1 Arrantherre ampe Ngkarte-kenhe areye aneme, arratye rarle, Ikwerenhe areye. Re arrekantherre ahentye anthurre aneme mwantyele arntarnte-aremele. Alakenhe re anteme arrantherre Renhe arrkernemele angwaremele Re-arteke anerrirretyeke nhenge arrantherre akwete anteme mwerre anerrirretyenhenge. 2 Christ-eke itirrewarraye. Arrpenhele renhe uternetyakenhe anwerneke ilwetyeke, arrangkwe-arle. Re-arrpe itirremele anthelheke Ngkarte-werne-atheke nhenge Re anwerneke ilwetyeke, anwerne itethe-iletyeke. Re kere-arteke anthelheke Jew areyele-arteke-arle kere itnekenhe itemele antheme Ngkarte nhenge Re itnekenge mwerre anteme anetyenhenge. Ngkartele-arle kere renhe ntyernetyarte amperlenge, kele imerte Re akangkemele itneke. Alakenhe re-arteke anteme, Christ anthelheke Ngkarteke rarle anwerneke ahentye-anekenge. Alakenhe re-arteke anteme arrantherre mwerre anerrirretyeke, arrantherre-arrpe ahentye-anemele arntarnte-arerretyeke.

3 Arrantherre Ngkarte-kenhe areye aneme, Ikwerenhe akwete. Alakenhe ikwerenge anteme arrantherre tyerrtye arrpenhe areye-arteke anerrirretyale akurne-arle mpwarerlte-anemeke. Kenhe arrpenheme areye akenhe kele-arle anewe-akerremeke, itne apeke tyerrtye arrpenheke alhirrelhe-ilerrerlenge mpwenye ikngwerremele, kenhe arrpenhe areye itne mpwenye unthentye akngerre anerrirrerlenge, kele antime-arle. Kenhe arrpenhe areye ankeye akngerre-irrerirrerlenge arne awetheke-arlke. Itne-arteke anerrirretyale! Arrantherre apeke itne-arteke aneme, kele arrpenhe areyele arrenhantherrenhe arerrirretyenhe arrenhantherrenhe akurne anteme akerrirretyenhenge, itne arrekantherre tyele angkeme. 4 Arrantherre-arle Ngkarte-kenhe aneme, Ikwerenhe altye-irreke iperrele, iltetyale arertele-arteke. Arrkene-arrkene angketyale akurne areye-akerte. Impaye! Ngkarte-ante itelaremele akangkemele aneme Renhe tnakemele utyernemele anaye. 5 Kenhe tyerrtye arrpenhe areye ankerle-ankerle-arle-irremeke arne arunthe awetheke, itne arrpenhe areye-arteke akaperte itnekenhe-arle kwene-irremeke arne akurne areyeke, apwertenge-arle arnenge-arlke mpwaremeke, itneke tnakemele alyelhemele. Alakenhe akurne anthurre. Ayeye atyinhe nhenheke mwantye itirremele anetyeke. Ngkarte uthene Christ Jesus uthene Ratherre alartetye aneme anwerneke Ikwerenhe-arle. Nhenge tyerrtye anyentele apeke akurne akwete mpwaremele, mpwenye unthentye akngerre aneme apeke, nhenge akurne arrpenhe areyeke apeke akwete ankeye akngerre aneme, itne Ngkarte-kenhe anetyakenhe aneme, arrangkwe-arle. Itne apeke akurne nhenhe areye akwete mpwaremele, kele itne Ngkarte iwemele.

