1 Kata Bada Moses kurina i wona, 2 “Ke kinani! Yauku Judah ana dam kamonai Bezalel, Uri natuna ba Hur wawana a binei, 3 ba God ana Kanuma ai bonuwei, wai nuwasuya, kuira ba saibira a berei wai sawara ereonowasi yaronai e wosewose: 4 Kona saibira e bigayamei ba e kaobibeyebeyisi wai gold, silver, ba bronze yai te wosewose, 5 akima te taratara kiruma, ba keyama te rautasi bibisaka. Nikosi saibira i kesina i kuira wai nimanai ina wose kabitam. 6 Ba yebo Oholiab a binei, Ahisamak natuna, Dan ana dam kamonai. Kona, kana bibaita kesana, saibira a berei kata turaturana yabata sina saibira. Ba yebo kosi ereonowasi nuwasuya a berisi wai nimasiyai saibira a kaotunetune yim wai, ereonowana sina wose. 7 Au Tabernacle, ba Bidamaina Maragasina Dedewagina kana kasitawana, ba piragagoyo pupuna taveyina gawarina ba sawarina ereonowana, 8 pesapesa, ba kana sawara ereonowana, kibe kana aba bimsimsiri. Gold yai si wosei wai ba sawarina ereonowana, pugu gairena kana kapukapuna raunabonabona ba sawarina, 9 ba suwara kapukapuna kana raunabonabo, ba sawarina, ba bosuwana kabomina ba kana aba bimsimsiri, 10 ba yebo gara kaobaisiyesi kona metena, Aaron kairavina ba natunatuna yabata kata sina kote ba priest saibirina sina wosei. 11 Ba biboro wairorona, ba bane puguna, gawara kaobaisiyena kairavina. Ba pipiya nikosi sawara sina wose mekabage a kaotunetuneyim wai nanakasike.”