1 Nhũm Jejus mẽ hkôt mẽ pa ho mẽ pa xwỳnhjaja awjanã nẽ ma akupỹm pàr wỳr mra nẽ gjêx pa nẽ akupỹm xarmã rê nẽ akupỹm Jejus nhõ krĩ hwỳr mõ. 2 Hãmri nẽ hwỳr pôj nhũm krĩ nhõ xwỳnh kwỳjaja mẽ omu nẽ ĩ kamã htyk xwỳnhja mỳ nẽ Jejus wỳr o tẽ. Nõr xà kamã nõr rãhã nhũm mẽ hã hije nẽ kumỳ nẽ hwỳr o tẽ. Hãmri nhũm amnhĩ tã mẽ omu. Ra mẽ kot hkràmnhwỳta kaxyw kãm hamaxpẽr tỳx ã mẽ omu nẽ ĩ kamã htyk xwỳnhta mã kapẽr nẽ kãm:

—Pa? Kwa tee ri amnhĩ kukamã ajamaxpẽr kêt nẽ. Na pa ra apê tanhmã ate amnhĩ tomnuj to ho ijapêx pa. Kot paj axte kãm ijamaxpẽr kêt nẽ. Anẽ.

3 Hãmri nhũm Tĩrtũm kapẽr tũm o mẽ ahkre xwỳnhjaja tee ri ã kot kãm kapẽr anhỹrja ã kuma nẽ axpẽn mã:

—Tk. Kwa mẽhõ myti mũj kêp Tĩrtũm kêt tã te ri kot amnhĩ nhĩpêx pyràk ã amnhĩ nhĩpêx. Tĩrtũm pix na kot mẽ nê mẽ kot amnhĩ tomnuj o hapêx xwỳnh. Anẽ.

4 Hãmri nhũm Jejus amnhĩ tã mẽ kuma nẽ mẽ kãm:

—Kwa mẽ ã ajamaxpẽr anhỹr kêt nẽ. 5 Ixte mẽ nê mẽ kot amnhĩ tomnuj o ijapêx par ã amnhĩ jarẽnh tã mẽ ate ja kôt ixpumunh kêt jakamã na ka mẽ ja kaxyw ixkôt ajamaxpẽr kêt nẽ. Nom kot paj mẽ anoo mã akupỹm ĩ kamã htyk xwỳnhta o mex ka mẽ apiitã hã ixpumu hãmri nẽ ixkôt ajamaxpẽr kurê kumrẽx. Ixpê Tĩrtũm kot mẽ awỳr inhmẽnh xwỳnhta na pa. Ixte mẽ anê mẽ ate amnhĩ tomnuj rênh kaxyw na pre mẽ awỳr inhmẽ pa mẽ awỳr wrỳ. 6 Tã mẽ ate ja hã ixpumunh kaxyw kot paj mẽ anoo mã ja ho mex.

Anhỹr o mẽ kãm amnhĩ jarẽ hãmri nẽ ĩ kamã htyk xwỳnhta mã kãm:

—E kànhmã xa nẽ anõr xàta py nẽ ma akupỹm anhõrkwỹ hwỳr tẽ. Anẽ.

7 Puh nhũm kànhmã ãm kurê kumrẽx nẽ nõr xà py nẽ mẽ noo mã kato nẽ ma akupỹm õrkwỹ hwỳr tẽ. 8 Hãmri nhũm mẽ piitã no hapôx rũnh nẽ omunh o kuhê nẽ kamã no pyma htỳx nẽ. Nẽ tee ri omu nẽ axpẽn mã:

—Kokỹỹ. Kwa aa mẽ pahte ã mẽhõ kot amnhĩ nhĩpêx anhỹr ã omunh kêt tã jarãhã ja pumu.

Anhỹr o Jejus jarẽ hãmri nẽ ỹ hã Tĩrtũm mã mex o mex ã harẽ.