6 Nhenheke itirrewarre: Ngkarte ahele-irretyenhe angwenheke apeke Renhe-arle awetyakenheke. Tyerrtye arrpenhele apeke apetyemele arrenhantherrenhe urrtyirremele ileme. Tyerrtye nhenge re apeke apetyemele arrenhantherrenhe ileme-ketye mwerre-arle akwele akurne anetyeke. Kenhe alakenhe akurne-arle. Tyerrtye yanheke anteme akangkwe-irretyale, re apeke arrenhantherrenhe Ngkarte-ketye untyeme-ilerlenge. 7 Tyerrtye yanhe areyele arrekantherre akurne iwenhe apeke mpwaretyeke ileme, itnekenge anyenteke-irretyale. 8 Itne alknge pwenge areye-arteke ingwemertele-arle anerrirremeke. Itne Ngkarte aretyakenhe, Ikwere akutne. Arrantherre itne-arteke aneke. Kenhe lyete anteme arrantherre akangkemele aneme Jesus Anwerneke-artweyenge, renhe arratye itelarerrirremele. Rarle arrenhantherrenhe alkngenthe Ngkarte-kenheke-arleke arrernekenge arrantherre yanhele anerrirretyeke. Alakenhe ikwerenge anteme arrantherre mwerre akwete anetyeke Ikwerenge. 9 Nhenge tyerrtye areye alkngenthe Ngkarte-kenhele anerrirremele, itne anteme Renhe arerrirreme Renhe itelaremele. Ikwere ipenhe anteme itne tyerrtye arrpenhe areyeke mwerre anteme anemele, itne mwerre akwete anteme aneme Ikwere-ante anteme. Itne anteme akwetethenhe-akwetethe arratye anteme ilerlte-aneme. 10 Ngkarte apayuthnaye, kele Re anteme arrekantherre imerneme nthakenhe-akenhe Ikwere arratyentye anetyeke. Kele yanhe ipenhe, Re arrekantherre akangkentye anthurre aneme. 11 Kenhe nhenge tyerrtye areye ingwemertele aneme, Ngkarte-kwenye, itne akurne areye-arle mpwarerlte-anemele. Itnekele-arlenge anerrirretyale. Arne mwerre areye akwete mpwarerlte-anaye, nhenge tyerrtye arrpenhe areyele akurne-arle mpwaremeke arrenhantherrenhe areme, kele itne itirremele anteme apure-irremele anteme aneme. 12 Nhenge tyerrtye arrpenhe yanhe areye apurte-irremele, itne alengke-iwelhemele akurne areye mpwareme arrpenhe areyele akwele itnenhe areketye. Nhenge ayenge itneke itirremele, ayenge apure anthurre irreme. Ayenge apure-irreme tyerrtye yanhe areye-akerte angkemele arrekantherre. 13 Anwerne apale-apale itirremele, anwerne-arle akwele mwerre anemeke-athene. Kenhe nhenge alkngenthe pwarrtyemele, re anteme imerneme iwenhe-iwenhe renhe-arle itne anyelknge-anyelknge mpwareke, itne apeke itelareme anteme itne-arle akurne mpwareke. 14 Arrantherre akaltye aneme nhenge nthakenhe alkngenthele arne ingkirreke renhe imernerlenge nhenge ingkirrekele aretyenhenge, akurne areye arratelhe-ilerlenge-arle. Christ-ele anwernenhe alkngampelhe-ilekarle-iperre, anwerne itelarerrirretyeke arratye anteme aretyenhenge arne iwenhe-iwenhe apeke mwerre renhe, arne iwenhe-iwenhe apeke akurne renhe anwerne ingkirrekele itelaretyeke. Alakenhe ikwerenge anteme arrpenhe anyentele intelhe-ileke arrule anthurre,

