1 Niko mara veoromina Saul i mamana wai, bigeruwana biyisi kasi kasibunuwa i wonewonei, wai i gae asi priest kaikapona kurina. 2 Ba i babai kata pepa ita kirumi ku Damascus babada kurisi kata Jew biyisi asi dugu yovesi yai, kotoi wata ita panani, wasike kona sebare Bada ana keta te bisununuri wai, ita patumisi ba ita yaunisi ita veramaga ku Jerusalem.

3 Kata i tauya i nenae matapa ku Damascus i veraverakasibau, ba yasegana sapamai i gakira i subibiri. 4 Damanina i peku ku tano ba gamo i nonori kurina i wona, “Saul! Saul! Awaika kairavina kebi tupa ketowaniku?”

5 Kata Saul i toiruba i wona, “Kom kotoi Bada?”

Ba gamo i kaobeyei i wona, “Yauku Iesu! Ba kebi tupa ketowaniku, 6 karaku nina ke bomsiri ba kuna nae ku Damascus, ba namai sina wonim awaika kuna wosei.”

7 Ba iyabosi yabata si nenae wai asi sisiya i kakaba ba si msi damana; kairavina gamo si nonori saba kega kesana kotoi si kinani. 8 Ba Saul i peku ku tano ba i msiri maranai, wai matana i tamotatara saba kega kesana awaika i kinakinani, wai turana yarona si yauni ba si rutitaini ku Damascus. 9 Ba kao tonu kamonai kega i kinana ba kona maranai kega i kam kona i toma.

10 Ba namai Damascus kamonai nonorayauna kesana i mamana kana waba Ananias, aba kinakinanai Bada i yorei, “Ananias!”

Ba i kaobeyei, “Yauku nina Bada.”

11 Ba Bada Ananias i wonei, “Ke tauya kuna nae Keta kana waba Keta Totorina ba Judas ana ku yove, ba namai Tarsus sebare kana waba Saul ki toirubei, kona wai karaku nina e rupari kuriku. 12 Ba kona aba kinakinani i kitai kata sebare kana waba Ananias i botu ba yarona ku tepana i terei wai i kinana mena.”

13 Saba Ananias Bada i kaobeyei i wona, “Bada, Saul am bigeruwana pipiyisi Jerusalem kamonai, e kasikasi bigoyonisi wai tupana a nonora roboi. 14 Ba ka nonori kata priest kaiwabona bidamanina maragasina pepana i berei kata bigeruwana biyisi ina patumisi.”

15 Saba Bada Ananias i wonei, “Ke nae, kona sebarena wai a binei au saibisaibirina ba wonaku ina rumamara neubuwei, Gentile biyisi asi tautaupauma kurisi ba yebo Israel biyisi kurisi. 16 Ba ani beyei ina kuiri kata mekabage yauku Iesu, kairaviku sini nomosa ina paiwarei.”

17 Damanina ba Ananias i nae ku yove kamona i riu, ba yarona i terei Saul ku tepana, ba i wona, “Waresiku Saul, ketai ku yewo ku botubotu ba Bada Iesu i rerematara kurim wai kona i poraiku a botu, kata ana borubaim wai kuni kinana mena ba Kanuma Kaobaisiyena ini bonuvim.” 18 Ba marakesana sawara kesana siyauwa kerarisi rutainisi si peku ba i kinana mena ba i bomsiri wai i babataito, 19 ba i kam murinai wai ana maragata i veramaga mena. Ba Saul Damascus i mana yogina ba i veramaga ku Jerusalem.

20 Ba kao kesana Saul rumamara Jew biyisi asi dugu yovesi kamosi yai i dagui, i wonawona kata Iesu wai bisuwona God Natuna. 21 Ba iyabosi wata namai si nonori wai si sikwana saki ba si toiruba si wona, “Niko, sebarena kesanina Jerusalem kamonai, pipiya Iesu kana wabai si bopepeta wai, i kasikasi bigoyonisi kona? Ba memena bage i botu mena, yebo pipiya ina patumisi ina nae priest kaikaposi kurisi.” 22 Saba Jew biyisi Damascus kamonai si mamana wai nuwanuwasi i kairagaraga kega rubana awaika siti sisiyei, kairavina Saul ana rumamara i maragata saki, ba i wonewonisi kata Iesu wai Baibai yawasina Kaobaisiyena.