9 Tã nhũm Jejus mẽ kêp kato nẽ hkôt mẽ pa xwỳnhjê mẽ nhũm mẽ ma mõ. Hãmri nẽ pa ixpê Matêwre ixpumu. Ixte Rõm kãm mẽ ho amnhĩptàr xwỳnh mã krĩ nhõ xwỳnhjê pê kàxpore hkwỳ jamỳnh xwỳnh na pa pre. Nom mẽ kot ho tewẽn kryre htã ixte amnhĩm hkwỳ ho ixàrĩk prãm xàj na pa pre hte mẽ kãm ho rũnh nẽ harẽ. Jakamã nhũm mẽ piitã kãm ixkĩnh kêt nẽ. Tã pa pre mẽ kêp kàxpore jamỳnh xà hã ixkre kamã mẽ kêp hamỳnh o nhỹ nhũm Jejus mẽ hkwỳjaja ijãnh mra nẽ ixpumu nẽ amnhĩ kôt ixwỳ nẽ inhmã:

—Pa? E axàpênhta kaga nẽ hpãnhã amnẽ mẽ ixkôt mãn tẽ nẽ ixkôt mãn ri apa ho apa. Anẽ.

Hãmri pa kuma nẽ ixàpênh kaga nẽ ma hkôt tẽ. Nẽ hpãnhã hkôt ixpa ho ixpa.

10 Hãmri nẽ mẽmo arĩgro hã amnhĩ nhõrkwỹ hwỳr Jejus nẽ hkôt mẽ pa ho pa xwỳnhjaja mẽ ixkràmnhwỳ hkwỳjê hwỳ. Nhũm mẽ piitã mra nẽ inhõrkwỹ hwỳr agjê nẽ ixkutã apkur o hkrĩ. Nẽ ixpyrà nẽ Rõm nhõ pahi mã mẽ kêp kàxpore hkwỳ jamỳnh xwỳnh kwỳ haxwỳja ixwỳr mra nẽ mẽ ixkutã apkur o hkrĩ. 11 Hãmri nhũm Parijew nhõ xwỳnhjaja mra nẽ inhõrkwỹ kapem mẽ ixàpkur ã mẽ ixpumu. Nẽ tee ri mẽ ixkaêx ã Jejus pumu hãmri nẽ hkôt mẽ pa ho mẽ pa xwỳnhjê hwỳr agjê nẽ mẽ ixtã mẽ kãm akir nẽ mẽ kãm:

—Kwa mẽ kot jajê kutã apkur kêt tã mẽ akrãhtũmja axtem nẽ mẽ kutã apkur o nhỹ. Kwa nà mẽ kot amnhĩ tomnuj xwỳnh kênã. Jejus kot amnhĩ to mex ronhỹx mẽ kutã apkur kêt nẽ. Anẽ.

12 Hãmri nhũm Jejus amnhĩ tã ã mẽ kapẽr anhỹrja ma nẽ mẽ kãm:

—Tk. Nà ixte tãm mẽ unhwỳr kaxyw na pa mẽ kutã ixàpkur o nhỹ. Xà na hte tôtôja mẽ mex xwỳnhjê hwỳr mra nẽ mẽ hkane? Nà ãm mẽ à xwỳnhjê pix wỳr na hte mra nẽ tanhmã mẽ hkane hto. Ra mẽ ate ja pumunh mex. Tã ja pyrà nẽ na pa pre mẽ kot amnhĩ to mex xwỳnhjê hwỳr ixwrỳk kêt nẽ. Mẽ kot amnhĩ tomnuj xwỳnhjê pix wỳr na pa pre wrỳ. Ixte tãm mẽ unhwỳr kaxyw mẽ hwỳr wrỳ nẽ ã jajê kutã ixàpkur o inhỹr anẽ. 13 Ga mẽ ma mra nẽ Tĩrtũm kapẽr ã kagà htũm kot ja jarẽnhja kamã harẽ nẽ ama. Harẽnh kot:

—Ã Tĩrtũm kapẽr ã kagà htũm kot ja jarẽnh kot anhỹr. Tã ja pyrà nẽ na pa pre mẽ kot amnhĩ tomnuj xwỳnhjê hwỳr wrỳ nẽ mẽ kamã ixukaprĩ ho ixpa. Mẽ kot amnhĩ tomnuj kaga nẽ hpãnhã tãm amnhĩ nhĩpêx kaxyw na pa pre ã mẽ hwỳr ixwrỳk anẽ. Tã ka mẽ ri atỳx amnhĩ krã hkôt ã ixto akapẽr anẽ. Anẽ.

