1 Samwel.
2.
Wasina bi Hana ruparima iwona bo, “Tagu, Yawe God biidi avinuwamiise; Yagu maragata touna yavereveregu, bi iviyawiigu na iinuwamiise, noko kiiravine kagu aviya iinamayedi. 
O Yawe God, getana iiyabo kabikabikuwayina ware tam naboni. Getana god mududi meme Getana miiribabara ware tam naboni, yama God. 
Na anawona bo, ‘Yami kabigeegeeyana kokabitoura; yami noghota mayeyana sisiyidi tughuridi kotoura. Basuna Yawe God bera tupadi iyakowa bi yami bera initupawamiwamiredi.’ 
Yawe God, tam aviya damdi yadi riwariwa kugiidi; bi wawaya noganogadi kukabi wiimaragasidi. 
Iiyawogha roro simoura kirakiina, kata kam kiiravine sinabagibagi, bi gomagomaridi katana sakamkam kirakii. Wasike gagarina katana ivituwa da natunatuna seven bi wasike wiituwa kirakiina na getana iiyabo da iyiwiiteni. 
Tam rabobo kwiitubuyi bi yawa kwavereyana; Wawaya karawage kwatoredi bi kwakabiwiigeghomiiridi. 
Yawe God, kwabera na wawaya mududi sagomara bi mududi samoura; kwabera na mududi kwatoreyowoyedi bi mududi kwatoregeeyedi. 
Moyamoyakidi popokuma kwakabiwiimiiridi bi wiikanighughuvidi yoghoma kwarukabepidi da kiikiiwawo yawata samake bi kabikuwaya gawaridi sirapeneyana. Bi kubura tupana na tam Yawe God rapemve; bi bera tupadi kadi gaware kutoredi. 
Yam wawaya kabikabikuwayidi kwiitarababaranedi, bi wawaya wiikawakeekeedi wiididibara kuburine sanagho. Wawaya gemeyani yadi maragatama kadi aviya sinageeiwayidina 
Kam aviya kwakasiwiiberodi, yam nuwapughu abamama inaguguri na ware warikeyakeya naboni toudi biiyadi Yawe God, tam kubura tupana kunitupawamiwamireni bi yam kiiwawo kunakabiwiimaragasi, bi yam wiivinevinegha kiiwawona maragata kunavereni.” 
Bi Elkana yana wawaya yawata siveramagha yadi bareye Rama kwanatune, bi Samwel, Sailo kwanatune imakae da Yawe God ibagibagiyeni bi Eli touna prist yana wiibadana rogune.