Rasi Mnitas neu naiꞌ Yohanis anmatoom nok
saaꞌ reꞌ of he njari nbi neon amsoput tar antea oras anjair
Pah-Pinan Mamaas Feꞌu
1
1-2 Tabe ma haan buseet naꞌko au, naiꞌ Yohanis kau, es reꞌ Yesus Kristus In aan renuꞌ-aan rekaꞌ.
Au ꞌtui ꞌbi surat reꞌ ia, anmatoom nok saaꞌ-saaꞌ reꞌ of he njarin. Au upein rasin naan on nai: Uisneno neikn On es anpukai sin ma natoon sin neu Yesus Kristus. Onaim Uisneno nreun Naiꞌ Yesus he natoon neu In aan renuꞌ-aan rekaꞌ sin. Rarit Naiꞌ Yesus anreun In ameupt es naꞌko sonaf neno tunan, he nnao nfei ma nakriraꞌ rasin ia ok-okeꞌ neu kau, he au ꞌtui ꞌain sin. Fin ka ꞌroo fa ntein ate, rasin reꞌ ia ok-okeꞌ ro he njarin. Onaim hi ro he mneen mirek-rekoꞌ Uisneno In Kabin ma Prenat reꞌ Naiꞌ Yesus natoon anrair je.
3 Areꞌ tuaf ein ok-okeꞌ reꞌ anresan tuis ein reꞌ ia tar antea tuaf bian annenan amsaꞌ, sin nꞌua rekon. Ma tuaf reꞌ natniin tuis ia in hanan, ma nmoeꞌ natuin in rais manbasan, sin nꞌua rekon amsaꞌ. Fin in oras naan he npaumak-maak he neem een.
Naiꞌ Yohanis anfee tabe ma haan buseet neu jemaꞌat hiut et propinsi Asia
4 Tabe ma haan buseet naꞌko kau ꞌeu Uisneno In jemaꞌat hiut etan propinsi Asia.
Au ꞌtoit he Uisneno nakriraꞌ In nekan arekot neu ki, he hi bisa mmoni mbi mamut, rameꞌ es nok es, ma taininaꞌ. Fin naꞌko unuꞌ te, Uisneno nain, tar ntea oras ia, ma tar antea nabar-baar. Au ꞌtoti msaꞌ he In Asmaan Akninuꞌ nakriraꞌ In nekan arekot neu ki, he hi bisa mmoni mbi mamut ma ao-minaꞌ. Au ꞌkius Asmaan Akninuꞌ naan, nahuum on reꞌ smanaf hiut reꞌ anbaisenun neu Uisneno In aꞌtoko prenat.* Tuis anbi uab Yunani nbi reꞌ eraꞌ ia nak, “smanaf hiut reꞌ nbaisenun neun Uisneno In aꞌtoko prenat”. Tatuin atoin ahinit anbi Suur Akninuꞌ, hiut reꞌ naan, in aꞌmoufn ii, es reꞌ: rais manokab ma namtiis. Es naan ate, ahinit bian nak, anbi reꞌ smanaf hiut ein reꞌ ia, sin aꞌmoufk ein nak, Uisneno In Asmaan Akninuꞌ. Nok ranan naan, anbi eraꞌ 4-5 reꞌ ia, naiꞌ Yohanis naꞌuab anfee tetus naꞌko 1) Uisneno, naꞌko 2) In Asmanan, ma naꞌko 3) Yesus Kristus. ✡ Anpoin naꞌkon Pah Masir 3:14, Rasi Mnitas neu naiꞌ Yohanis 4:5 5 Au ꞌtoti msaꞌ he Yesus Kristus nakriraꞌ In nekan arekot neu ki, he hi bisa mmoni mbi mamut, rameꞌ es nok es, ma taininaꞌ. In naꞌuab piut-piut ma maat-maat anmatoom nok saaꞌ-saaꞌ reꞌ Uisneno natoon neu Ne. Unuꞌ te, In nmaet batuur-batuur, mes Uisneno namonib nafainꞌ Ee, he In njair tua unu reꞌ anmoni nfain naꞌko ꞌmaten. In anjair Aꞌnaak Usif amsaꞌ neu areꞌ kanan usif anbi pah-pinan.