14 Tã nhũm Juãw Paxis kôt mẽ pa xwỳnhjaja Jejus wỳr mra nẽ mẽmoj tã hkukja nẽ kãm:

—Pa? E ot pa mẽ awỳr mra. Kwa mẽ inhmã mẽmoj jarẽ. Na pa htem tõhã Parijew nhõ xwỳnhjê pyrà nẽ ixàpkur kêt kãm Tĩrtũm mã amnhĩ jarẽ. Tã nom akôt mẽ pa ho mẽ pa xwỳnhjaja na htem àmnhĩx apkur o pa kamã kãm amnhĩ jarẽnh o pa. Kwa mo na htem mẽ ixpyrà nẽ tõhã apkur kêt kamã kãm amnhĩ jarẽnh kêt nẽ? Anẽ.

15 Hãmri nhũm mẽ kuma nẽ mẽ kãm:

—Nà mo kaxyw kot kêt mẽ apkur kêt rãhã kãm amnhĩ jarẽ? Mẽ hkaprĩre hã. Mẽ kot ixkôt pa ho pa hã amnhĩ pumunh jakamã na htem hkĩnh nẽ ixkôt pa. Kormã ixte mẽ kamã ixpa kênã kot kêt mẽ apkur kêt rãhã Tĩrtũm mã tanhmã amnhĩ jarẽnh to. Xà na htem hkràmnhwỳ hã hkĩnh kaxyw hã akuprõ nẽ hkaprĩ nẽ apkur kêt o kamàt nẽ mỳr o hkrĩ? Nà na htem anhỹr kêt nẽ. Na htem hã akuprõ nẽ hkĩnh nẽ hã apkur rũnh nẽ. Ja pyrà nẽ na hte ixkôt mẽ pa ho mẽ pa xwỳnhjaja ixkôt kormã àmnhĩx hkĩnh nẽ apkati mẽ apkur o pa. Nom koja mẽ kãm ixkurê xwỳnhjaja nhỹrmã tanhmã ixto hãmri nhũm mẽ hkaprĩ htỳx nẽ rĩ kormã tõhã apkur kêt rãhã Tĩrtũm mã amnhĩ jarẽ. Anẽ.

16 Nhũm Jejus mẽ piitã mẽ kãm kapẽr nẽ mẽ kãm:

—Mẽ kot amnhĩ tomnuj xwỳnhjaja ra mẽ kot amnhĩ nhĩpêx tũm o amnhĩ pyràk jakamã na htem tanhmã mẽ kot amnhĩ nhĩpêx nyw tota kaga. 17 Tã ixte amnhĩ nhĩpêx nywja te kot mẽ ate amnhĩ nhĩpêx tũm pyràk kêt jakamã na ka htem ixkapẽr ma nẽ ãm ama. Kwa mẽ inhma nẽ mẽ ate amnhĩ nhĩpêx tũmja gryk ã ixkaga hkêt nẽ. Anẽ.

18 Nhũm pre ã Jejus mẽ kãm kapẽr anhỹr o xa. Rôm nhũm mẽõ pahihtija tẽ nẽ mar o xa. Hãmri nẽ hamaxpẽr o:

—Kokỹỹ. Jejusja ãm hãmri kêp pahi maati kumrẽx. Hã na ri ã kapẽr mex anẽ. E pa hwỳr tẽ nẽ ixkrare ho kuwỳ. Anẽ.

Hãmri nẽ hwỳr tẽ nẽ kutã hkõnkrã ho nhỹ nẽ kãm:

—Pa akupỹm mẽ ixto mex xwỳnh? E ot pa awỳr tẽ. Kwa ma ixkôt tẽ nẽ inhmã ixkra nire pumu nẽ tanhmã inhmã ho kê akupỹm inhmã htĩr. Na ham ixpê ty pa kaxyw amã ijamaxpẽr nẽ man awỳr tẽ. Anẽ.

19 Hãmri nhũm kuma nẽ kãm:

—Tôe. Nà kot paj ma akôt tẽ. Anẽ.

Hãmri nẽ ma hkôt tẽ. Mẽ ixpê hkôt ixpa ho ixpa xwỳnhjê mẽ pa mẽ ma hkôt mõ. 20-21 Nhũm mẽhõ ni kamrô rãhã ho pa xwỳnhja ma mẽ ixkôt tẽ. Na pre hte hkamrô hkryre rãhã ho pa hã amgrà pê 12 nẽ tee ri kãm amnhĩ mex prãm o pa. Jakamã Jejus jarẽnh ma nẽ amnhĩ kaxyw kãm hamaxpẽr kurê kumrẽx nẽ hamaxpẽr o:

—Ma pa kop ma hwỳr tẽ nẽ kêp ê nhĩrê pix kupênh tã akupỹm inhmex japêr. Anẽ.

