1 Yanhenge anteme tyerrtye awethe atningke Jesus-eke akangkwe-irreke, atyewe Jesus-kenhe areye atningke-irreke, arrpenheme akenhe Jew areye Greek angkentye akngerre-arle, arrpenheme akenhe Aramaic angkentye akngerre-arle. Nhenge Greek angkentye akngerre itne Aramaic angkentye akngerre areyeke akengentye angkeme, itne Peter uthene atyewe ikwerenhe areye-werne apetyemele angkeke, “Awaye! Arlte arrpe-anenhele arrantherre arelhe warlekwerte areyeke merne antheme. Kele arrantherre Aramaic-arle angkeme areyeke-ante-arle antheme kele Greek angkentye akngerre areyeke akenhe arrangkwe-arle.” 2 Kele yanhenge Peter uthene atyewe ikwerenhe areyele atyewe Jesus-kenhe areye Jerusalem-ele apurtelhe-ilemele imerte itneke angkeke, “Urrkapentye anwerne-kenhe kwenhe arrpenhe anthurre, kele anwerne itnenhe akwete akaltyele-anthetyeke ayeye Jesus-akerte Ngkarte-ngentyele. Kele akurne-arle aneme anwerne apeke alakenhe mpwaretyakenhe anerlenge. Kele anwerne-arle arelhe warlekwerte areye ngkweltye-arlke antheme-arle, anwerne tyerrtye areye akaltyele-anthetyeke arrangkwe-arle. 3 Arrantherre artwe akaperte altywere 7-pele arrantherre-ngentyele akngaketyeke, Utnenge Akngerreke-arle akangkwe-irretyenhenge. Itnenhe-arle akngakeke iperrele itnenhe arrernemele urrkapentye nhenhe mwerrantye mpwaretyeke merne antherlte-anemele. 4 Anwerne akenhe akwete-arle urrkapentye arrpenhe nhenhe mpwarerlenge, Ngkarteke angkemele akaltyele-anthemele ayeye Jesus-akerte Ngkarte-ngentyele.”

5 Nhenge Jesus-kenhe areyele awemele itne akangkeke kele imerte itne Stephen anteme inemele. Rarle artwe Utnenge Akngerreke-arle akangkwe-irrentye akngerre Jesus utheneke. Itne artwe arrpenhe areye ineke, Philip, Procorus, Nicanor, Timon, Parmenas, Nicolas. Nicolas re akenhe Jew anetyakenhe-arle aneke apmere Antioch-arenye. Urreke re Jesus-eke atyewe-irretyenhenge, re Ngkarte Jew areye-kenhe arratye itelaretyarte. 6 Kele-arle artwe 7-pele itnenhe akngakeke iperre, akangkwe-irrentye akngerre arrpenhe itnenhe akngetyeke yerneke-arle areye-werne. Yerneke-arle areyele iltye itnekenhe arrerneke akaperteke-arleke artwe itneke-arleke imerte urrkapentye itnekenhe anthemele imerte Ngkarte apayuthnemele itnenhe utnenge lterrke-iletyeke.

7 Nhenge Peter uthene yerneke-arle areye uthene angkentye Ngkarte-kenhe angkerlenge tyerrtye areyele akangkwe-irremele aweke. Atningke anthurre anteme akangkwe-irreke. Kele apmere yanhe Jerusalem-enge Jesus-kenhe areye atningke anthurre anteme irreke, kenhe arrpenhe areye kwertengerle Moses-kenhe-arle anekeke, itne-inpe Jesus arratye itelareke itnekenge apurte-irreme.

8 Kele Ngkartele artwe Stephen renhe mwerrantye arntarnte-aremele ngangkere-arlke Utnenge Akngerre-arlke anthemele arne arrpe-anenhe re mpwaretyeke. Tyerrtye areyele renhe aremele itne apatewarreke itne-arle itelarekenge Ngkarte-arle ikwerenge aneke urrkapemele.

9 Kele Jew apmere arrpenhe-arenye areyele aremele itne ahele-irrerreke ikwere. Artwe itne apmere Cyrene-arenye uthene Alexandria-arenye uthene itne pwatheke urrkapentye impelheke. Itne-arle ngkweltyeke warrke-irreme, apmere arrpenhele-arle apurte-irrerretyarte Ngkarte utyernemele tnaketyeke, tyerrtye arrpenhe areyele apmere yanhe ikwerele itnenhe iletyarte alakenhe, “Pwatheke urrkapentye impelheke-arle areye.” Artwe arrpenhe areye aneke apmere Cilicia uthene Asia-arenye uthene. Nhenhe itne Stephen-eke ahele-irremele renhe iltemele renhe alkngetherre ilemele. 10 Kenhe Stephen akenhe itneke itelarentye akwete-arle angkerlenge, Utnenge Akngerre-arle ikwerenge anekenge renhe lterrke-ilemele arratye akwete re angketyenhenge itne uyarne renhe tyelpelhe-ileke rarle itneke lterrke anthurre-arle anekenge. 11 Kele itne artwe urrpetyeke antangkeke itnenhe apurtelhe-ilemele anyelknge-anyelkngele ngkweltye itnenhe antheke itne ayeye urrtyirrentye Stephen-akerte antekelhe-iletyeke ilerle-apeme. Kele arratye itne alheke tyerrtye areyeke alakenhe angkerlte-apetyeke, “Aye! Anwerne aweke artwe nhenge Stephen akurnentye angkerlenge Moses uthene Ngkarte uthene-akerte.”

12 Ayeye nhenhe itne awemele tyerrtye areye itneke akangkwe-irreke itne anteme alhemele ileke angkentye Moses-kenhe ilentye akngerre areyeke artwe ampwe arrekwelenye areyeke-arlke ilemele. Itne anteme Stephen renhe arntwirrkemele ineke imerte, Jew arrpenhe areye inemele itne renhe tyarre-akngeke ilthe kwene-werne imerte Jew akngerrepate areye arrekweleke ngkernemele itne renhe apayuthnetyenhenge nthakenhe renhe iletyeke. 13-14 Kele itne antangkeke artwe urrpetyeke nhenge urrtyirremele-arle ilekenge itneke angketyeke apetyetyeke. Itne anteme apetyemele urrtyirremele alakenhe angkeke, “Arratye kwenhe artwe nhenhe tyatye Ngkarte-kenheke apale angkeke. Rarle angkeke Jesus Nazareth-arenyele akwele tyatye nhenhe ataketyenhe. Re angkentye Moses-kenhenge-arlke apale angkeke, ilemele Jesus-elarle akwele angkentye Moses-kenhe akngarte-iwetyenhe.” Alakenhe-arle itne Stephen-akerte angkeke.

15 Artwe areye apmere kwenele-arle aneke Stephen arnterre areke inngerre ikwerenhe pwarrtyerlenge alkere-arenye-arteke.