5
Tson na tyꞌoon Quitsman Chjo cüenta
1 Yajoꞌ jntyꞌia nquii jon na vaquityen jon sillaꞌñeen na maninꞌ tsꞌiaanꞌhanꞌ, ndyiiꞌ ncüii tson ntꞌö jon ntyjaya na tentcüiihanꞌ na nchaꞌ ve ntyjaquiohanꞌ chuuꞌ ntji. Ntyqueꞌ joo na tëꞌtyenhanꞌ. 2 Ndoꞌ jntyꞌia ncüii ángel na mꞌaan jndyi najndei jon, jndei ticꞌuaa ꞌndyo jon, taxeeꞌ jon: “¿Nin tsꞌan chuhanꞌ na ntyjee na ntyqueꞌ joo na tëꞌtyen tsonvahin?” 3 Majoꞌ min juu quiñoonꞌndue, min nnon tsonnangue, min na quiiꞌ ntꞌan ntꞌoo, minꞌncüii tatijndaꞌ na vaa najndei na conduihin na ntsiquinaan juu tsonꞌñeen, min na ntsijnaanꞌ juuhanꞌ. 4 Ndoꞌ ngꞌe na nndaꞌ, totꞌiö jndyi jnaanꞌ na minꞌncüii tsꞌan tatijndaꞌ na chuhanꞌ na ntsiquinaan juu tsonꞌñeen, min na ntsijnaanꞌ juuhanꞌ. 5 Yajoꞌ ncüii joo nantqueꞌhin, tso jon nnön: “Nndaꞌ, tantꞌioꞌ, ee nquii jon na jndë tjuꞌcje jon juu natyia, conduihin lión cüenta nnꞌan tmaanꞌ Judá, ndoꞌ conduihin tsjan nquii David na jndyocahanꞌ. Ngꞌe joꞌ tsixuan jon na nquii jon ntyjee jon na ntyqueꞌ joo naijon na tëꞌtyen tsonꞌvaꞌ ndoꞌ na ntsijnaanꞌ jonhanꞌ.”
Nndaꞌ jñꞌoon tso tsanꞌñeen nnön.
6 Ndoꞌ jntyꞌia ncüii tsꞌan na itsijonhanꞌhin chaꞌvijon Quitsman Chjo na jndë jnanꞌcueeꞌ nnꞌan. Ventyjeeꞌ jon na tonnon juu sillaꞌhin quiiꞌ ntꞌan joo nenque na cotaꞌndoꞌñeen yo tondëë nanꞌñeen na conditque. Min ntyqueꞌ ndiꞌndyeeꞌ jon ndoꞌ ntyqueꞌ tënnon jon. Joo ntyqueꞌ tënnon jon conduihanꞌ ntyqueꞌ espíritu na condui nquii Tyoꞌtsꞌon na iꞌua jon tsꞌian ndëëhan na contꞌahan tsꞌian ꞌnaanꞌ jon na ninvaa tsonnangue. 7 Ndoꞌ juu Quitsman Chjoꞌñeen sindyooꞌhin na mꞌaan nquii jon na vaquityen jon juu sillaꞌñeen. Tsonꞌñeen na ndyiiꞌhanꞌ ntꞌö jon ntyjaya, tyꞌoon Quitsman Chjo cüentahanꞌ. 8 Ndoꞌ vi na jndë tyꞌoon jon cüentahanꞌ, yajoꞌ joo nenque na cotaꞌndoꞌñeen yo ninꞌnque ntcyu nchoꞌ nenque nantqueꞌñeen, tongityehan na tonnon jon. Tsoñꞌen nantqueꞌñeen tyꞌonhan arpa, ndoꞌ yꞌonhan ngio na jndëhanꞌ yo sꞌon ijan na tooꞌchenhanꞌ yo su. Juu suꞌñeen conduihanꞌ jñꞌoon jndyue nnꞌan cüentaaꞌ Tyoꞌtsꞌon na conanꞌneinhan nnon jon. 9 Ndö vaa alabanza xco na tahan nnon jon:
ꞌUꞌ tsixuanꞌ na cyonꞌ cüenta tsonvaꞌ ndoꞌ na ntyjeꞌ naijon na tëꞌtyenhanꞌ.
Ee jnanꞌcueeꞌ nnꞌan ꞌuꞌ ndoꞌ yo neonꞌ sijnda ntcüeꞌ Tyoꞌtsꞌon nnꞌan na ncüii ncüii tmaanꞌ na mꞌanhan nnon tsonnangue,
ndoꞌ mantyi nnꞌan na ncüii ncüii nnon jñꞌoon na conanꞌnein yo maninꞌ nnꞌan na ncüii cüii tyuaa.
10 ꞌUꞌ jndë tquenꞌ joohan ncüii tmaanꞌ nnꞌan na icoꞌxen Tyoꞌtsꞌon,
ncüii tmaanꞌ nnꞌan na conduihan ntyee na cotyeꞌntjonhan nnon jon,
ndoꞌ mantyi ngitoxenhan nnꞌan tsonnangue yo nquii jon.
11 Ndoꞌ viochen xjen na jntyꞌia, jndyi na cꞌuaa jndyue ángeles na camꞌanhan xiꞌjndio juu sillaꞌñeen yo nque nenque na cotaꞌndoꞌñeen ndo yo maninꞌ joo nnꞌan na conditque. Joo ángelesꞌñeen, tenonntyjachen na jndye minhin ata vantjoꞌchen minhan. 12 Cꞌuaa na conanꞌxuaa ángelesꞌñeen, jnduehan:
Juu Quitsman Chjo na jnanꞌcueeꞌ nnꞌan,
condui jon na coꞌxen jon tsoñꞌen.
Condui jon na taquintyja cyꞌoon jon cüenta tsoñꞌen na quinanꞌtꞌmaanꞌhanꞌ jon,
condui jon na jndaꞌ xquen jon.
Condui jon najndei na siquindë jon tsꞌian na tꞌua Tyoꞌtsꞌon nnon jon.
Mantyi tsixuan jon na quindue nnꞌan jñꞌoon ya ntyja ꞌnaanꞌ jon ndoꞌ na ncꞌoon jon naijon na conditꞌmaanꞌ Tyoꞌtsꞌon,
tsoñꞌen jaa, ninnquiiꞌchen quinduë na ya jndyi condui jon.
13 Ndoꞌ nquii Tyoꞌtsꞌon, ncüii ncüii nnon na tquen jon na mꞌan quiñoonꞌndue, yo nnon tsonnanguevahin, yo naijon na mꞌaan ntꞌoo, yo tsoñꞌen na mꞌan ndaandue, tsoñꞌen na tquen jon na mꞌan joohanꞌ, ndö vaa jñꞌoon na jndyi na jnduehan:
Conduë na taquintyja na ya condui nquii jon na vaquityen juu silla na maninꞌ tsꞌiaanꞌ yo nquii jon na conduihin Quitsman Chjo.
Conanꞌtꞌmaanꞌ jaa joohan.
Xiaꞌntyi nquehan na taquintyja tꞌmanntyichen conduihan.
Ninnquehan conduihan na cotoxenhan nanein ndoꞌ ninvaañꞌen na tonnonntyichen.
14 Ndoꞌ joo nenque na cotandoꞌñeen jnduehan: “Ninnquiiꞌchen quindui na nndaꞌ.” Mantyi joo ntcyu nchoꞌ nenque nantqueꞌñeen, tongityehan na tonanꞌtꞌmaanꞌhan Tyoꞌtsꞌon.