2 Tesalonaeka.
1.
Inou Pol, del Saelas xal Timoti, matdis uvei ak mi xamim, moletin xil na Hi Tamer e na Suv Iesu Kristo xa mudi e sias te hal Tesalonaeka. 
Matsis mi Hi Tamer e mi Suv Iesu Kristo tengan lalisa eheien hos e tomat nalu mei iti e meulien namim. 
Tuxoli e hinoxoli nametel xil, vehakut di matomes Hi ve xamim. E momal tengan matopol ni vamak vengan xa neketen namim di bemei nggeih mu e xamim kekes di mupisen eheien mak mu mi xamim mun tang. 
Mak, ma xametel di matsep koai usil xamim mi Kristin xil e sias xil vus na Hi. Mattumul mi xil usil rin xa di musoh nggeih e neketen namim, tave ti neta xa di munggur sakpurunien e pangasien xil holu. 
Melele xa di musoh nggeih e neketen namim mak, di mupisen ni xa nenemien xil na Hi momal tevi melele xa di maen xamim mubisu ni holesok xil ak tengan vasak ni xamim mupin tengan muve moletin xil xa mudi pe lelaxatien nan. E di mubisu ni longpangasien xil ak vengan xa mube nan. 
Hi momal, e isa rilomun ni pangasien mi ngan xil xa di lasa pangasien mi xamim. 
E isa ngengelen mi xamim xa di munggur pangasien e mi xamem mun. Ipol ni e melele xa Suv Iesu istal ixo ut nesao imei itel masxaxa te xeih nan xil. 
Xil limei etan itel upang te xeih tengan lisa pangasien mi ngan xil xa labit linakil ti Hi e mi ngan xil xa labit linalong xat ti longeongen hos usil Suv Iesu. 
Melele xa Hi ilepis rin nae ivus, isa pangasien xa misakras vavus mi xil. Imak, ma xil liti sotin ra minehinen te xeihen na Suv Iesu vehakut xa vehakut tang. 
Holesok xil ak mei listal e melele xa Iesu imei rilomun en tengan moletin nan xil lipet rat hisen ihe nesao. Reitin, ngan xil xa lateling neketen nae en lipusi e limesep ve minehinen nan. E xamim mun muti vituei itel moletin nan xil ak vengan xa muteke reitin e sepinien xa mattehiteni mi xamim. 
E vengan xa iemetel bei pupu tengan xamim muti vituei itel moletin xil ak, di matsis mi Hi nar ve rin namim tengan ipol ni xamim mupin tengan muhur meulien xa tekes xamim tengan muhuri. Matsis mun xa, ixo xeihen nan, xi isak ni xamim mukila mupol sen holesok xil xa bos xa ien bei tengan mupol ni vengan xa muteling neketen namim e Iesu Kristo. 
Di matsis ve holesok xil ak tengan ngan xil xa di lapus naha xa Suv Iesu di pol ni e meulien namim lipetrat hisen ven. E xi sung ipet rat hisemim. Matkila xa holesok xil ak istal ihusil eheien hos na Hi nar e na Suv Iesu Kristo.