Hãmri nẽ ma mẽ ohtôjê kaêx kôt hwỳr tẽ. Nẽ katut kôt tẽ nẽ kêp ê nhĩrê kupê. 22 Hãmri nhũm Jejus ho hakẽx nẽ amnhĩ tã omu nẽ kãm:

—Pa? Kwa tee ri amnhĩ kukamã ajamaxpẽr kêt nẽ. Ate amnhĩ kaxyw inhmã ajamaxpẽr tỳx jakamã na ka ra akupỹm amex. E mãmrĩ ajamakêtkati nẽ ri apa. Anẽ.

Hãmri nhũm akupỹm mex nẽ hkĩnh tỳx nẽ ma akupỹm tẽ. 23 Hãmri pa mẽ ma htyk xwỳnh nhĩpêêxà hkôt mra nẽ õrkwỹ hwỳr agjê nẽ mẽ pikuprõnh xwỳnhjê pumu. Nhũm mẽ ra mẽ hã htu rax nẽ. Nẽ omũj ri kaprĩ xàj pifti kakôr o hkrĩ nẽ omũj ri mur. Kàx pê mur nẽ amnhĩ tak o hkrĩ. 24 Hãmri nhũm Jejus mẽ hwỳr axà nẽ mẽ omu. Nẽ ra kot my hkrata htyk ã omunh tã kuri mẽ mỳr o mẽ hkrĩ xwỳnhjê mã kapẽr nẽ mẽ kãm ãm õt nẽ nõr ã harẽ nẽ mẽ kãm:

—Pa? Kwa mon ka mẽ ri akaprĩ nẽ amỳr o akrĩ? E mẽ ma mra. Na wa hkrata wa kêp htyk kêt nẽ. Na ãm gõr nẽ nõ. Anẽ.

Hãmri nhũm mẽ kot ra htyk ã omunh mex jakamã kuma nẽ ãm kuma. Nhũm mẽ hkwỳja axtem nẽ ri axpẽn mã hã hpẽr o pikẽnh o hkrĩ. 25 Hãmri nhũm kapôt mã mẽ hano nhũm mẽ hapôj nẽ kapôt ã kuhê. Hãmri nhũm Jejusja htyk xwỳnhta wỳr axà nẽ hpa hã kupy nẽ kànhmã ãm nhũm akupỹm htĩr nẽ kànhmã ãm kurê kumrẽx. 26 Hãmri nhũm mẽ piitã akupỹm htĩr kãm omu nẽ ma ri krĩ piitã hkôt ri mẽ kãm harẽnh o hprõt.

27 Tã nhũm Jejus kato nẽ ma tẽ. Pa mẽ hkôt ixpa ho ixpa xwỳnhjaja ma hkôt mõ. Hãmri nhũm wa myja wa hamẽxkrut. Hamẽ wa nohkre xwỳnh wa Jejus jarẽnh ma nẽ hã ajêt nẽ hkôt rôrôk o mõ. Nẽ xatã amnhĩ to hwỳr o hkôt rôrôk o mõ nẽ kãm:

—Pa Jejus? E Tĩrtũm kot mẽ ixkaxyw axãm jakamã kwa wa ixpumu nẽ wa ixkamã axukaprĩ kêt wehe. Anẽ.

28 Hãmri nhũm wa kuma nẽ wa hkukamã nhỹri ixkrem axà nhũm wa hkôt axà nẽ xa nhũm wa omu nẽ wa kãm:

—Pa? E xàn ka wa ra amnhĩ kaxyw inhmã ajamaxpẽr tỳx nẽ nà? Anẽ.

Hãmri nhũm wa kãm:

—Tỳ. Wa ixte amnhĩ kaxyw amã ijamaxpẽr tỳx kênã. Anẽ.

29 Hãmri nhũm wa kuma nẽ hamẽ wa no hã ĩhkra xi nẽ wa kãm:

—Tôe. Nà war ate tanhmã amnhĩ kaxyw inhmã ajamaxpẽr to xà hkôt kot paj war anhĩpêx. Anẽ.

30 Hãmri nhũm wa akupỹm rĩt mex kurê kumrẽx. Hãmri nẽ akupỹm kato nẽ ma htẽm kaxyw nhũm wa kãm:

—E kêr ka wa nhãm mẽ kãm ixte war ato mex ã ijarẽnh kêt nẽ. Ãm kwarĩ ho kwarĩ.

