Aisaiya.
35.
Nokodi raghanidiye na mayaba da warere sininuwamiise; bi saru gubure na sinapopo. 
Mayaba debane kii sinagogo da sinibonuvi na ininuwamiise da nuwasisire inarukwatu. Touna kana kita ininuwakayowana ware Lebinon koyadi naboni bi inamoura ware kwabu kubura Kamel da Seron ruwiipikapikadi kamodiye naboni. Bi name Yawe God yana kiniwa iniyeveveyana, da nama wawaya tupadi yada God yana waratete da maragata sinakita. 
Touna iiyawogha imadi noganogadi na inakabi wiimaragasidi bi kayedi kirokirorodi na maragata inaveredi. 
Wawaya iiyawogha sanaghanaghara na kuwonedi bo, “Gekonanagharana, kovimaragata! Kokita, yami God yapiipiika da kana aviya iniberodi. Bi yapiipiika na aro inaveredi bi tami iniyawiimi.” 
Raghanina inapiika na inabera da wawaya mata potapotadi sinakita bi taina potapotadi sinawaiyana. 
Wawaya digadigadi sinikapokapoka ware diya, bi kawa gumegumedi nuwamiiseye sinarukwatu. Rarima tanawama sinawusira sinagae da mayaba sinavera rughuwonedi; 
Egha muyamuyana inawamiri da initarabu, bi tanawa kanakanana na rarima wusiridi sinarumaghatara. Ribiribi geananamanidi yadi makamake gawaridi meme sakenayowoghana sinisawasawa bi taritariga da kanikani peyaridi nama sinagogo. 
Keda ghamana kana waghawagha “Keda Kabikabikuwayina” na noko gawarina inavera rughuwoneni. Berabero wawayidi gemeyani debane sinapepewana, nokona God yana wawaya kawagha kiiravidiye; wawaya kawakeekeedi geririnagha sinapepewa wapawapana. 
Laiyon kate genoko kedana debanena, bo getana ribiribi googonidi geananamanidi sinagae debanena. Wasina iiyawogha Yawe God iviyawiidina toudi namagha sinapepewa. 
Wiiwiiyawiidi na nuwasisire bi sinatawora sinaveramagha Jerusalemma. Nuwasisira makewaghawaghasina gayamidiye sinakunapi ware pinawa naboni. Toudi parapa nuwamiise da nuwasisira inibonuvidi, na nuwabero da dou sinamomogha waghata.