15 Mwantye arelhewarraye arrantherre akurne mpwareketye. Akurne mpwaretyale, arrpenhe yanhe areyele mpwareme-arteke, nhenge areye-arteke Ngkarteke akutne areye. Iwerre mwerreke itirrewarraye, yanhe areyele-arteke Ngkarte-arle itelaremeke lyete. 16 Ingwenthe ware apmere ahelhe nhenhe uyerretyenhe. Kenhe lyete akenhe tyerrtye ingkirreke apmere ahelhe nhenhele aneme, itne akurne anthurre! Itne akurne akwetethe mpwarerlte-aneme. Alakenhe ikwerenge anteme arrantherre arratye akwete anetyeke Ngkarteke. 17 Atere-irrerirretyalaye! Akwete anthurre Ngkarte apayuthneme iwenhe-iwenhe arrantherre-arle itirrewarreme, Re anteme arrekantherre iletyenhenge iwenhe apeke ikwere-akerte arrantherre-arle itirrewarrekeke. Iwenhe apeke ikwere Ngkarte ahentye-anerlenge akaltye-irraye, imerte renhe mpwaremele. 18 Ngkwarle-iperre arerte-irreretyalaye! Arrantherre apeke antyweme, akurne-ilelhetyale. Arrantherre Utnenge Ngkarte-kenheke ante ahentye-anetyeke arrenhantherrenhe arntarnte-aretyeke Re akngerrepate arrekantherre anetyeke. 19 Nhenge arrantherre apurte-irrerirremele alyelhetyeke, Ngkarte-kenhe arrpenhe areyenge tyatye akngerrele, alyelhentye mwerre akngerre areye Payepule-ngentyele alyelhewarraye, alyelhentye lyetenye areye Utnenge Ngkarte-kenhele-arle arrenhantherrenhe anthemeke. Akangkentye anthurre alyelhewarraye Jesus Anwerneke-artweyeke, Ngkarte utyernemele tnakewarraye. 20 Arne mwerre apeke arrekantherre irreketyenge, arne akurne apeke. Kele mwerre-arle, arrantherre akenhe Jesus Christ-kenhe akwete-arle aneme. Alakenhe ikwerenge anteme arrantherre akwetethenhe-akwetethe Ngkarteke akangkemele angketyeke, nhenge iwenhe-iwenhe apeke renhe arrantherre mpwaremele kele arrantherre akwete Ikwere akangkemele angketyeke.

21 Arrantherre Ngkarte-kenhe areye-arle Renhe utyernemele tnakemele aneme, Renhe Akngerrepate akemele. Alakenhe ikwerenge anteme arrantherre uternerretyale anetyeke, arrangkwe. Arrantherre warrke-irrerretyeke, arrantherre-arle Christ-eke ahentye-anemenge. 22 Kenhe arelhe anewe-akerte areye-arlke awenke anewe-akerte areye-arlke, arrantherre akenhe Jesus-eke ularre warrkene-arteke anthelheke. Alakenhe re anteme arrantherre anewe arrekantherrenhe anetyeke. 23 Anwerne tyatye-arenye areye tyerrtye Jesus-kenhe-arteke, Rarle anwerneke alkwerte-arteke-arle. Re anwernenhe akayake-ileme. Re atyeperre anthurre anwerneke ingkirrekeke aneme, Re-ante anwernenhe ileme arne iwenhe apeke renhe areye mpwaretyeke. Alakenhe re-anteme-arle artwe ikwere anewele marle ikwere anewe ileme. 24 Ngkarte-kenhe areyele Christ-eke warrke impene anthurre mpwareme, alakenhe re anteme arelhe areyele anewe itne-kenheke warrke impene anthurre mpwaretyeke.