31 Anhỹr tã no nhũm wa kuma nẽ ãm kuma nẽ wa ma tẽ nẽ krĩ pu hã mẽ piitã mẽ kãm ri war amnhĩ tã harẽnh o mra.

32 Tã nhũm Jejus ma axte nhỹhỹm mẽ ixto mõ. Hãmri nhũm mẽhõ my mẽkarõmnuti kot hwỳr àr nẽ tanhmã ho nhũm kapẽr kêt nẽ pa xwỳnhja nhũm mẽ Jejus wỳr o tẽ. 33 Hãmri nhũm omu nẽ nê mẽkarõmnuti jano nẽ kãm:

—E kêp akato nẽ ma tẽ. Anẽ.

Hãmri nhũm kuma nẽ kurũm kato nhũm akupỹm kapẽr mex kurê kumrẽx. Hãmri nhũm mẽ kot hã omunh xwỳnhjaja tee ri kot mẽkarõmnuti janor ã omu nẽ kamã no pyma nẽ. Nẽ axpẽn mã:

—Kokỹỹ. Aa mẽ pahte ã mẽhõ kot anhỹr pumunh kêt kumrẽx tã na pu mẽ jarãhã ja pumu. Anẽ.

34 Nom nhũm mẽ hkwỳ pê Parijew nhõ xwỳnhjaja axtem nẽ hã mẽ kãm kapẽr o:

—Tk. Kot amnhĩ krã hkôt mẽ hanor kêt kênã. Mẽkarõmnuti nhõ pahi nhỹ hã kot mẽ nê mẽ hanor kênã. Anẽ.

35 Tã nhũm Jejusja krĩ ho ohtô nẽ hkôt ri mẽ kãm Tĩrtũm kapẽr jarẽnh o pa. Pa mẽ hkôt ixpa. Na pre hte nhỹri krĩ hwỳr pôj nẽ mẽ kot Tĩrtũm kapẽr o mẽ ahkre xà hã ixkre hwỳr mra nẽ hwỳr agjê nẽ mẽ pikuprõnh xwỳnhjê jahkre. Nẽ mẽ kãm:

—E mẽ inhma. Tĩrtũm kãm mẽ apiitã mẽ ato hkra hprãm. Jakamã kwa mẽ ate amnhĩ tomnuj kaga hprãm xàj hkôt amnhĩ xunhwỳ nẽ kapẽr kôt amnhĩ nhĩpêx. Jao amnhĩ nhĩpêx nyw o amnhĩ nhĩpêx o ri apa.

Anhỹr o mẽ kãm kapẽr. Hãmri nẽ ahpỹnhã ri tanhmã mẽ à kute xwỳnhjê ho mex. Nhũm mẽ ohtô nẽ hkôt mar o pa. 36 Hãmri nhũm mẽ omu nẽ kãm mẽ hkaprĩ nẽ. Na prem tee ri amnhĩ kukamã hamaxpẽr o pa jao ra hkaprĩ nẽ. Nhũm Jejus ja hã mẽ omu nẽ hamaxpẽr o:

—Hêxta waa nẽ. Na mẽ mex kêt nẽ pa. Te mẽ kêp ôwêhti jamãr xwỳnh kêt kot amnhĩ nhĩpêx pyràk o htỳx ri pa. Mẽhõ koja kãm mẽ hkaprĩ nẽ tanhmã mẽ ho mex to ho pa? Anẽ.

Hãmri nẽ mẽ kamã ukaprĩ nẽ. 37 Hãmri nẽ mẽ hã mẽ ixpê hkôt ixpa ho ixpa xwỳnhjê mã kapẽr nẽ mẽ inhmã:

—Nà na mẽ kormã ohtô rax nẽ Tĩrtũm kapẽr mar kêt nẽ. No ãm kormã mẽ ate mẽ kãm kapẽr jarẽnh o apa kaxyw mẽ agrêre. Te pur rax kãm ra harôj kamrêk par nẽ ãm tã no ãm kaxyw hikẽnh xwỳnhjaja grêre pyràk. 38 Jakamã kwa mẽ ho Tĩrtũm wỳ kê axte mẽ kaxyw mẽ akwỳjê rê kê mẽ apyrà nẽ ma mẽ hkôt ri mẽ kãm kapẽr jarẽnh o pa. Anẽ.