1 Yesu nono i Du orounu sosi uwara ubarenaro amuike eribaie wana merama mi idua yaure ibiro eri. 2 Eriro i orouma Yesu ekake imukebe eno weisa, Yesu i wana merama mi yewa Sabadi odoro ma wirofekuba me ari weisa? Eno weisa ibake eraada emenu emenu we nauisake Yesu kodoro odifisane weisa. 3 Yesuma i wana merama mibake eno wei, uyake i orounu ubarenaro enaa wei. 4-5 Yesuma eno weike i orou yaisinabairo nono wei, Abodeima irauaiai wei, Sabadi odoro eme unu komiauba ma merama umiau wei? Ma wiromiauba ma feamau wei? Eno weibaie i orouma moko we dauisa ibake Yesu dino ui. Dino ukaada i orou yaisina ure owere ma owere uke erieke emenu aya muneka iwoka uike i wana merama mibake eno wei, anu wana siaa weiba ibake danu wana sianiro gienabu uike irau sini.

6 I Ferosi orouini Du orounu sosi uwara ubarenaroma aweawero amuke fakake Erodi weaisa orou fou uriekake we makanada Yesu ma feareka daaba yodia ukeibisa.

7 Yesuini Danu iwoka ukeka orouini i Gareri kuna udiro anisaro nono i Gareri orouini Diudia orouini Yesunu umuro anisake Yesunu we ma iwoka ukeibi wake yaisina nauisake Danu umuro anisa. 8-9 Eme keuwere Yesunu umuro anisa. I Gareri orofa orouini Diudia orofa orouini Derusaremu goi orouini Idumeia orofa orouini Diodeni adua ekarana orouini Daira goi orouini Saidoni goi orouini eme keuwere Yesunu ukeibi ibai nauisake aareibisa ibake Yesuma Danu iwoka ukeka oroubake eno wei, na you mune bou ukeibiawe wei. I eme feferama ode dakaa unao ufeisa ibake eno wei. 10 Adinaro arama ukeibisa orouini ma wirokeibirieba ibake eme keuwere awoena arama ukeibisa orouini emenu ararae Yesunu ofe ure burifisake irau sifisane ibake Dawabairo faka. 11 Seidaninu merama imumu moi orounu imuka ubarenaro rewoke ibisaro faka. Fakaba seidaninu merama imumu bobo orouma Yesu ekake dooro isare biruke isarada eno weisa, A Dawa Godinu Amaraya eno weisa. 12 Eno weisaro Yesuma wei, Nae Godinu amaraba yewa wake moi oroubairo da ane weforo wei.

13 Yesu oraararo amuke anike Danu arara ukeibi orou u weiro Yesubairo aare faka. 14-15 Yesuma eme yaisina duwero (12) Dawaini ibekabake we munike Danu wake wefiro wefisane ibake emua murieke seidaninu merama imumu we ma berakeifisane ibake buna daiwere marie. 16 I orou emenu ibi ibiye yewado, Saimoninu awoena ibi Fida mami. 17 Debedinu amarayai Deimisini danu dabue Dionini emenu awoena ibiye Boanari mami. I ibinu ubiye ure ure weaku ari eno adarabai mamirie. 18-19 Enuduruini Firifuini Badoromiaini Madiuini Domasini Deimisini dawae Arofiesinu amara, dawaini Dediusini dawa Keinani orofa mi, moi Saimonini Diudiasi Ikariada, i mi Diudiasi dawae Yesu weforairo muka mi. I orou yaisinabake Yesuma u weiro Dawabairo ane faka.

20 Yesuini Danu iwoka ukeka orouini uwara ubarenaro amuisa. Amuisaro eme keuwere ku uisa ibake Yesuini Danu iwoka ukeka orouini emua i uruna ise da uisa. 21 Eno uisaro eme moima eno weisa, Yesu gogore ukinu weisa ibake Yesunu goi orouma nauisake Yesu we mufisane faka.

22 Moi Mosesinu darawadu wake we ma iwoka ukeibisa orouma Derusaremu goiroma fakake eno weisa, Danu imukaro Biesabo ibinu ibake emenu bokai merama imumunu bunaroma seidaninu merama imumu we berakakua eno weisa. 23 Eno weisabaie Yesuma ewaro aarawe weiro ane faka. Fakaro dubo waure weike eno wei, seidanima danu merama imumu da mune siafeku wei. 24 Eno weike Yesuma nono eno wei, gaemani orou emenu imusu urafeisaie emenu buna ido isafekua wei. 25 Nono uwara demui orou emenu emenu uranada abanaro ma gaganeroma imusu imusu enafeisake urafeisaie emenu ibekae idua merama sifekua wei. 26 I ari enoe seidani danu moi orou we yowefiakuie danu onami we yowenao ufekua wei. Eno ufekuie danu imusu abanaro ma gagafekuro danu yawokeka buna ido merama sifekua wei. 27 I moi waira ukeka mima bunama imusu ari minu uwara ubarenaro amufike bunama imusu ari minu wana uwane karifekuke danu eraerabusa waira ufekuke anifekua Yesuma eno wei. 28 Yesuma eno weike nono wei, i ari enoba yabake ba wake weakunea nauawe wei, emenu merama ukekaini sara merama weekaini i yaisina Godima mufekuke imuke medifekua wei. 29 Nono ainama Godinu Imumu Irau sara we ma merama ufekuie Godima i merama ukeka da mune imuke medifekuro danu merama ukeka i mibairo ibene ibene ibeifekua eno wei. 30 I owaowa odeka orouma adinaro eno weisa, Yesu Dawa seidaninu imumu merama Dawabairo ibinu ibake seidaninu merama imumu we berakakua weisaroma nono Yesu Dawae Godinu Imumu Iraunu bunaroma we berakeibi ibake Yesuma emuabake dubo waure weada i ari eno wei.

31-32 Yesu Danu amaeini Danu naburakaini aakake aweawero enakake Yesu efene aarisia weisaro eme keuwere Yesuini demuiro yaure ibisaro moi orouma Yesubairo fakake eno weisa, Anu amaeini naburakaini aruarumaini uwara udiro enare ibaada A we nauke eraisaya weisa. 33 Eno weisabaie Yesuma eno wei, Nanu amaeini naburakabake weaisa wei? Nanu wake wemaro nauawe wei, Nanu amaeini naburakade abo orouro wei? 34 I ku uke ibisa orou eraada emuabake eno wei, yewa oroue Nanu amaeini naburakaini yewadoya wei. 35 Abo orouma Godinu wake naukenewaa ufeisaie emuae Nanu amaeini nabueini Nanu aruarumaya eno wei.