3
Wa Joadec Jon me je qasali maaden
(Matju 3.1-12; Mak 1.2-8; Jon 1.19-28)
1 Saen euna cabi gel 15docna Taibirias Sisa uqa Rom agena cofdoc dana bilen. Saen euna ha Pontias Pailat uqa gabman dana Judia hatu agena ilo bilen. Odocob Herod uqa Galili hatu agena ilo bilen. Odocob uqa waliag, Filip, uqa Ituraia Trakonaitisca hatu alena ilo bilen. Odocob Laisenias uqa Abilini hatu nag agena ilo bilen. 2 Odocob Anas Kaiafasca ale ihanec dana agena ilo bilesin. Saen euna Jon, Sekaraia melah, uqa wadauna bibilen Anut uqana je uten. 3 Odocob Jon uqa cajimei Jodan wana isec hatu eu cunugca uqa cobimei maaden, “Agena silailnu tului falicdumeig wa joadec oiga. Odi odocobilfi Anut uqa agena silail cagasiadigian,” aden. 4 Eu odi weleca je hahun madec dana Aisaia uqana bukna jaqen Jon uqa odi toodu odon:
“Dana jejeg oso uqa wadauna bibili utai maadena,
‘Tibudna jic saciadoiga.
Uqana jic tutuc mudeiga.
5 Asou cunug age wa wewel tahaloqagan.
Aluh benbenca aluh nagnagca eu cunug qetecebil ni tutuc migian.
Jic gongin eu cunug sosolaig muduqagan.
Odocob jic toni tobi eu jocosaig muduqagan.
6 Odocob dana cajaca cunug age Anutna cahahaadec eu foqagan!’ adena,” en. (Aisaia 40.3-5)
7 Odocob dana am mati bahic age Jon wa joadigiannu uqaca hoin. Odocob uqa maaden, “Age man sononec nag me qee! In Anutna gemag bec jawe hugia odona euna age busaleiga ec maadeia? 8 Agena silailnu mele bahic culimeig tului falicdumeig Anutna je qee tefacdoginanufi me odoc oso odoiga eu ihacteiga. Euqa ija mele maadigina, Anut uqa meen ene nijegina cedimei Ebraham talacul euna madecnu ihoc. Eunu age cain sanan mimi madowain, ‘Ebraham ege asige. Eunu Anutna gemag bec egeca qee hoiaun,’ owain. 9 Sapol na gug qetecnu wele taweia. Na cunug aig me qee qona age qetimeig jana heloqagan,” aden.
10 Odocob dana cajaca am age sisildoin, “Eunu ege eeta odeqan?” doin.
11 Odocob uqa jejenega hewi maaden, “In oso uqa lotoc lecisca uqa dana oso eundecca qee lotoc oso utigian. Odocob in oso sabca bilina uqa dana sabca qee eundec uqana sab cesawiadaga,” aden.
12 Odocob takis cedec dana leih ageha wa joadecnu hoin. Odimeig age sisildoin, “Iwalgec, ege eeta odeqan?” doin.
13 Odocob uqa jejenega hewi maaden, “Age um gauc cain cedowain. Age Rom agena loo je gadacna himec cedeiga,” aden.
14 Odocob han dana ageha sisildoin, “Egenu eu adi? Ege eeta odeqan?” doin.
Odocob uqa jejenega hewi maaden, “Age cain uhuli um aaqi meen qaig cawaladowain. Agena cabi ameg ogina eu ihoc ec cisdoiga,” aden.
15 Odocob dana cajaca age saen euna Anutna Krais eu hugia agena cisdoc bibilen Jonnu geh bahic cisdoin. Odocob age Jonnu wawagana madein “Anutna Krais eu uqafa?” ein. 16 Odocob Jon uqa cunug je maaden, “Ija age wana wa joadigina qa oso hib tooti hona, uqana gagadic odoc ijana gagadic odoc wooldona. Uqa dana ben meca bahic. Ijaqa uqana jaih tacec halu cufalitocnu dana me bahic ihoc qee. Uqa age Kis Gunnaca janaca wa joadigian. 17 Uqa sawolca hona. Sawol euna wit aig cunug eeldocnuca, wit aig uqana jo bisna mecnuca hona. Euqa uqa witna tetec ja qee cafulina euna manigian,” aden.