Natuin Naiꞌ Yesus anneek kit, es naan ate In natꞌopab In naaꞌ ee nasai neu kit. Nok ranan In aꞌmaten naan, In anfei ranan he nsoi nafetin naan kit naꞌko hit saant ein sin kuasan.✡ Naiꞌ Yesaya 55:4, Siit Pures-Boꞌis sin 89:27 6 Rarit In nait nanaib kit atjair In too ngguin, maut he hit tmeup teu In Amaf, Amaꞌ Uisneno. Yesus Kristus ro mapinaꞌ-makrahaꞌ, ma In kuasa naan ka natfeek niit fa. Batuur, tua!✡ Anpoin naꞌkon Pah Masir 19:6, Rasi Mnitas neu naiꞌ Yohanis 5:10
7 Onaim amkius mirek-rekoꞌ! Oras ia, Naiꞌ Yesus ma In Amaf etan sonaf neno tunan. Mes ka ꞌroo fa te, In nsaun neem anbi nope. Mansian pah-pinan ia ok-okeꞌ of niit Ee. On naan amsaꞌ neu tuaf reꞌ sin napau Goe afi unuꞌ. Onaim areꞌ uuf ma pah nbin pah-pinan ia nmeiꞌ jok ma ankaen pin-piuns ein, natuin sin nahiin Je. Rasin reꞌ ia ok-okeꞌ ro he njarin batuur-batuur. Namneo on naan, tua!✡ Naiꞌ Danial 7:13, Naiꞌ Mateos 24:30, Naiꞌ Markus 13:26, Naiꞌ Lukas 21:27, 1 Tesalonika 4:17, Naiꞌ Sakarias 12:10, Naiꞌ Yohanis 19:34,37
8 Uisneno nak,
“Au reꞌ ia,
Alfa ntea Omega.
Au reꞌ ia,
A ntea Z.
Areꞌ saaꞌ-saaꞌ ii, sin naꞌuun ma naꞌbaꞌan naꞌko Kau,
anmurai naꞌko ahunut tar antea amunit.
Au es reꞌ ꞌbi ꞌain ia naꞌko unuꞌ.
Au es reꞌ oras ia.
Au es reꞌ ꞌbi oras amnemat tar antea nabar-baar.
Fin Au kuuk es reꞌ akuaas reꞌuf!”✡ Rasi Mnitas neu naiꞌ Yohanis 22:13, Anpoin naꞌkon Pah Masir 3:14
Naiꞌ Yohanis niit Mansian Batuur-Batuur
9 Natuin hit ar-arkit atpirsai ok-okeꞌ tak, Naiꞌ Yesus naan hit Usif, es naan ate, au ꞌjair hi aok-bian. Anmuiꞌ tuaf bian natoꞌon, natuin hit tatuin Naiꞌ Yesus, onaim sin nhaꞌmuiꞌ kit ok-okeꞌ. Mes Naiꞌ Yesus anhaꞌtanin nrair hit nekak, he hit bisa taran ma ttahan piut-piut. Natuin au utoon urair ꞌeu tuaf-tuaf anmatoom nok Uisneno In Kabin ma Prenat, ma unoniꞌ anmatoom nok Naiꞌ Yesus, anmuiꞌ tuaf reꞌ nsaken. Etun oras ia sin nheek kau ma nporin kau neu puru reꞌ ia, kaan ee Patmos. 10 Neot es, nateef nok neon onen, Uisneno In Asmanan neman kau. Nok askeken ate, au ꞌneen hanaf es maꞌtain besi neem naꞌko au kotik. In haan ee nahuum on reꞌ haan toꞌis. 11 Hanaf naan anreek kau mnak, “Yohanis! Au he ukriraꞌ ko rais jes. Saaꞌ-saaꞌ reꞌ ho miit sin, ho ro he mtui sin. Rarit ho msonuꞌ sin meu jemaꞌat hiut, esan reꞌ jemaaꞌt ein abitan kota Efesus, kota Smirna, kota Pergamus, kota Tiatira, kota Sardis, kota Filadelfia, ma kota Laodikia.”
12 Au ꞌneen on naan ate, au ꞌniik he uhiin ꞌak sekau es reꞌ naꞌuab nok kau. Mes au ꞌiit ahaa pauk anaꞌ hiut, reꞌ nateek sin anbin paku ꞌtokof naꞌko noni mnatuꞌ. 13 Ma Atoniꞌ es anhake nbi pakun naan sin atnaank ein. In maasn ee Mansian Batuur-Batuur. In npaek baru mnaun es, reꞌ in amnaun ee ntean in haen, ma nasaah pouk noin jes. Poꞌuk naan napeo goe npeoꞌ in aꞌbasan.✡ Naiꞌ Danial 7:13, 10:5 14 In aꞌnaak fuun ein muit okas.† Uab Yunani matuꞌi mnak, “In aꞌnakan ma In moof ein, on reꞌ funuꞌ naꞌko ꞌbib-kaes mutiꞌ, ma mutiꞌ on reꞌ salju.” Rais noon nuaꞌ ein reꞌ ia, naruruꞌ rasi piis es, es reꞌ mutiꞌ ma kninuꞌ batuur. In maatk ein npinan on reꞌ ai.✡ Naiꞌ Danial 7:9 15 In haek ein, anpinan on reꞌ beis meꞌe reꞌ atuut beisn ee nout goe ma meeꞌ rare. In haan ee, naꞌruꞌu on reꞌ oe ꞌboniꞌ.✡ Naiꞌ Danial 10:6, Naiꞌ Yeskial 1:24, 43:2 16 Anbi in aꞌniman aꞌneꞌu, in nnaaꞌ kfuun hiut. Suin es ꞌaikaf nua anpoi naꞌko In fefan. In huumn ee npiin on reꞌ manas.