25-26 Kenhe artwe anewe-akerte areyele ayenge awerrirraye. Jesus akenhe ayene-ilelhetyakenhe-arle, re anthelheke ilwetyeke anwerne ingkirrekeke arne akurne areye arlkngetyeke. Ayeye Ikwerenhe aweke-arle iperre, anwerne kwatye-werne alheke rarle anwernenhe kwatyele arlkngetyeke, alakenhe ikwerenge re anwernenhe arlkngeme anwerne mwerre anteme anetyenhenge Ngkarteke. Alakenhe rarle Jesus-ele anwernenhe arntarnte-areme. Alakenhe re anteme artwe arrantherre, anewe arrekantherrenhe mwantyele arntarnte-aremele anerrirretyeke nhenge Jesus-ele anwernenhe ingkirreke arntarnte-areme-arteke. 27 Arratye, anwerne Christ-kenhe areye. Re anwerneke piwelhemele ilweke nhenge anwerne Ikwerenhe areye anetyenhenge, nhenge anwerne mwerre akwete anetyenhenge akurne mpwaretyakenhe. Christ-ele nhenhe alakenhe renhe mpwareke nhenge anwernenhe Ikwerenhe areye-arle mwerre anthurre ilemele anwerne Ikwerenge arrwekele tnetyenhenge pwarrtyemele, marle alhileke-arle iperre-arteke, altyeke-altyeke-irretyakenhe, wangkentye-arlke-akenhe, arne iwenhe-iwenhe akurne arrpenhe-arlke anetyakenhe.

28 Artwe anewe-akerte areye, ayenge arrekantherre angketyeke. Christ ikwerenhe areyeke ahentye anthurre aneme arratye, alakenhe re anteme artwe arelhe anewe ikwerenheke mwantye antime ahentye-anetyeke renhe arntarnte-aremele. Artwe anwerne-arle tyerrtye anwerne-kenhe mwantyele arntarnte-aretyeke. Alakenhe re-arteke arrantherre anewe arrekantherrenhe arntarnte-aretyeke. Artwe angwenhele apeke arelhe ikwerenhe mwantyele arntarnte-areme, kele alakenhe rarrpele ahentye-anemele arntarnte-arelheme. 29 Tyerrtye ingkirrekele tyerrtye itnekenhe-arrpe mwantyele arntarnte-arelhetyeke, rlkerte-irreketye apeke, angwenhele apeke renhe atweketyenge, mwantye-irretyeke alakenhe ikwere-ketye. Anwerne merne arlkweme. Anwerne kwatyele alhewelhemele, mantereke irrpemele nhenge irrerntele atweketye. Anwerne mwantyele anemele arntarnte-arelhetyeke Christ-ele-arteke anwernenhe mwantyele arntarnte-areme-arteke. Re anwerneke ahentye anthurre aneme. 30 Alakenhe arratye anthurre. Nhenge anwerne anyenteke-irremele Ikwerenge apurte-irremele, anwerne tyerrtye ikwerenhe-arteke. 31 Artwe areyele arrantherre anewe arrekantherrenhe areye mwantyele atnyenetyeke, ayeye nhenhe Payepulenge-arle arrule anthurre intelhe-ilekenge, “Nhenge urreye akweke amangkemele artwe akngerre anteme irremele, re meye uthene akngeye uthene imperle-alhemele, kele re arelhe anewe anteme akemele. Ikwere ipenhele, re-atherre intemele, anewarte atherre anteme re-atherre anemele, re-atherre anyente anteme-arle aneme, tyerrtye atherre anetyakenhe, arrangkwe-arle. Ngkartele renhe-atherrenhe apurtelhe-ileke anyente anetyeke.” Genesis 2:24.

32 Payepule Akngerrele ayeye nhenhe aneme, nhenge anewarte-arle aneme areye-akerte. Kenhe ayeye nhenhele ileme ayeye arrpenhe renhe artemele-arteke. Ayeye arrpenhe nhenhele Christ-akerte-arle anwernenhe akaltyele-antheme, Rarle anwerneke ahentye anthurre anemenge, ikwerenge apurte-irreke-arle iperre anwerne anyente aneme. 33 Alakenhe ikwere anteme, artwe anewarte-arle areye, arelhe anewe arrekantherrenhe mwantyele arntarnte-aretyeke arrantherre-arrpe arntarnte-arelheme-arteke. Kenhe arelhe anewe-akerte areye-arle, artwe anewe arrekantherrenheke akangkwe-irremele itnenhe awetyeke.