Sikũn Juãw
Juãw kot Jejus kôt hkwỳjê hwỳr wam kagà nẽ mẽnh kôt hõ mẽnh
Juãw na pre kagàja nhĩpêx. Jejus nhỹ hã hkrajê jahkre ho ri pa xwỳnhjê hõ na pre. Jakamã na pre hkrĩ hõ kamã Kris kôt htõx mẽ õ fãmii mã kagàja nhĩpêx nẽ mẽ hwỳr kumẽ. Na pre hte Tĩrtũm kapẽr o mẽ hêx o pa xwỳnhjê hõ mẽ õ krĩ hwỳr mra nhũm Juãw kràmnhwỳ nita omu nẽ htỳx kot mẽ ahkre mex ã hkamnhĩx. Hãmri nẽ kot Tĩrtũm kapẽr o hkwỳjê jahkre kaxyw amnhĩ nhõrkwỹ hwỳr kuwỳ. Hãmri nhũm Juãw tee ri harẽnh ma nẽ kãm kagàja nhĩpêx nẽ kamã kot amnhĩ wỳr hwỳr nê kãm kapẽr nẽ hprĩ hã kãm tanhmã mẽ kot Tĩrtũm o hêx to ho pa hã tanhmã mẽ harẽnh to. Kot kamã harẽnh nẽ mẽ harẽnh mar hãmri nẽ mẽ axkãm hamak rom nẽ ri pa kaxyw. ã na pre Juãwja hkràmnhwỳ ni mẽ hkwỳjê mã mẽmoj jarẽnh nẽ hã kagà nẽ mẽ hwỳr mẽnh anẽ. Nẽ mẽ kãm:
1
1 Pa Jejus kôt ixtõx. Xà mẽ amex? E ot pa mẽ amã kagà nhĩpêx nẽ mẽ awỳr kumẽ. Akrajaja nẽ apê mẽ hkatorxà mẽ mẽ ato ixpimrààtã mẽ awỳr kumẽ. Ixpê Juãw pigêtre na pa. Inhmã mẽ akĩnh nom papxipix inhmã mẽ akĩnh kêt. Mẽ pahpyrà nẽ mẽ kot Tĩrtũm kôt amnhĩ xunhwỳr xwỳnhjaja haxwỳja kãm mẽ akĩnh. 2 Mẽ pahte Tĩrtũm kapẽr kôt ri amnhĩ nhĩpêx rãhã ho ri papa jakamã na pu htem pamã axpẽn kĩnh o ri papa.
3 Na pa hte mẽ pahto Mẽpanhĩpêêxà maati Tĩrtũm wỳr o ixpa nẽ kãm:
—Pa Tĩrtũm. Ot pa mẽ amnhĩ to awỳ. Akra Jejus Kris mẽ mẽ amnhĩ to war awỳ. Kêr ka wa mẽ ixkamã axukaprĩ nẽ mẽ ixkutã war anojarêt rãhã ho ri apa. Nẽ tanhmã mẽ ixkrã hto pa mẽ ixàmnhĩx ijamakêtkati nẽ ixkĩnh nẽ mẽ inhmã axpẽn kĩnh nẽ axpẽn to mex o ri axpẽn kôt ixpa. Nẽ tãm ri amnhĩ nhĩpêx. Anẽ.
Mẽ pamã axpẽn kĩnh kãm axpẽn to mex ã mẽ pamã karõ
Juãw 13.34-35; Wam Juãw 2.7-9, 3.14-18
4 Nẽ na pa pre akra hkwỳjê pumu nhũm mẽ inhmã amnhĩ jarẽ pa mẽ kuma nẽ mẽ ỹ hã ixkĩnh nẽ. Na xep prem Tĩrtũm kôt amnhĩ xunhwỳ nẽ hkôt ri amnhĩ nhĩpêx mex o pa. Mẽ kot Mẽpanhĩpêêxà Maati Tĩrtũm kapẽr ã kagà hkôt amnhĩ nhĩpêx ã inhmã amnhĩ jarẽ pa mẽ kuma nẽ ixkĩnh nẽ. 5-6 Jakamã na pa ã amã ixkapẽr nẽ hã kagà anẽ. E kwa Kris kôt ixtõx. Kêr pu mẽ pamã axpẽn kĩnh o ri papa hã mẽmoj to axpẽn kutã panojarêt rãhã ho ri papa. ã ixujarẽnh anhỹrja nyw kêt. Amnepê mã mẽ ate Jejus kôt amnhĩ xunhwỳr ã arĩgrota ã na prem ã mẽ amã karõ anẽ. Tã kêr pu mẽ arĩ pamã axpẽn kĩnh pê Tĩrtũm kapẽr piitã hkôt amnhĩ nhĩpêx mex o ri papa. Kapẽr ã kagà kot ã mẽ pahte amnhĩ nhĩpêx anhỹr ã mẽ pamã karõ.
