1 Vanco juu xuee nuincoꞌ xee na vejndyee soanan, juu María, tsan tsjoon Magadán, tyjeeꞌnon juu na vaa tsiꞌtsꞌuaꞌñeen. Ndoꞌ jndyiaaꞌ jon na jndë tendyaaꞌ juu tsjöꞌ na tëꞌ ꞌndyohanꞌ. 2 Yajoꞌ jnannon tsanꞌñeen, ja na jen ventyjii Jesús, tja jon naijon na mꞌan yo juu Simón Pedro. Itso jon ndë́:

—Juu siꞌtsꞌo ꞌnaanꞌ ta Jesús, jndë tjiꞌ nnꞌanhanꞌ quityquiiꞌ tsiꞌtsꞌua, min tyiꞌquindiö́ yuu jon tquenhan jon.

3 Xjenꞌñeen jntꞌuí, sá yo Pedro. Squë́ naijon vaa tsiꞌtsꞌuaꞌñeen. 4 Ndoꞌ ninncüii sá, jnanꞌnö́n, majoꞌ jndeintyi jnannön, chichen Pedro. Ngꞌe joꞌ ja tuë jndyëë naijon vaa juu tsiꞌtsꞌuaꞌñeen. 5 Jndondyi, jntyꞌia juu ndiaa na jnanꞌcüetyjo nanꞌñeen Jesús, minndyuaahanꞌ quiiꞌ tsiꞌtsꞌuaꞌñeen, majoꞌ tyíꞌcjöcꞌë. 6 Majoꞌ nquii Simón Pedro, vi na jndë tueeꞌ jon na tantyja jon toxꞌën, taqueeꞌcya jon quityquiiꞌchenhanꞌ. Ndoꞌ jndyiaaꞌ jon joo ndiaaꞌñeen na tovetyjohanꞌ Jesús, minndyuaahanꞌ joꞌ. 7 Mantyi juu ndiaa na tëꞌ xquen Jesús, ntjii jonhanꞌ na tacüetyenhanꞌ yo ndiaa na tovetyjohin, vequityen ndyaꞌhanꞌ, totye yahanꞌ. 8 Yajoꞌ ja Juan na tuë jndyëë, ncö na matsijön yo tsꞌian na tꞌion Jesús já, tyjëcꞌë tyquiiꞌ juu tsiꞌtsꞌuaꞌñeen. Jntyꞌia nnön na nndaꞌ vaa, ndoꞌ juu xjenꞌñeen tëntyja tsꞌön na vandoꞌ xco Jesús. 9 Ee juu xjenꞌñeen ninvaa tataaꞌ nꞌö́n juu jñꞌoonꞌ Tyoꞌtsꞌon na jndui na itsiquindyihanꞌ na chuhanꞌ na ninncyaa jon na ngüandoꞌ xco Jesús. 10 Ndoꞌ ve já jntꞌuí na vaa tsiꞌtsꞌua. Santcüꞌë́ vꞌaa.

11 Majoꞌ juu Maríaꞌñeen, minntyjeeꞌchen jon ngiaaꞌ tsiꞌtsꞌuaꞌñeen, na itꞌioo jon. Ndoꞌ viochen xjen na itꞌioo jon, jndondyi jon na jndyiaaꞌ jon tyquiiꞌhanꞌ. 12 Joꞌ jndyiaaꞌ jon ve ángeles, quichiꞌ jndyi ndiaa cüehan. Ncüii tsanꞌñeen vequityen jon tontyja na nintꞌoon xquen Jesús ndoꞌ cüiichenhin vequityen jon tontyja na nintꞌoon ngꞌee Jesús. 13 Ndoꞌ taꞌxeeꞌhan nnon Maríaꞌñeen:

—ꞌUꞌ tsanscu, ¿Ndu matꞌioꞌ?

Tso jon ndëëhan:

—Tyeyꞌon nnꞌan nquii jon na conduihin na ityeꞌntjon jon ja, ndoꞌ min tyiꞌquintji yuu jon tquenhanhin.

