain reꞌuf, tar antea ka tiit fa tuaf es, reꞌ bisa ntahan naan ee.

Oras Naiꞌ Yesus sin ansanun naꞌkon kofaꞌ, aniut saes naan niit sin naꞌko aꞌroo. In npoi naꞌko faut naetf ein, ma in naen anꞌain Naiꞌ Yesus ma nriꞌtuu nbi In matan. 7-8 Oras Naiꞌ Yesus niit atoniꞌ naan ate, In naꞌuab am nak, “Hoi! Niut reꞌuf! Ampoi nai muꞌko atoniꞌ ia!”

Rarit atoniꞌ naan anhunun naher-heer am nak, “Hoi! Ho he munsaaꞌ kau? Au uhiin ꞌak Ho reꞌ ia Naiꞌ Yesus, Uisneno Akuasat In Anah. Au ꞌtoit Ko he Ho kaisaꞌ mhaꞌmuiꞌ kau, joo!”

9 Rarit Naiꞌ Yesus nataan ee mnak, “Ho kaanm ii sekau?”

In nataah am nak, “Au kaank ii naiꞌ Legion, natuin hai mfau reꞌuf, on reꞌ sorarus batalion-batalion ein!”

10 Niut reuꞌf ein anpaek atoniꞌ naan he ntoit Naiꞌ Yesus he kaisaꞌ nreun sin he npoin naꞌkon bare naan.

11 Anhaumaak bare naan, atoniꞌ fauk antitun fafi pukan kouꞌ goes. Fafin reꞌ naan sin of oniꞌ nifun nua. Sin namin amnahat anbin aꞌtoꞌef naan in abnapan. 12 Rarit niut reuꞌf ein antotin am nak, “Amreun kai he hai mnao mtaam meu fafin nee, tua.”

13 Naiꞌ Yesus antoup sin haan totis naan. Es naan ate, areꞌ niut reuꞌf ein naan anpoin ma antaman neun fafin naan. Fafi pukan naan, naen ansiksakn ok, ma nasroro nsanun npeꞌon aisanut ma nmoufun ntean niuf goe nanan. Ma sin nreem anmaten ok-okeꞌ.

14 Ankius nitan on naan ate, atiut faifn ein namtaun nmaten. Sin naenan nfuun am natefan kuan-kuan mapaumaak ein, ma natonan areꞌ too mfaun ein. Es naan ate, too mfaun ein anpoi neman he nkius nitan kuuk saaꞌ reꞌ anjarin nrair anbi naan. 15 Sin neem natefan nok Naiꞌ Yesus, ma sin niit atoin aniut saes naan antook anbi naan. Mes in teenb ee nareko nrair, ma in anpaek tais. Ma oras sin niit rasi naan sin arsin namtaun, fin sin nahinin nak sekau es reꞌ nabeiꞌ he nriuꞌ napoitan niut reuꞌf ein naꞌkon atoniꞌ naan, ro in atoin maꞌtain reꞌuf. 16 Rarit sin arsin anmaktoon ein nak sin niit nok sin maatk ein nak, atoin aniut saes naan nareko nrair, ma faifn ein anreman nmaten. 17 Rarit sin ntotin teb-tebe he Naiꞌ Yesus annao nasaitan sin pah.

18 Oras Naiꞌ Yesus he nsae nfain neu kofaꞌ naan ate, atoin aniut saes reꞌ nareko nrair naan neem ma ntoit he in bisa nnao nabua nok Naiꞌ Yesus.

19 Mes Naiꞌ Yesus anpeen. In naꞌuab neu atoniꞌ naan am nak, “Reko nneis ho mfain nai meu ho noont ein. Mutoon meu sin areꞌ kanan rasi reꞌ Uisneno nmoꞌe nrair sin neu ko. Mutoon meu sin am mak, Uisneno nneek ma nkasian ko!”

20 Rarit atoniꞌ naan annao nfuun am nateef pah es nok nain in koat ein boꞌes, reꞌ anteek ee te, nak ‘Dekapolis’. In nsaksii ma natoon areꞌ kanan rasi reꞌ Naiꞌ Yesus anmoeꞌ nrair sin neu ne. Ma areꞌ tuaf-tuaf reꞌ anneen in uaban naan ansanmakan ma naꞌuab ein nak, “Ro maꞌtaniꞌ, oo!”

21 Rarit Naiꞌ Yesus sin ansaen kofaꞌ ma anraak anfanin neun neof goe in panin. Oras sin ansanun naꞌko kofaꞌ naan, too mfaun ein neman ma nauban naan Ee. 22 Anbi kota naan, anmuiꞌ naan atoin es, in kaan ee naiꞌ Yairus. In es reꞌ aꞌnakat anbi uim onen kota naan. Oras in niit Naiꞌ Yesus, in nriꞌtuu nbi Naiꞌ Yesus In matan, 23 ma ntoit Je mnak, “Koi, Aam! Au aan feot goe feꞌ toon boꞌes am nua. In nameen ma he noi nmaet jen. Ho mkoen Om uum he mturun murekoꞌ maan au anah naan, tua!”* Suur Akninuꞌ uab Yunani ntui mnak, “Amaꞌ, amkoen om uum he mtao ho ꞌnimam meu na, maut he in nareko nfain, ma nmoin.” Anbi naan amsaꞌ, “tao ꞌnimaf” in aꞌmoufn ii nak, “mturun he murekoꞌ”. Aan feto naan in toon reꞌ nmoin naan ii, matuꞌi et eraꞌ 42.

