51
A ahi noi Devet. A tomtomuei buegerigeri. I tangaloi leo ligoligogi Natan, u vumai lobena, lo tagugi i Devet u vei na doridori esi mei Batsiba.
1 Huqe Mauri go hagavi eu na huri na nomu vaigarea lawua
huri na nongu doridori esi.
Lo nomu hahagavi gon lai vohogi
na nongu asiana.
2 Gon solo vohogi na nongu asiana doluegi,
me go vagahagi eu dena na bugungu doluegi.
3 Ba huri nau ilo na nongu doridori esi mei eu,
siu a bugungu mo eno mei eu vataha na tarogi.
4 Siu nigo hogosie nau vagasile vovohigo
me nau vei na gineu esi lolo matamu.
Tavohe gom lanqa, u vovohoi,
me tavohe gom vevegi na tangaloi u vovohoi.
5 A hogo nau vora lolo asiana siu neu
a nongu galegale asi lungu tavohe i retahigu mo tinogi eu
6 Gu tarave na hogo lolo loloi tangaloi,
me gu huhui eu gena lolorani lolo buloi dimwangogu.
7 Vagahagi eu gena digugu* 51.7 Hisob a rivurivu dam vuie lolo dai. Mo tuliana lo gineu sige tangaloi, mo gogonagi nire me mo solo vohogi bugure. me neu nain mwasara,
solo vohogi na nongu asiana me neu nain mevute vin liu na vire hi a wagahiata.
8 Vai eu na rongarea me na havuhevu.
Siregi na hui gu momogagi nire ra havuhevu.
9 Vunigi na nagomu dena nongu asiana
me go hara vohogi na nongu doridori esi doluegi.
10 O Huqe Mauri, go vai na lolo lolongu, a dimwango mwasara,
me go vai na tanumwe garaqa huire lolo lolongu.
11 Mese tuli vohogi eu denigo,
me go mese lai vohogi na nom Tanumwe Gogona deni eu.
12 Gon bete muleagi lawe au a hahavusi na nom vaga mwasoana,
me gon bete na nom tanumwei tabetabe na gaiture au.
13 Siu neu nain huhui na tangaloi esi kena nom leo
me ngere rain tudori su lobemu.
14 O Huqe Mauri, Huqe Mauri nigo nongu vagamwasoi,
go vagamwasoi eu dena dai,
siu neu nain huri na ahi hahavusiana
huri na nomu vovohoiana.
15 Huqe, go tagahi na singogu
siu a wawagu vin ware hagegi na henamu.
16 Huri nigo gom rahagi na bulengu kankarue nam hogohogo lawego,
siu nigo goin hevuhevu tea lo nongu hure bonboni.
17 A hogohogo, O Huqe Mauri, a tanumwegi u mevurivuri
me a dimwangona mo hahagavi.
O Huqe Mauri, go mese tudori denie.
18 Go vai na gineu garea lawe na Saeon; mwerehi gom taranie.
Go hagovi na qetuqetu goro na Jerusalem.
19 Siu a hogohogo rau vovohoi,
a hure bonboni bulugi dodoluegi vin veigo goin hevuhevu,
me a bulugi boegi doluegi rain hureana lo nom vonda gogona.
*51:7 51.7 Hisob a rivurivu dam vuie lolo dai. Mo tuliana lo gineu sige tangaloi, mo gogonagi nire me mo solo vohogi bugure.