1-2 Soro danu ararae Sidiwini ureka. Ibake i orouma Sidiwini ukaro moi Isaraera Godinu wake naukeka orou aare fakake ii weada Sidiwininu ofe bou mune ane ooru uisa. Sidiwini danu feari odoroma moi orouma Derusaremu goiro Godinu wake naukeibisa orou ba me merama uke yareibirieka. Eno ukeibirieka ibake i Godinu wake naukeibisa orou fiake imusu imusu anisa. Diudiaini Samaria orofayairo anisa. Anisaro i afasoro orou mane Derusaremu goiro ibeibisa. 3 Soroma Godinu wake naukeibisa orounu goi goiro anike Godinu wake naukeibisa orou emenu wana mune ane derena enaro naama uwane anike emeini awekaboini yaisina eno urieke waure ane ana eboro odirie.

4 I fiake imusu imusu anisa orouma moi goi goiro Godinu wake we eneiareibisa. 5-6 Firifuma moi Samaria orofa goiro isare ani. Isare anike Yesu Kerisonu wake i oroubairo weada Yesunu ibiro buna daiwere uiro i orou yaisina danu wake naukenewaa uisa. 7-8 Firifuma eno weiro seidaninu moi merama imumu emenu imuka ubarenaroma amukada arua daiwere weada ia sine fare imusu anisa. Firifuma eno uike moi umu wana beobeo bobo orouini moi enare fare me orouini emua ma wirokeibiriero ibake i goi orou ibaibake rooro daiwere uisa.

9 Nono moi mi danu ibiye Saimoni dawae diwari ureka mi. Enoba dawae i Samaria orofa goiro ibeibi. I goiro ibaada dawama eno wei, nae dai miya eno weibi. 10-11 Eno weibi ibake i orou yaisina emenu imukekae ba dawa dai miya eno we imukeibisa. Saimonima diwari ureibike danu buna ukeka ukeibi ibake dawa dai miya eno weibisa. 12 Saimoni dawae dai miya weisake ekabaie Firifuma Godinu yawokekaini Yesu Kerisonu ibiro wake bunawereroma weibi. Eno weibiro i goi orouma nauisake Yesu imukake Firifubairo emeini awekaboini emua babadaido urieka. 13 Eno uriekaro Saimonima nauike Firifubairo ane fariro Firifuma dawa babadaido ui. Firifuma Saimoni babadaido uiro demuiro enarada Saimonima Firifunu buna ukeibi ibai yaisina ereibi ibake imuka foria daiwere ui.

14-16 I Samaria orou Godinu wake naukaisaya moi orouma eno weisaro i Derusaremu goiro ibisa afasoro orouma nauisa. Nauisake ibake Fidaini Dionini emua we odairiekaro Samaria orofaro isare anisi. Isare ane fakike i oroubake Godibairo guriguri ukaada eno weisi, Babae Godi, Anu Imumu Irau we odaiaro yewa oroubairo isafi weisi. 17 Eno weisike Fidaini Dionini emenu wanama i Samaria orou emenu iiri duboro odaada Godibairo guriguri uisiro Godima Danu Imumu Irau we odairo emenu imuka ubarenaro isari.

18-19 Saimonima eribaie i afasoro orouma emenu wana i Samaria orounu iiri duboro odeibisaro Godinu Imumu Irau emuabairo isariro ukeibisa ibai Saimonima erike Fidaini Dionibake eno wei, oi mamiaro yanu buna ukeka na makuakiro nanu wanama emenu iiri duboro odimaro Godinu Imumu Irau emuabairo isafi wei. 20-21 Eno weiro Fidama ma owerike eno wei, a aneaneme imukaku wei? Eno weike nono wei, Godinu me makeka oima make mufaku wei? A eno imukakuba aini anu oini merama sifuwaisia wei. Fidama eno weike nono wei, anu imukekae meramawereba iyabairo Godinu waiya da ufakua wei. Eno weike ba nono wei, anu imukama Godibake imuke dakakuba iyabairo Godinu waiya da ufakua eno wei. 22 Fidama eno weike nono Saimonibake eno wei, anu imukekae meramawereya Godibairo guriguri uaro anu merama merama ukeka yaisina Godima mufike imuke medifi wei. 23 Eno weike nono wei, anu ararae meramawereba merama mane ukeifakua wei. 24 Fidama eno weiro Saimonima ma owerike eno wei, na arara me nanu merama ukeka wei. Eno weike nono wei, i merama ukekabake yama nabake Godibairo guriguri uawaro na ma wirofari wei.

25 Fidaini Dionini emuama Yesu imukeibisi wakeini Yesunu wakeini eno we me sikike owekike Samaria orofa udi goi goiro anisi. Anisike Godinu wake we eneebe iroma Derusaremu goiro owere ane faki.

26 Godinu aneruma Firifubairo isare aarike eno wei, isare aniake yeka Derusaremu goiroma Geisa daabaro isare ania wei. Eno weike nono wei, yeka daabae obi isare me daaba, eno weiro nauike i daabaro ani. 27 Ane faribaie moi dai Idiofia orofa goi mi, kuini Kadasinu oi yawokeibi mi idua fari. Dawae Derusaremu dai sosiro anike guriguri uike nono owerike idua fari. 28 Danu osi abuma ma youreka seboro yaure ibaada Godinu buka ibiye Isaiya kakure aare idua fari. 29 Idua faribaie Godinu Imumu Irauma Firifubake eno wei, i mibairo ania wei. 30 Eno weiro Firifu durame ani. Ane fariro i mima Godinu buka ibiye Isaiya kakuriro nauike Firifuma eno wei, anu kakuraku i wake danu ubi imukakuba me wei? 31 Eno weiro i mima ma owerike eno wei, nanu mane kakumau ide aneaneme i wakenu ubi imumauke iwoka simau weike nono wei, moi mima na we ma iwoka ufarakuie i wakenu ubi iwoka simaua wei. Eno weike Firifubake nono wei, nabairo osi abuma ma youreka seboro amuake yaua weiro amuke yauri. 32 I mima kakuri wakenu ubiye eno,

34 Eno kakurike i Idiofia mima Firifubake eno wei, i Godinu we bou ukeka mima ainabake weaku? Danu onamibakeba moi mibake weaku? 35 Eno weibaie Firifuma i wakeroma Yesubake irau wake yaisina we ma iwoka ukeibi. 36 Eno we ma iwoka uke aneebe moi adua fou uki. Fou ukike i Idiofia orofa goi mima eno wei, na ama babadaido ufarine weakune wei. Eno weike nono wei, na babadaido ufarakuba me wei? 37 (Eno weiro Firifuma ma owerike dawabake eno wei, anu naukeka irauaiae babadaido umauanea weike nono wei, anu naukeka meramae babadaido da umauanea wei. Firifuma eno weibaie i Idiofia orofa goi mima wei, na Yesu Keriso Godinu Amara imukakunea wei.) 38 Eno weike sebo ma youreka osi abubake wake we kuuriro enariro i seboroma aduaro isaki. Isakike Firifuma Idiofia orofa goi mi babadaido ui. 39 Babadaido uiro aduaroma udiro amukeibisibaie Godinu Imumu Irauma Firifu munike sabu waure ani. Sabu waure aniro Idiofia orofa goi mi Firifu nono ere daui. Ere dauike Firifuma i mi babadaido ui ibake rooro daiwere ui. 40 Godinu Imumu Irauma Firifu waure anike Asodu goiro fare odiro Firifuma iro Godinu wake weike i Asodu goi udi udiro Godinu wake we eneebe iroma Sesaria goiro ane fari.