1 Rabisi pompomai Lot Sodom meyagina kaikapona matam ketanai i makira i mamana, ba aneya asi ruwamo si verakasibau. Maranai i kitaisi wai i bomsiri, ba iverabeyisi ba naona i maere sogasoga i gakira ku tano. 2 Ba i wona, “Au Babada a bibabaim, ko verai bira ami aba saibisaibirina ana ku yove, koni kae suwana ba kona dauwa, ba maram koni sukumara kona nae.”

Saba si wona, “Kega, nina debadebai kana dauwa.”

3 Saba Lot i kaotupetupenisi wai yabata si nae ba si riu ana ku yove. Lot kam i bobunagi kairavisi ba bread kega yeast yabata i kapuni ba kasi kam i wosei ba si kam. 4 Karakuwata sita dauwa wai Sodom sebasebare ereonowasi yaraka ba waraete yove si subibiri. 5 Ba si yoreana si wona, “Nakosi sebasebare karauku pomai si botu kurim wai memena? Ke tere kaibuvisi kani yarakisi.”

6 Lot i kasibau kurisi ba matam keta i gudui 7 ba i baba kuwakuwayisi i wona, “Au dam, kega niko wose goyona kona wosei. 8 Ba natunatuku bibaine ruwamo nina sini tupasi. Kosi ana berim kata kurisi awaika wosena kona waini wai kona wosei, ba nikosi sebasebare wai kona kau wagawaga, ani tara pananisi.”

9 Saba si kaobeyei, “Ke nesaira. Ba kana kayo resoim.” Ba si wona, “Niko sebare wai ta kupura pipiyina, ba ana waina ini buibuiyita!” Ba Lot si ratu taveyei ba si sududuna matam keta sita rikai.

10 Saba pipiya ruwamo yove kamonai si bororona Lot si taina riuwei ba matam keta si gudui. 11 Ba pipiya matarai yarakisi ba waratesi matasi si sowasowa wai kega rubarubana matam keta sita panani.

12 Damanina sebasebaresi asi ruwamo Lot si wonei, “Am dam iyabosi wata nina, natunatum, rawarawam kona am rakaraka niko meyagai te mamana? Ke uraba kasibauwisi, 13 basuna niko kupura kana kasigoyoni kairavina asi goyona i rakata saki Bada matanai wai Bada i poraikai kana kasibigoyoni.”

14 Damanina Lot i kasibau rawarawana sebasebare i wonisi, i wona, “Yagiyagina niko kupura ko kasibau taveyei. BasunaBada niko meyaga kaikapona ina kasibigoyoni.” Saba rawarawana sebasebare si nosi bage iti binama.

15 Mara i tom wai aneaneya Lot si rubisasari si wona, “Yagiyagina! Kaowam ba natunatum bibaine ke uraba kasibauwisi kairavina niko meyaga kaikapona ana saroba ina yauni wai komi yabata ina kayo yaunimi.”

16 Saba i bimetewa saki wai aneya yarona si yauni ba kaowana yarona ba natunatuna bibaine, ba si tainisi meyaga kaikapona si kasibau taveyei ku matara kairavina kosi Bada i nuwanuwanisi.* 2 Peter 2:7 17 Si uraba kasbauvisi murinai, kesana i wonisi, “Ko vera ami yawasa kairavina! Kega kona rusinimura! Konae sanagai koni yakam. Ko vera ku koya kona kayo rabobo!”

24 Damanina ba Bada keyama ba akima karakarasina kusana rautainina i garu kirei Sodom ba Gomorrah ku tepasi.* Matthew 10:15, 11:23,24; Luke 10:12, 17:29; 2 Peter 2:6; Jude 1:7 25 Pipiya ereonowana ba awaika wata si rutiti si gegae wai meyagina kaikapona tupana i karapupuna taveyei. 26 Saba Lot kaowana i rusinimura wai i tukeke enaenagina.* Luke 17:32