24 Onaim Naiꞌ Yesus annao natuin naiꞌ Yairus neu in umi.

Oras sin annaon on naan ate, too mfaun ein nokan ma anbeuꞌ Goe.

25 Anbi too mfaun ein naan, anmuiꞌ bifee jes reꞌ napein funan reꞌ nroni kreꞌo-kreꞌo ka natfeek niit fa oniꞌ toon boꞌes am nua goen. 26 In narair roit nok in aꞌmuiꞌk ein he nbaen arekoꞌ meens ein. Mes ka tiit fa tuaf es bisa narekoꞌ in menas naan. In naaꞌ ii ka nheut niit fa, tar in menas naan maꞌfenaꞌ. 27-29 Bifee naan anneen fani-fani anmatoom nok Naiꞌ Yesus. Es naan ate, in nbeuꞌ too mfaun ein naan, he npaumak-maak anbi Naiꞌ Yesus In kotin. In natenab am nak, “Asar au ꞌreoꞌ ꞌaan ahaa In baru mnanuꞌ, au of ureok.”

Oras in nreoꞌ Naiꞌ Yesus In baur goe te, nok askeken, naaꞌ naan anheut. In nnaben ate in nareok goen.

30 Nateef oras naan amsaꞌ, Naiꞌ Yesus annaben ate anmuiꞌ nenuf reꞌ anpoi naꞌko In tuan. Es naan ate, In nabaniꞌ ma nkius neu too mfaun ein naan. Rarit In nataan sin am nak, “Sekau es reꞌ anreoꞌ Au baru?”

31 In atoup noinꞌ ein natahan am nak, “Ho mkius Kuum. Too mfaun sin anmabeꞌun es nok es ate, Ho mutaan am mak, ‘Sekau es reꞌ anreoꞌ Au baru?’ ”

32 Naiꞌ Yesus ankius sin meseꞌ-meseꞌ he naim tuaf reꞌ anreoꞌ In baur goe. 33 Anneen Naiꞌ Yesus nataan on naan ate, bifee reꞌ naan namtau ma naꞌtaꞌi. Rarit in nriꞌtuu nbi Naiꞌ Yesus In human ma In matan, ma nmanakuꞌ mnak, “Koi, Aam! Au es reꞌ aꞌreoꞌ ho baru naan, tua.”

34 Ma Naiꞌ Yesus antoin bifee naan am nak, “Ain! Natuin ho nekam naꞌteeb batuur neu Kau, es naan ate ho mureok. Ho mfain nai nok neek marinet, fin ho susat naan namsoup goen.”

35 Oras Naiꞌ Yesus naꞌuab feꞌ on naan ate, tuaf neman naꞌkon naiꞌ Yairus in umi, ma natoon am nak, “Eee, kasian! Ho aan feot goe, ain ee oekꞌ ein, tua. Kaisaꞌ muhaebaꞌ Uis tungguru mtein!”

36 Mes Naiꞌ Yesus ka nfairoir fa tuaf ein naan sin uabk ein. Onaim In naꞌuab neu naiꞌ Yairus am nak, “Kais mumtau! Ampirsai meu Uisneno!” 37 Rarit Naiꞌ Yesus anreun too mfaun ein ok-okeꞌ he namaik antaahn ein nbin naan. Mes In nok ahaa naiꞌ Petrus, naiꞌ Yakobus ma in orif naiꞌ Yohanis, he sin annaon nkonon. 38 Oras sin antean naiꞌ Yairus in umi, sin niit too mfaun anꞌuurs ein biru ma tainaunus humaꞌ-humaꞌ, bian ankaen, ma bian nainin. 39 Naiꞌ Yesus antaam anbi naan. In nataan sin am nak, “Nansaaꞌ am es hi mtaisiub ma mkae on reꞌ ia? Riꞌanaꞌ reꞌ ia ka nmaet fa. In suma ntuup kuun.”

40 Oras sin neen Naiꞌ Yesus naꞌuab on naan ate, sin nmanin nfaer Ee.

Rarit In nreun sin he npoin ok-okeꞌ. In noꞌen riꞌanaꞌ naan in ainaf-amaf, ma nok In atoup noniꞌ tuaf teun, rarit sin arsin antaman anbin riꞌanaꞌ naan in keꞌen. 41 Onaim Naiꞌ Yesus annaaꞌ riꞌanaꞌ naan in aꞌniman, rarit In npaek sin uab Aram am nak, “Talita kum!” (Reꞌ neik hit uab ii te nak, “Aan feto! Amfeen nai!”)

42-43 Nok askeken ate, riꞌaan feto naan anfeen ma anhaek. Naiꞌ Yesus anreek aan feto naan in ainf ee nak, “Amfee ne he naah!”

Areꞌ too mfaun ein reꞌ niit rasi naan ansanmakan. Mes Naiꞌ Yesus antaar sin nok haan maꞌtaniꞌ mnak, “Kaisaꞌ mitonan es-es mak Au umonib ufaniꞌ riꞌaan feot amates reꞌ ia!”