Siona.
2.
Melele xa Siona de vang meseo ak, xi misis mi Iahova, Hi nan, bit, 
“O Iahova, melele xa longpangasien navan mei mahulong pupu natekei tehat minuk li, e xouk oteteong ni nou e otetutou ni nou. Melele xa natenemi natehit di nabe von maten, natetakesuk, e xouk oteteong ni nou li. 
Xouk oteso nou natehe mesavuol e natemerir natehe huinep te tas. E inggak, tas teta xol nou e tahe xil mun latekilkiles ni nou. 
Natenemi natehit otesil rat nou natehe relinguk, e ninapus ti mun Nim Eo nam. 
Tas teta xol nou, natemerir natehe tan e lulum te tas tevar xat vatuk. 
Natehe tan teha vuma … natetuxoh vatit hu xil xa ladi pe tas, e natelonge lehit ngan xa natetuxoh von maten e nateta tuok. E xouk Iahova, Hi navan, otemei sung otehur rat nou ra pe tas ak tengan nameul rilomun. 
O Iahova, melele xa natelonge texoni ngan xa meulien navan sangas vavus, natenem rilomun ni xouk. Natesis tehat minuk, e otelong nou e Nim Eo nam. 
Ngan xil xa di lamot mi nanao votei xil, xil di lastokovein xouk xa obe vatit hosien nae. 
E inou, ti nikikei minuk itel memesien, e nisa sanien eo tei ihat minuk. Naha xa natehit xati minuk tengan nipol ni, nipol sen ni. O Iahova, xouk kestang di oteh meulien e moletin xil.” 
Melele xa Siona misis bus, Iahova misemae ni meseo ak tengan vahe ut. Ma meseo ak ba, miluh rat Siona be suhon.