14 Ndoꞌ vi na jndë tso jon na nndaꞌ, yajoꞌ tequen jon, jndyiaaꞌ jon na ventyjeeꞌ Jesús joꞌ, majoꞌ tyíꞌcüajnaanꞌ jon na aa nquii Jesús tsanꞌñeen. 15 Yajoꞌ tso Jesús nnon jon:

—ꞌUꞌ tsanscu, ¿Ndu na jen matꞌioꞌ? ¿Nin tsꞌan mantꞌueꞌ?

Sijoonꞌ jon Jesús na juu tsan na vantyjeeꞌ ntjonꞌñeen. Joꞌ tso jon:

—Nndaꞌ ta, xe na aa ꞌuꞌ teyonꞌhin, quitsuꞌ nnön yuu jon tyiꞌhin, ndoꞌ ncjöyꞌönhin.

16 Tso Jesús:

—María.

Ndoꞌ vi na jndë jndyii jon na tjiꞌ Jesús xueeꞌ jon, yajoꞌ tequen jon. Tꞌa jon yo jñꞌoon na conanꞌnein nnꞌan judíos, tso jon:

—Rabóni. Juu jñꞌoonꞌñeen itsiquindyihanꞌ tsꞌan na tsiꞌman jñꞌoonꞌ Tyoꞌtsꞌon ndëë ntyje.

17 Tso Jesús nnon jon:

—Tyiꞌntꞌuiꞌtyenꞌ ja, ee vitjachen na ncjöva na mꞌaan Tyëhöꞌ. Majoꞌ cjaꞌ ntcüeꞌ na quitsiquindyiꞌ joo nnꞌan na cotsayꞌon jñꞌoon yo ja. Quitsuꞌ ndëëhan na jöva na mꞌaan Tyëhöꞌ na mantyi conduihin Tyehoꞌ. Jö na mꞌaan Tyoꞌtsꞌon na matsitꞌmanꞌ ja ndoꞌ na conanꞌtꞌmaanꞌhoꞌ.

18 Ndoꞌ juu Maríaꞌñeen, tsan tsjoon Magadán, tja jon, tatsiquindyi jon já nnꞌan na tqueenꞌ ta Jesús na quitsayꞌö́n jñꞌoon yohin yo tsꞌian na totsꞌaa jon. Tso María ndë́ jñꞌoon na jndë sinin Jesús yohin ndoꞌ na jndë jndyiaaꞌ nnon juu nquii jon.

19 Majuu tman xuee nuincoꞌñeen, já nnꞌan na tqueenꞌ Jesús, tëncüi já. Tyen tꞌë́ jndyuentꞌaa veꞌ ngꞌe na ncyá jndyí nnꞌan judíos na conintque. Yajoꞌ tyjeeꞌnon jon na mꞌán, ninjonto tacüentyjeeꞌ jon quiiꞌ ntꞌán, tyincyaa jon tsꞌon já, tso jon:

—Juu na condui Tyoꞌtsꞌon na tajñuaanꞌ tsꞌonhin, ncyaa jon na cꞌoonhanꞌ yohoꞌ.

20 Ndoꞌ vi na jndë tso jon na nndaꞌ ndë́, yajoꞌ siꞌman jon ntꞌö jon yo tsiꞌntsqueeꞌ jon. Ndoꞌ tyincyaahanꞌ na në́n jndyí na jntyꞌiá nntꞌáhin. 21 Joꞌ tso nndaꞌ jon ndë́:

—Juu na condui Tyoꞌtsꞌon na tajñuaanꞌ tsꞌonhin, cꞌoonhanꞌ yohoꞌ. Chaꞌxjen nquii jon na conduihin Tyëëhë jndë tꞌua jon tsꞌian nnön na quitsiꞌman juu jñꞌoon naya ꞌnaanꞌ jon ndëëhoꞌ, majoꞌntyi maꞌua ja tsꞌian ndëë ꞌoꞌ na cꞌoncyahoꞌhanꞌ ndëë nnꞌan.

