1 Ahudok nyumnah Sabat eshesh Juda douk madae shunek mour shape meyohahi douk hatuh. Aria ruwahep wehip Sandeih nyumnahin aun apa nakihi, aria Maria kwanaki wabur Makdala iri kwani kupaikwi atin nyeigur Maria wanaki ruwahep wehip um utik wonugwehw. 2 Aria atub nyutob debeikwi enyik kwatuk. Umum maresh, enen Debeini ananin ensel nyakitaki heven aria nyabuhi nyagreshuk utom matapok witegur iri aria nyahagi nyape iruhimum. 3 Enyudok enselig yomag genek lait kabi da utag brereyarog um aria enyenyih rupah douk kabi da armir shigorihw um henek lait abom. 4 Amam soldia hanogugur um enyudok ensel aria arugoguhwiar wam aria habuh hakuh amnab kabi douk armam hagokum.

5 Aria enyudok ensel nyakrip oudok armago namudok, “Ipak mare punogugur uwe, uwok. Eik yadukemesh, ipak douk panamori purim anudok Jisas douk shan shenek nyiliman neir rowogin kruse iri. 6 Anan madae ta nukus agundok uwe, uwok. Anan iganigadae ta nakitak um shagok um aria nape, kabi da riguk nakri um. Ipak yowi ba putik outuk agundok shanubuk um. 7 Ipak kare arigas atin punak pukrip ananim disaipel namudok, anan nagok aria iganigadai ta nakitak um shagok um aria nape adur atin. Ipak gamo pumnek. Anan ko nurik um ipak aria nunak um shokugi nahobig Galili aria ipak ko punaku putrun ganudok. Eik douk yanakium ikripep um enyudok baraen.”

8 Oudok bio watik enyudok ensel aria wanogugur abom, aria shopunek owo wanadudareh abom, aria arigas atin wakutukuk wonugwehw aria wahur wonak um ukrip ananim disaipel. 9 Aria Jisas naparago yah, aria nakri namudok, “Ruwahep bio.” Aria owo bio wanak huruhuruk um anan watu wabuh amnab aria wowem owowis wis ananiruh yeriweruh aria wonek lotu um anan. 10 Aria Jisas nakripo namudok, “Ipak bio mare punogugur. Ipak kare ba pukrip eikim owarhim um amam disaipel hunaku arigas um shokugi nahobig Galili. Aria amam ta hutik eik ganudok.”

11 Oudok bio armago wata apa wonak yahum utik amam disaipel, aria amam soldia heyoh wonugwehw iri hanak hawish abrudok debeiburi wabur Jerusalem. Hawish aria hakrip amam debeimi pris um ihishmorim eneshenesh amam hatrish shatogur iri. 12 Aria amudok pris hemnek namudok aria hanak hani eshesh Juda esheshim debeimi hantorum hape habo enen baraen. Aria hakitak hator amudok soldia hakam debeibori utabor. 13 Hakam utabor aria hakripam namudok, “Ipak punak penek rohw pukripesh namudok, ‘Apak meshuh wab aria ananim disaipel hanaki hakwuman-aruh aria haran hanak.’ 14 Aria douk Pailat debeini gavman iri numnek enyudok baraen um, aria apak ko muni anan miyagwreh ba miyatok baraen. Namudok aria baraen ta mare nyupe ipak uwe, uwok.”

15 Namudok aria amudok soldia horao utabor aria hagipesh debeimi amamin baraen. Aria enyudok baraen soldia henek rohw hagiyagig-enyi nyanak nyanaki orokohun um eshesh Judaish arpesh eshesh kanak arigaha nyanaki um abudok doukib nyutob.

16 Aria Jisas ananim 11-poreim disaipel hagim yah hanakum agudok shokugi nahobig Galili. Aria hanak hatogur ahwodok yoduhw kabi da Jisas nakripamuk um. 17 Hanak hakih hatik Jisas aria henek lotuman hatuk ananin nyeigur nyato gani iruhw. Aria anam amudok hor biyep urkwip aria hakana anudok douk madae Jisas uwe, uwok. 18 Aria Jisas nanaki huruhuruk um amam aria nakripam namudok, “Eikin yaken Iruhin douk nake debeinyi nyeigur eik yatogur dodogoiwe aria yape debeini um ihishmorim eshudok shape iruhw atap iri. 19 Namudok aria ipak douk ta punam ihirub warub um ihis awirosish arpesh aria pukripesh eikin baraen. Pukripesh um shumneken shusuhwen aria shugipesh eik shutogur eikish disaipel. Aria punek baptaisumesh um eikin Yaken ananin nyeigur, um eik Nuganin eikin nyeigur aria shopunek um Iruhin ananin Mishin enyenyin nyeigur. 20 Aria punek skulumesh um shugipesh ihinyumorim baraen douk eik riguk yape yakripepen iri. Eik yakripep adurin atin baraen, Eik douk ini ipak mupe ihih nyumneh arigaha hugiguk iri nyumnah hutogurum agudok nahobig.”