17 Oras au ꞌiit Atoniꞌ naan, au ꞌtaikoib on reꞌ atua-mafut, anbi In haen. Mes in nreok kau neik In aꞌniman aꞌneꞌu, rarit In naꞌuab am nak, “Anah! Kais mumtau! Natuin areꞌ saaꞌ-saaꞌ ii sin naꞌuun ma naꞌbaꞌan naꞌko Kau, nmurai naꞌko ahunut tar antea amunit.✡ Naiꞌ Yesaya 44:6, 48:12, Rasi Mnitas neu naiꞌ Yohanis 2:8, 22:13 18 Unuꞌ te, Au ꞌmaet, mes oras ia ho miit kuum! Au ꞌmoni ꞌfain, ma Au of aꞌmoin piut tar antea nabar-baar. Au es reꞌ anaaꞌ ꞌretuꞌ-ꞌfoꞌe, reꞌ bisa ꞌreut ma ꞌfoe bare neu amaets ein, he umonib ufaniꞌ sin. 19 Ho ro he mtui areꞌ saaꞌ-saaꞌ reꞌ ho miit sin oras ia, ma mtui saaꞌ-saaꞌ reꞌ of he njarin. 20 Au utoon ꞌain ko in aꞌmoufn ii on nai: pauk noin hiut ein naan, in aꞌmoufn ii, jemaꞌat hiut. Ma kfuu hiut ein reꞌ ho miit sin anbin Au ꞌnimak aꞌneꞌu, es reꞌ ameput neno tunan tuaf hiut reꞌ neikin hanaf naꞌkon Uisneno neu jemaꞌat hiut reꞌ naan.”
*1:4 Tuis anbi uab Yunani nbi reꞌ eraꞌ ia nak, “smanaf hiut reꞌ nbaisenun neun Uisneno In aꞌtoko prenat”. Tatuin atoin ahinit anbi Suur Akninuꞌ, hiut reꞌ naan, in aꞌmoufn ii, es reꞌ: rais manokab ma namtiis. Es naan ate, ahinit bian nak, anbi reꞌ smanaf hiut ein reꞌ ia, sin aꞌmoufk ein nak, Uisneno In Asmaan Akninuꞌ. Nok ranan naan, anbi eraꞌ 4-5 reꞌ ia, naiꞌ Yohanis naꞌuab anfee tetus naꞌko 1) Uisneno, naꞌko 2) In Asmanan, ma naꞌko 3) Yesus Kristus.
✡1:4 Anpoin naꞌkon Pah Masir 3:14, Rasi Mnitas neu naiꞌ Yohanis 4:5
✡1:5 Naiꞌ Yesaya 55:4, Siit Pures-Boꞌis sin 89:27
✡1:6 Anpoin naꞌkon Pah Masir 19:6, Rasi Mnitas neu naiꞌ Yohanis 5:10
✡1:7 Naiꞌ Danial 7:13, Naiꞌ Mateos 24:30, Naiꞌ Markus 13:26, Naiꞌ Lukas 21:27, 1 Tesalonika 4:17, Naiꞌ Sakarias 12:10, Naiꞌ Yohanis 19:34,37
✡1:8 Rasi Mnitas neu naiꞌ Yohanis 22:13, Anpoin naꞌkon Pah Masir 3:14
✡1:13 Naiꞌ Danial 7:13, 10:5
†1:14 Uab Yunani matuꞌi mnak, “In aꞌnakan ma In moof ein, on reꞌ funuꞌ naꞌko ꞌbib-kaes mutiꞌ, ma mutiꞌ on reꞌ salju.” Rais noon nuaꞌ ein reꞌ ia, naruruꞌ rasi piis es, es reꞌ mutiꞌ ma kninuꞌ batuur.
✡1:14 Naiꞌ Danial 7:9
✡1:15 Naiꞌ Danial 10:6, Naiꞌ Yeskial 1:24, 43:2
✡1:17 Naiꞌ Yesaya 44:6, 48:12, Rasi Mnitas neu naiꞌ Yohanis 2:8, 22:13