Tĩrtũm kapẽr o mẽ hêx xwỳnhjê jarẽnh
Rõmãn 16.17-18; Wam Ximotre 5.22; Wam Juãw 2.18-26, 4.1
7 Nẽ mẽ kot Tĩrtũm kapẽr o hêx o ri mẽ pa xwỳnhjaja na mẽ ra ma krĩ piitã hkôt mẽ kãm tanhmã ho hêx to ho pa nẽ mẽ kãm:
—Jejus kêp Tĩrtũm Kra hkêt ãm mẽ panhĩõ na pre. Na pre Tĩrtũm mẽ pahwỳr mẽnh kêt nẽ. ãm mẽ panhĩõ rũm na pre kato.
Anhỹr o mẽ kãm ho hêx o pa. Kãm Kris kurê xwỳnh maatija nhỹ hã na htem ã ri ho hêx o pa anẽ. 8 Jakamã kwa mẽ amnhĩ nê mẽ omunh mex nẽ mẽ ama nẽ ãm mẽ ama. Kot kaj mẽ kapẽr ma nẽ mẽ hkôt ajamaxpẽr hãmri nẽ mẽ ixte Tĩrtũm kapẽr o mẽ ajahkreta kaga. Kwa mẽ arĩ mẽ ate amnhĩ nhĩpêx nyw pix o mãn amnhĩ nhĩpêx rãhã o ri apa. Nẽ arĩ mẽ amã axpẽn kĩnh kãm tanhmã axpẽn to ajuta hto rãhã ho ri apa. Kêr kê Tĩrtũm ja hã mẽ apumu nẽ nhỹrmã mẽ ato mex nẽ. 9 Nom kot kaj mẽ nhãm mẽ kapẽr punujja kôt amnhĩ nhĩpêx nẽ Kris kôt amnhĩ nhĩpêx kêt nẽ nhũm Tĩrtũm mẽ akôt pa hkêt nẽ. Nom kot ka mẽ arĩ Kris kôt amnhĩ nhĩpêx mex nẽ hãmri nhũm Tĩrtũm mẽ Kra Jejusja wa mẽ akôt ri pa ho pa rãhã nẽ. 10 Jakamã koja ã Tĩrtũm kapẽr ã kagà kuhpa hã Jejus o hêx xwỳnhjaja mẽmo arĩgro hã mẽ anhõ krĩ hwỳr pôj ka mẽ omu nẽ amnhĩ nhõrkwỹ hwỳr mẽ hwỳr kêt nẽ. Nẽ tanhmã mẽ kãm akapẽr to hkêt nẽ. ãm ri mẽ hkàx ã ri mra. 11 No kot kaj mẽ ã mẽ hipêx anhỹr kêt nẽ mẽ hwỳr mra nẽ mẽ mar o akuhê hãmri nẽ te mẽ ate mẽ hkôt amnhĩ nhĩpêx o amnhĩ nhĩpêx pyràk. Ja pumaj kêr ka mẽ nhỹri mẽ omu nẽ mẽ htêp kêt kumrẽx.
Kagà jatur xà
Hapuhã Juãw 13-15
12 E Kris kôt ixtõx. Ixkapẽr jatur xà na ja. Ixkapẽr ã kagàja ãm hakotre nom inhmã mẽ amã ixkapẽr ry hprãm. Jakamã kot paj mẽmo arĩgro hã ma mẽ awỳr mõ pu mẽ axpẽn pumu nẽ pahkĩnh nẽ. Pa rĩ kormã mẽ amã ixkapẽr jatur xàm kumẽ ka mẽ aprĩ hã inhma.
13 Nẽ ota jar Kris kôt atõx krajaja awỳr hpẽr mẽ.
E ixpê Juãw pigêtre na pa ã awỳr kagàja nhĩpêx nẽ mẽnh anẽ.