22 Ndoꞌ vi na jndë tso jon na nndaꞌ, tjuꞌ jon jndye ndë́. Tso jon:

—Cyꞌonhoꞌ cüenta nquii Espíritu Santo. 23 Nque nnꞌan na contcüeꞌ nꞌonhan jnanhan, vanaan na quinduehoꞌ ndëëhan na jndë sitꞌman tsꞌon Tyoꞌtsꞌonhan. Majoꞌ joo nnꞌan na tyiꞌcontcüeꞌ nꞌonhan yo jnanhan, mantyi vanaan na nnduehoꞌ ndëëhan na tyiꞌcotsitꞌman tsꞌon jonhan.

24 Já nnꞌan na tqueenꞌ Jesús na quinanjö́n yo tsꞌian na totsꞌaa jon, ninnquii ntyjëëhë Tomás tyíꞌcꞌoonhin xjen na jndyo jndyee Jesús ndë́. Juu Tomásꞌñeen conduë́hin Tsanñꞌein. 25 Ndoꞌ vendye já jnduë́ nnon jon:

—Jndë jntyꞌiá ndë́ nquii Jesús.

Majoꞌ tꞌa jon, tso jon ndë́:

—Xe na aa ntyꞌia nnön jnꞌaan naijon na iscjo coꞌ ntꞌö jon, ndoꞌ na nndui nonntꞌöhanꞌ, yo na nndui vintyjaaꞌ ntꞌö tsiꞌntsqueeꞌ jon, yajoꞌ yuuꞌ jeꞌ, ngantyja tsꞌön na vandoꞌ xco jon.

26 Ndoꞌ jndë nen xuee na tui na nndaꞌ, tomꞌán nntꞌa juu vꞌaaꞌñeen. Xjenꞌñeen mꞌaan Tomás. Ndoꞌ joꞌ tyjeeꞌ nndaꞌ Jesús quiiꞌ ntꞌán na tyen tëꞌ jndyuentꞌaa. Tyincyaa jon tsꞌon já. Itso jon:

—Juu na condui Tyoꞌtsꞌon na tajñuaanꞌ tsꞌonhin, cꞌoonhanꞌ yohoꞌ.

27 Ndoꞌ ninñoonꞌ itso jon nnon Tomás:

—Quituiꞌ nnonntꞌöꞌ ntꞌö. Ndoꞌ mantyi quituiꞌ ndaꞌntꞌöꞌ tsiꞌntscꞌë. Majoꞌ tyiꞌntsaꞌ na tyiꞌcantyja tsonꞌ, cüa, cantyja tsonꞌ na vantꞌö xcö.

28 Yajoꞌ tꞌa Tomás ꞌndyo jon:

—ꞌUꞌ ta, condui ꞌuꞌ Tyoꞌtsꞌon na matsitꞌmanꞌ ndoꞌ condui ꞌuꞌ na quityeꞌntjonꞌ ja.

29 Ndoꞌ tso Jesús nnon tsanꞌñeen:

—ꞌUꞌ Tomás, xengꞌe jndë jndyiaꞌ nnonꞌ ja, joꞌ na mavantyja tsonꞌ. Ityio Tyoꞌtsꞌon jnꞌaan joo nnꞌan na vantyja nꞌon ja min na tacojntyꞌia ndëëhan ja.

30 Já nnꞌan na tqueenꞌ Jesús na quitsayꞌö́n yo tsꞌian na totsꞌaa jon na tojntyꞌiá ndë́ na jndyechen nnon tsꞌian na totsꞌaa jon na tyiꞌjeꞌquinduihanꞌ ntyja ꞌnaanꞌ najndei nquii tsꞌan, joohanꞌ tajnduihanꞌ nnon tsonvahin na macüji ja. 31 Majoꞌ macüji jñꞌoonminꞌ chaꞌ cantyja nꞌonhoꞌ na nquii Jesús conduihin Cristo, ndoꞌ jnda nquii Tyoꞌtsꞌon, ndoꞌ chaꞌ ntyja ꞌnaanꞌ joꞌ ncyꞌonhoꞌ cüenta na tyiꞌquintycüii na cotaꞌndoꞌ ñuan ꞌnaanhoꞌ.