18 Odocob jic mati bahicna Jon uqa dana cajaca me jena wawaga huhuni maaden.
Herod uqa Jon gihacdoc jona muden
19 Euqa saen euna Herod gabman ilo uqa waliag aideg, Herodias, on. Odocob Jon uqa Herod galac mudi madon, “Hina walin aideg om. Hina cahuldom,” don. Uqa ceteteh me qee mati bahic odon eunu Jon uqaha galac mudi madon. 20 Odocob eu toodocob uqa me qee odoc ben oso haun odon. Uqa Jon gihacdoc jona tacen.
Jon uqa Jisas wa jouden
(Matju 3.13-17; Mak 1.9-11)
21 Odocob Jon uqa dana cajaca cunug wa joadi hedumei uqa Jisasha wa jouden. Saen euna Jisas Anut inondodon sao ohis jic cebec huden. 22 Odocob Kis Gun cuhudid fecwe nimei Jisasca bilen. Odocob jejeg oso sao ohisdec camas mi madon, “Hina ija melami nalunin migina. Ija hinanu wawi ben ceelena,” don.* Grik jaqec je hilah leihna age je oso tubdu jaqein eu odi: “Qila hina ija melami maga,” en.
Jisasna sihulnu ijanaga
(Matju 1.1-17)
23 Odocob Jisas uqana cabi sanan men saen euna uqana cabi gel gadac eu 30 odi. Dana age odi cisdoin uqa eu Josef melah.
Josef uqa Hilai melah.
24 Hilai uqa Matat melah.
Matat uqa Liwai melah.
Liwai uqa Melkai melah.
Melkai uqa Janai melah.
Janai uqa Josef melah.
25 Josef uqa Matataias melah.
Matataias uqa Emos melah.
Emos uqa Neam melah.
Neam uqa Eslai melah.
Eslai uqa Nagai melah.
26 Nagai uqa Meat melah.
Meat uqa Matataias melah.
Matataias uqa Semen melah.
Semen uqa Josek melah.
Josek uqa Joda melah.
27 Joda uqa Joanan melah.
Joanan uqa Resa melah.
Resa uqa Serababel melah.
Serababel uqa Sialtiel melah.
Sialtiel uqa Nerai melah.
28 Nerai uqa Melkai melah.
Melkai uqa Edai melah.
Edai uqa Kosam melah.
Kosam uqa Elmadam melah.
Elmadam uqa Er melah.
29 Er uqa Josua melah.
Josua uqa Eliesa melah.
Eliesa uqa Jorim melah.
Jorim uqa Matat melah.
Matat uqa Liwai melah.
30 Liwai uqa Simion melah.
Simion uqa Juda melah.
Juda uqa Josef melah.
Josef uqa Jonam melah.
Jonam uqa Elaiakim melah.
31 Elaiakim uqa Melia melah.
Melia uqa Mena melah.
Mena uqa Matata melah.
Matata uqa Netan melah.
Netan uqa Dewid melah.
32 Dewid uqa Jesi melah.
Jesi uqa Obed melah.
Obed uqa Boas melah.
Boas uqa Salmon melah.
Salmon uqa Nason melah.
33 Nason uqa Aminadab melah.
Aminadab uqa Atmin melah.
Atmin uqa Anai melah.
Anai uqa Hesron melah.
Hesron uqa Peres melah.
Peres uqa Juda melah.
34 Juda uqa Jekob melah.
Jekob uqa Aisak melah.
Aisak uqa Ebraham melah.
Ebraham uqa Tira melah.
Tira uqa Neho melah.
35 Neho uqa Serak melah.
Serak uqa Reu melah.
Reu uqa Peleg melah.
Peleg uqa Ebe melah.
Ebe uqa Sela melah.
36 Sela uqa Kenan melah.
Kenan uqa Apaksat melah.
Apaksat uqa Siem melah.
Siem uqa Noa melah.
Noa uqa Lamek melah.
37 Lamek uqa Metusala melah.
Metusala uqa Inok melah.
Inok uqa Jaret melah.
Jaret uqa Mahalalel melah.
Mahalalel uqa Kenan melah.
38 Kenan uqa Inos melah.
Inos uqa Set melah.
Set uqa Adam melah.
Adam uqa Anut melah.