23 Kao pesarisi murinai Jew biyisi bibune yai si dugu kata Saul sita kasibunui. 24 Kao ba pom meyaga kana matamketa sibo kibukibui kata sita kasibunuina kairavina, saba matapa i kuiri. 25 Damanina pom wakunai bigeruwana biyisi Saul si yauni ku tegara kaikapona kamona si wani ba papa masarenai si sonagi i kasibau.* 2 Corinthians 11:32,33

26 Ba maranai i botu ku Jerusalem wai ana waina Iesu ana nonorayauna ita riu ku kamosi, saba si nagarei, kairavina kega si geruwei kata kona bisuwona Iesu ana nonorayauna. 27 Damanina Barnabas i urabai i botu apostles kurisi ba i wonisi, awaika i tupuwa Saul kurina ba mekabage Bada i sisiya kurina, ba yebo i wonisi mekabage i sinitora ba Iesu kana wabai Damascus kamonai i rumamara. 28 Damanina Saul namai kosi yabata i mana ba nuwagaire yai ba ere sinitorana, Bada kana wabai i raumamara neubuwa Jerusalem kamonai. 29 Saba yebo Jew biyisi Greek asi gamo ai si bisisiya wai yabata si kawapata, ba asi waina sita kasibunui. 30 Ba maranai bigeruwana biyisi si rupanani kona sita kasibunui wai, si urabai si gakira ku Caesarea ba si porai ku Tarsus.

31 Damanina ba ekaleisiya, Judeai Samariai ba Galilee kupurisi ereonowana nuwanuba i mana ba Kanuma Kaobaisiyena i bobimaragasisi ba i bobitorisi kata Iesu kairavina ere kumarisi ba bokuwayai si mana asi koroto i rakata.

32 Ba Peter meyaga nunusi yai i yewo neubuwa ba i botu ku Lydda wai Keresiyana i rugenarisi. 33 Ba namai pipiya kesana, kana waba Aeneas i panani ba kona wai sini raoboraobona, ba ana kepanai i dauwa yepo bodu 8 si kakaba. 34 Peter, Aeneas kurina i wona, “Iesu Keriso ini yawasim, ke bomsiri ba am yagoro ke nokui.” Ba yagiyagina wata i bomsiri. 35 Saba kosi iyabosi Lydda ba Sharon meyagisi kamosi yai si mamana wai, sebarena si kitai wai asi yawasa si berena Bada kurina.

36 Ba Joppa bigeruwana biyina kesana i mamana, kana waba Tabitha, Greek biyisi te yoreyorei Docas. Kona wai wose gaigairesi i wosewose, ba pipiya moyamoyakisi i potapotaisi. 37 Saba kona marana i gubaga saki wai i rabobo. Ba tupuwina si bosusuwei ba yove kaidamonai si terei. 38 Ba bigeruwana biyisi si nonori kata Peter wai Lyddai i mamana, Joppa gwabina, wai pipiya ruwamo si poraisi si nae Peter si babai, kata ita botu yagina.

39 Damanina Peter yabata si veramaga. Ba si verakasibau wai, si urabai si gae ku kaidamona ba sobesoberesi wai si msi bibiri si tutou. Ba kasi gara Docas yawasinai i popo wai si bibeyebeyei. 40 Saba Peter i wonisi wai si kasibau ku matara mena, ba i maere sogasoga ba i rupari. Ba i tarakata i kinana raoboraobona kurina ba i wona, “Tabitha, ke bomsiri.” Damanina matana i tamotatara ba Peter i kinani wai i bomsiri ba i makira. 41 Ba yarona i yauni ba i baisi i msiri. Damanina bigeruwana biyisi ba sobesoberesi i yorisi ba i beyisi kata Docas wai i yawasa mena. 42 Damanina ba pipiya pesarisi Joppa meyaginai warana si nonora roboi wai Bada si geruwei. 43 Ba Peter, aba payapaya kwapirisi kana aba wosewose, kana waba Simon, yabata Joppa meyaginai kao pesarisi si mana.